Luka 6 - Amazwi Yakwe Leza 2013

Iuzyo lya pamulandu wi Sabata

¹ Uwanda umwi pa Sabata Yesu wapitanga asalala mu vyalo vya ngano. Alino alondezi yakwe yatandika kutinkula misakinta ya ngano. Lyene yapukusa mu minwe yao, nga yalya.

² Afaliseo yamwi yuzya yati, “Uzye pacani mukucita cii pa Sabata icitangazumiliziwa kucita mu Masunde itu?”

³ Yesu nawe aasuka ati, “Uzye mutawelenga cino Davidi wacisile lino wene na antu yano wali nao yuvwile inzala, nupya yulilwe?

⁴ Davidi wingile mu ng'anda yakwe Leza, watozile mikate iyaziliziwe kuli Leza, ino Masunde yazumilizya yasimapepo sile ukulya. Alino wapile na antu yano wali nao.”

⁵ Lyene Yesu amalila na mazwi yakuti, “Mwana wa Muntu wakwata maka akupingula vya kucita pa Sabata.”

Yesu wapozya muntu uwali ni cizanza cilemale

⁶ Pa Sabata lyuze Yesu waile mu ng'anda ya mapepo nu kusambilizya, umwali umuntu uwali ni cizanza cilemale cilunji.

⁷ Yakasambilizya ya Masunde yamwi na Afaliseo yalondelezyanga mulandu wakupeela Yesu. Caleka yamucevya kuti yalole ndi amamupozya pa Sabata.

⁸ Lelo Yesu amanya melenganyo yao nga anena umuntu uwali ni cizanza cilemale ati, “Katuka iza kuno ku nkolelo.” Umuntu akatuka aya aimilila kunoli.

⁹ Lyene auzya ati, “Uzye Masunde itu yazumilizya ukucita cani pa Sabata? Uzye ukuombela antu visuma nanti kuyaombela viipe? Uzye ukutuula umi wa muntu nanti kuulovya?”

¹⁰ Alino acelecensya panoyali onsi, nga anena umuntu ati, “Ololola cizanza cako.” Nawe aolola nga ciya icipuma nupya.

¹¹ Nao yasoka cuze, yumana kapi pali cino yangacita kuli Yesu.

Yesu wasolola atumwa ikumi na yaili

¹² Mu manda yalya Yesu waile ku mwamba ku kupepa. Alola uca, ala akupepa kuli Leza.

¹³ Lino kwaca aama alondezi yakwe yonsi nga muliyo asolola ikumi na yaili, ayatemela ati, “Atumwa.”

¹⁴ Simoni (Wino watemile Petulo) na Andeleya mwina wakwe. Yakobo na Yoane. Filipo na Batolomeo.

¹⁵ Mateo na Tomasi. Yakobo mwana Alufeo. Simoni (kalwisya wa untungwa),

¹⁶ Yuda mwana Yakobo na Yuda Iskalyoti, uwamukoofile.

Yesu wasambilizya nu kupozya alwale

¹⁷ Yesu pamwi na atumwa yatentemuka umwamba, iimilila apatambalale. Lyene iumba likulu cuze lya alondezi ni umba lya antu afumile ku Yudeya nu ku Yelusalemu nu ku misumba yamu nkumba yakwe Tuli na Sidoni,

¹⁸ iiza ku kumuvwa nu ku kupoziwa. Na yano kwene acuziwanga ni mipasi yankota iizile iyapoziwa.

¹⁹ Antu yonsi yalondanga kumukumya, pano maka yafumanga munoli nu kupozya onsi.

Ulongo na kalanda

²⁰ Lyene Yesu acelecensya pa alondezi avwanga ati, “Alongo amwemwe mwe apina. Pano Uwene wakwe Leza uwa kwinu!

²¹ “Alongo amwemwe mwe munomuli ni nzala ndakai. Pano mulikuta! Alongo amwemwe mwe muno mukulosya ndakai. Pano mulatekeziwa!

²² “Alongo amwemwe ndi antu yamupata, yamukana, yamutuka, yavwanga yati mwemwe yaipe pamulandu wa kulondela Mwana wa Muntu.

²³ Ndi ci cacitika mwazanga cuze nu kucina, pamulandu wakuti cilambu cinu cino casungwa mwiyulu icikulu. Pano vivyo kwene avino ni vikolwe vyao vyacisile na kuli yakasema.

²⁴ “Lelo kalanda kuli mwemwe mwe akama. Pano mwemo mwapokelela mpiti upemwilo.

²⁵ “Kalanda kuli mwemwe mwe muno mukwikuta ndakai. Pano mulaya ni nzala. Kalanda kuli mwemwe mwe muno mukuseka ndakai. Pano mulaya nu ulanda nu kulosya.

²⁶ “Kalanda kuli mwemwe ndi antu yonsi yamuvwangila visuma. Pano vivyo kwene avino ni vikolwe vyao vyavwangile antu aufi yano yakailanda ukuti yene akasema.

Temwini anisi inu

²⁷ “Lelo mwe muno mukunguvwa namunena nati, temwini anisi inu, nu kucita cisuma kuli yano amupata.

²⁸ Polelelini yano akumutipwila nupya pepelini yano akumucuzya.

²⁹ Muntu umwi ndi wakuma pitama lyonga, leka akume nu kulyuze kwene. Muntu umwi ndi watola ikoti lyako, leka atoole ni laya kwene.

³⁰ Pela kuli wensi wakulenga icintu cimwi. Muntu umwi ndi watola icakwako, utamuzya kuti akuwezezye.

³¹ Vino mungatemwa kuti antu yamucitile avino namwe kwene mwayacitila.

³² “Ndi mwatemwa sile antu yano amutemwa, uzye icilambu cii cino mungapokelela? Nga vino na yakaifya kwene yakatemwa yano ayatemwa!

³³ Nanti ndi mwacita cisuma sile kuli yano akamucitila visuma, uzye icilambu cii cino mungapokelela? Nga vino na yakaifya kwene yakacita cili conga.

³⁴ Lyene ndi mukwazima sile yano mukupaalila kuti yalamuwezezya, uzye icilambu cii cino mungapokelela? Avino na yakaifya kwene yakaazimana, kuti yace yapokelele ivilingine.

³⁵ Lelo temwini anisi inu nu kuyacitila visuma. Nupya mwakongwesya kwaula kupaalila kupokelela cimwi kunoyali. Lyene mulakwata icilambu cikulu, nupya mulaya ana yakwe Leza uwa papelapela. Pano wene akacita visuma kuli yano asitaizya na aipe kwene.

³⁶ Muye na mizu wakwe vino So uwa mwiyulu waya na mizu.

Mutapingula auzo

³⁷ “Mutapingula auzo, nga Leza nawe atalamupingula. Mutavunuka auzo, Leza nawe atalamuvunuka. Mwaelela auzo, namwe Leza alamwelela.

³⁸ Pelini, namwe mulapelwa. Mulapelwa cilingilo cisuma cisindelwe, cakuti musakatile. Pano cilingilo cino mukalingila auzo, acino namwe Leza alamulingila.”

³⁹ Lyene Yesu ayanena mulumbe ati, “Uzye impafu ingatungulula impafu yuze? Uzye zyoili kwene zitangaponela mu ciwina?

⁴⁰ Pasi mulondezi angaluta kasambilizya wakwe, lelo wensi uwamala masambililo yakwe, alaya wakwe kasambilizya wakwe.

⁴¹ “Pacani ukulolekesya akakona akali mwi linso lya munyonko, lelo utasakamile mulando uli mwi linso lyako?

⁴² Uzye ungavwanga uli ku munyonko uti, ‘Mwinane, leka nkusisizye kakona mwi linso lyako,’ lino wemwisikulu utaweni mulando uli mwi linso lyako? We musomvi we! Utale usisye mulando uli mwi linso lyako, alino umalola ningo pa kufumya akakona akali mwi linso lya munyonko.

Umuti ni vizao vyauko

⁴³ “Umuti usuma utangaseeka vizao viipe, nu muti uwipe utangaseeka vizao visuma.

⁴⁴ Umuti onsi ukamanyika ku vizao vino ukaseeka. Pano antu yasikulula masamvu kufuma ku munga nanti kukulula matingi kufuma kuli nkololwe.

⁴⁵ Muntu musuma akafumya vintu visuma pamulandu wa visuma vyaya mu mwenzo wakwe. Muntu mwipe nawe akafumya vintu viipe pamulandu wa viipe vyaya mu mwenzo wakwe. Pano mulomo ukavwanga vintu vizile mu mwenzo.

Yakakuula ya ng'anda yaili

⁴⁶ “Pacani mukungama mukuti, ‘Mwene, Mwene,’ lelo musikulondela vino nkumunena?

⁴⁷ Wensi akaiza kunondi nu kuvwa mazwi yane nu kuyela, namamulanga cino wakolanako.

⁴⁸ Wene wakolana wa muntu wino pa kukuula ing'anda yakwe wimvile mufula uzike, nu kukuula ing'anda yakwe pa lwala. Lyene mulamba aiiza nu mukuku, apuma ing'anda ilya, nayo itatensiwe pano yakuuzilwe ningo.

⁴⁹ Lelo wensi akauvwa mazwi yane nu kuntayela wene wakolana wa muntu wakuuzile ing'anda kwaula mufula. Lyene lino mulamba wapuma ing'anda ilya yene ipona papo kwene, nu kupona kwakweyo kwali ukukulu cuze!”