Kufuma 36 - Amazwi Yakwe Leza 2013

¹ “Lyene Bezalele, Ooliyabu pamwi na amanya imilimo yonsi yano Yawe watapeela kwiluka nu kumanya imilimo nga na mano akumanya kupanga vikulondekwa vyonsi vya kukuulila Itaalu lyamuzilo, yamapanga vyonsi wakwe vino Yawe wapeezile ilamulo.”

Antu yaleta amawila avule

² Lilyo kwene Mose aama Bezalele, Ooliyabu na yonsi amanya imilimo yano Yawe wapeezile amano nupya na yonsi aiteinye kwazwilizya.

³ Lyene Mose ayapeela amawila yonsi yano aina Izlaeli yalesile a kukuulila Itaalu lyamuzilo. Lelo aina Izlaeli yatwalilila ukupeela Mose amawila akuitemelwa cila katondo.

⁴ Lyene yafundi ya milimo yonsi yano yaombanga imilimo ya kukuula Itaalu lyamuzilo, umuntu wensi kulingana na vino wamanya, yasya imilimo yao,

⁵ yaya yanena Mose yati, “Antu yakuleta viombelo vya milimo ii vivule, ukuluta pali vino vikulondekwa pa kuomba imilimo ino Yawe wapeela ilamulo kuti iombwe.”

⁶ Caleka Mose apeela ilamulo ku antu mu nsakwe monsi ati, “Monsi ali wensi, nu mwanaci ali wensi, ataleta nupya amawila yakukuulila Itaalu lyamuzilo.” Caleka antu yata ukuleta amawila.

⁷ Pano vino Mose wakolonganike vivula ukuluta vino vyalondekwanga pa kumalila imilimo ilya.

Kupanga kwi Taalu

⁸ Lyene aonsi yonsi alamoke amu ina Izlaeli yano yamanya imilimo iyapanga Itaalu ni nsalu ikumi zyakucingilikizya zya cifungo nupya zipangwe ningo, alino ni nsalu ziswepulukile, zyacifuvya, nga ni ziyenzu. Pa nsalu zyonsi zizi, iyapikula yakelubi.

⁹ Mu utali wa cila nsalu yakucingilikizya mwali amamita ikumi na yaili alino mu wipi wakwe cila nsalu mwali pipi na mamita yaili. Insalu zyonsi zyali zikolane mu cipimilo.

¹⁰ Lyene yasumilila insalu zyakucingilikizya zisano kuti iye insalu yonga. Nupya yatoola insalu zyuze zisano yasumilila kuti iye insalu yonga.

¹¹ Pacisila cakwe cii, yasuma mikowelo ya tusalu twa cifungo mu mbali ya nsalu yonga lwa kunzi. Lyene iyacita cili cimwi nu ku nsalu yakutandika, nupya yasuma mikowelo yuze.

¹² Yasuma mikowelo amakumi yasano ku nsalu yakutandika, nupya yasuma mikowelo yuze amakumi yasano ku nsalu yuze yakwe cili. Mikowelo yaku nsalu yakutandika ilolesyanya ni mikowelo yaku nsalu yakwe cili

¹³ Lyene nupya yapanga tukoweko amakumi yasano twakulundinkanyizizya, twakwe zaabu. Yalundinkanya insalu zyakucingilikizya zizi ziili nu tukoweko. Lilyo kwene Itaalu lya Ukongano lipangwa.

¹⁴ Lyene yasumilila insalu zyakucingilikizya ikumi na yonga zya mavumbu ya mbuzi, yapanga cakuvimbila papela yi Taalu.

¹⁵ Mu utali wakwe cila nsalu yakucingilikizya mwali amamita ikumi na yatatu, alino mu wipi wakwe cila nsalu mwali pipi na mamita yaili. Insalu zyonsi zyali zikolane mu cipimilo.

¹⁶ Lyene yasumilila insalu zyakucingilikizya zisano ziya insalu yonga, nga yasumilila insalu zyuze mutanda ziya insalu yonga.

¹⁷ Nupya yasuma mikowelo amakumi yasano mu mbali ya nsalu yakutandika, nga yasuma mikowelo yuze amakumi yasano mu mbali ya nsalu yuze iiya yakwe ciili.

¹⁸ Pacisila cakwe vii, yapanga tukoweko amakumi yasano twa mukuwa twakukowela, twakulundinkanyizizya insalu ziili kuti ziye cisalu conga cakuvimbila Itaalu.

¹⁹ Nupya yapanga cakuvimbila na cuze iciyenzu ca mikwela yakwe yasuuku. Pakumalila nupya yapanga cakuvimbila na cuze ca mikwela inyuke, cakuvimba papela yakwe vyonsi vyakuvimbila.

²⁰ Lyene yapanga amafulemu yi Taalu ni mbao zya muti wa akasya.

²¹ Mu utali wakwe cila fulemu mwali amamita yani na citika alino mu wipi wakwe cila fulemu mwali masentimita amakumi mutanda na mutanda.

²² Imbao ili yonsi yali ni vyakulundinkanyizizya viili, kuti vilundinkanye amafulemu pamwi. Wene wapangile amafulemu yonsi vyakulundinkanyizizya vii.

²³ Yapanga amafulemu amakumi yaili aku ntunga yaku kaeya ki Taalu, ni vikalilo vyakusimpamo impanda,

²⁴ ni vikalilo amakumi yani vyakwe siluva vyakusimpamo mpanda, vya mafulemu amakumi yaili, ni vikalilo viili pansi yi fulemu lyonsi, ivyali ni vyakulundinkanyizizya vivi.

²⁵ Ku ntunga yaku katutu ki Taalu nako yapanga amafulemu amakumi yaili,

²⁶ nga ni vikalilo vya mafulemu amakumi yani vyakwe siluva. Cila fulemu lyali ni vikalilo viili.

²⁷ Yapanga amafulemu mutanda aku lukungu lwi Taalu, lwaku uwondaka,

²⁸ nga na mafulemu yaili amu matungi.

²⁹ Amafulemu yaa yaili amu matungi yaya, yali alekane pansi, lelo alundinkanyiziwe papela kufika ku tukowelo twakutandika tutu. Vii, avino amafulemu yaili yaye yano yapanga matungi yaili.

³⁰ Caleka pali amafulemu cinani nga ni vikalilo vyakwe siluva ikumi na mutanda, vikalilo viili pansi yakwe cila fulemu.

³¹ Lyene yapanga mpanda ku mbao zya muti wa akasya, zisano zya mafulemu aku mbali yonga yi Taalu.

³² Zisano nazyo ziye ku mafulemu aku mbali yuze. Nupya paye mpanda zisano zya mafulemu aku mbali yaku uwondaka, lukungu lwi Taalu.

³³ Lyene yapanga lupanda lwapakasi, lwikwa pakasi na pakasi ya mafulemu, lutungilila amafulemu yonsi, ukufuma kumbali yonga yi Taalu mpaka kufika nu kumbali yuze.

³⁴ Amafulemu yonsi yayengelela na zaabu, nupya yayasomeka mu mipeto yakwe zaabu pakuti yatungilile mpanda zizi. Mpanda nazyo kwene yazyengelela na zaabu.

³⁵ Lyene yapanga insalu yakucingilikizya ya cifungo, ni iyenzu alino na yakwe bafuta mutelepe nupya mupangwe ningo. Lyene yapikula yakelubi kweneko.

³⁶ Yapanga incesi zini zya muti wa akasya nga yazyengelela na zaabu. Tukowelo twaziko twali utwakwe zaabu, nga yazipangila vikalilo vini vyakwe siluva vyakuzitungilila.

³⁷ Pa mulyango wa kwingilila mwi Taalu yikapo insalu yakucingilikizya ya cifungo, iyenzu, nga na yakwe bafuta mutelepe, mupangwe ningo, nupya mupetwe ningo mumbali.

³⁸ Lyene yapanga incesi zisano yikako nu tukowelo twakukowela insalu ilya, lyene papela ya vimuti nga ni mpanda zyonsi yengelela na zaabu, lelo vikalilo vyakwezyo yapanzile vya mukuwa.