Mako 16 - Amazwi Yakwe Leza 2013

Yesu wazyukuka kufuma ku afwe

¹ Lino Sabata lyapita, Maliya uwaku Magadala, na Salome, na Maliya nyina wakwe Yakobo, iyakala vya mununko usuma vya kuya paka icala cakwe Yesu.

² Katondo tondo pa wanda wakutandika mulungu, lino ilanzi lyatunka, iyaya nu kwi lindi.

³ Mu nzila yauzyanya yati, “Uzye aweni amaya akatukunkulusizye iwe pa mulyango wi lindi?”

⁴ Lyene lino yasanzula manso, yalola kuti iwe ilyali likulu cuze lyati likunkulusiwapo mpiti.

⁵ Lino iingila mwi lindi, yalola umulumendo ala atenzi kwi kasa lilunji, azwite mwingila utiswe, nga yuvwa intete.

⁶ Nawe ayanena ati, “Mutaya ni ntete.” Manyile vino mukulonda Yesu uwaku Nazaleti, wino watanyilwe pa lupanda. Asimo muno, watazyukuka! Lolini pano yamwisile aepa.

⁷ Lelo yangini mukanene alondezi yakwe, na Petulo, muti, “Amamukolelela kuya ku Galile. Kuku akuno mumaya mukamulole, wakwe vino wamunenyile.”

⁸ Caleka yafuma mwi lindi, yasimula ala yakuuvwa intete nu kuzakaza cuze. Lelo yatanenyile nanti umwi, pano yuvwile intete. [

Yesu Waloleka kuli Maliya uwaku Magadala

⁹ Pacisila lino Yesu wazyukuka kufuma ku mfwa, katondo tondo pa wanda wakutandika mulungu, aloleka inkolelo kuli Maliya uwaku Magadala, wino wafumizyemo mipasi yankota cinimbali.

¹⁰ Nawe aya anena auze ali nu ulanda nupya ala yakulosya.

¹¹ Lyene lino yuvwa akuti Yesu umumi nu kuti wali wamulola, yatamutaile.

Yesu waloleka ku alondezi yaili

¹² Pacisila cakwe cii, Yesu aloleka mu musango uiyele ku alondezi yakwe yaili lino yapitanga mu mpanga ala yakuya ku muzi uze.

¹³ Lyene yaweluluka kuyanena auze, lelo nalyo kwene yatataile.

Yesu waloleka ku alondezi ikumi na wenga

¹⁴ Pacisila Yesu aloleka ku alondezi ikumi na wenga ala yatenzi yakulya pa cipango. Ayasinkola, pa kuntataila kwao na pa kukoma kwa myenzo yao, pano yatataile yano amuweni lino wazyukwike.

¹⁵ Nawe ayanena ati, “Yangini mu nsi yonsi nu kukosola Ilandwe Lisuma ku antu onsi.

¹⁶ Wino wensi alataila nu kuwatiziwa, wene alatuulwa. Lelo wino wensi atalataila alavunukwa ku mfwa.

¹⁷ Alino vilangililo vii vilaya na yano ataila. Mwi zina lyane yalafumya mipasi yankota, yalavwanga mu ndimi zyuze,

¹⁸ Lino yalalema inzoka, na lino yalamwa ulembe wene utalayakoma, yalika makasa yao pa alwale, nao yalapola.”

Yesu wasendwa kwiyulu

¹⁹ Pacisila lino Mwene Yesu wavwanga kunoyali, asendwa kwiyulu kupela, aikala kwi kasa lilunji lyakwe Leza.

²⁰ Lyene alondezi yapita kuya kosola konsi konsi, nu Mwene wayazwanga, nu kusininkizya ni vilangililo vino kukosola kwao ukwa cumi.]