Kufuma 16 - Amazwi Yakwe Leza 2013

Mana ni nkwale

¹ Pacisila cakwe vii iuvi lyonsi lya ina Izlaeli ilitenuka ilifuma ku Elimu. Pa wanda uwalenga ikumi na yasano mu mwezi wakwe ciili ukufuma lino yafumile mu Eguputo iyafika ku Lwanga lwa Sinai. Ulwanga lulo lwaya pakasi kakwe Elimu nu Mwamba wa Sinai.

² Mumu mu lwanga iuvi lyonsi likatuka liilizyanya kuli Mose na Aloni.

³ Liyanena liti, “Ngani cazifile kuti Yawe aleke tufwile mu Eguputo. Kuku twalyanga inyama ni vyakulya vyuze tukwikuta. Lelo mwatuleta mu lwanga kuti swensi tufwe ni nzala.”

⁴ Lyene Yawe anena Mose ati, “Ndakai namalenga kuti ivyakulya vinu mwensi vipone wa mvula ukufuma mwi yulu. Antu yalinzile yafuma yaya yakolonganika ivyakulya nu kusenda vyakulingana nu kulya kwa wanda onga. Mu nzila kwene ii ningamanya ndi antu yangalondela malamulo yane.

⁵ Pa wanda uwalenga mutanda antu yalinzile kukolonganika nu kuteyanya ivyakulya vya manda yaili.”

⁶ Caleka Mose na Aaloni yanena aina Izlaeli yonsi yati, “Ilelo manguzi mumamanya ukuti Yawe ali wino wamufumizye mu Eguputo.

⁷ Mutondo katondo mulalola uluswepo luyengese lwakwe Yawe. Pamulandu wakuti swemo akatutuma sile kuti tumunene malamulo yakwe, nga kuilizyanya kwinu kwatikuvwika kunoli, endi kunoli.”

⁸ Lyene Mose atwalilila kuvwanga ati, “Yawe ali wino alamupeela inyama zyakulya cila manguzi nu kumupeela umukate uvule cila katondo pano Yawe atauvwa kuilizyanya kwinu kunoli. Nga naswe sweswe yaweni? Lino mukuilizyanya kuli sweswe ala mutakucita cico kunotuli, lelo akuli Yawe.”

⁹ Mose anena Aaloni ati, “Nena iuvi lyonsi lya ina Izlaeli ilyati likongana, kuti lipalamile kuli Yawe, pamulandu wakuti Yawe watauvwa kuilizyanya kwao.”

¹⁰ Lino Aaloni akunena iuvi lyonsi lya ina Izlaeli, nalyo ilisenukila ku lwanga, nga ililola uluswepo luyengese lwakwe Yawe mwi kumbi.

¹¹ Yawe anena Mose ati,

¹² “Natinuvwa kuilizyanya kwa ina Izlaeli. Yanene ukuti lino ilanzi lyatilyawa yamapokelela inyama zyakulya, nga na katondo yalapokelela umukate wakulya iikute. Lyene yalamanya ukuti Nene, ne Yawe, nene indi Leza wao.”

¹³ Manguzi kwene yalya mukumbi wa nkwale wiza uwa nu kulimba cifulo ca nsakwe consi. Katondo nako kuya lumi kuzinguluka cifulo ca nsakwe consi.

¹⁴ Lino lumi lwasila mu lwanga pa musili paloleka tuntu tumwi tunyale nupya tupapatane ngati amamba nupya tutiswe ngati akungwi wino ali pansi.

¹⁵ Lino aina Izlaeli yacilola yatacimanyile foo, nga yauzyanya yati, “Uzye cii icani?” Mose aasuka kunoyali ati, “Cii icakulya cino Yawe watapeela kunomuli kuti mulye.

¹⁶ Yawe watapeela ilamulo kuti cila muntu akolonganike cipimo icingalingana na makilogalamu yaili, akulingana cila muntu.”

¹⁷ Aina Izlaeli iyacita wakwe vino yanenyilwe. Yamwi yakolonganika twingi, lelo yamwi tunono.

¹⁸ Lelo lino yapima pa cipimilo ca makilogalamu yaili yalola ukuti yano yakolonganike twingi tutalusile pa cipimilo, na yano yakolonganike tunono tutacefile foo. Cila muntu wakolonganike kulingana na vino walondanga.

¹⁹ Lyene Mose ayanena ati, “Kusi umuntu nanti umwi wakuti asunge vilyo vii kufika mutondo katondo.”

²⁰ Lelo yamwi munoyali yatasakamile vino Mose wavwanzile, iyasunga ivyakulya vimwi kufika katondo. Nga lino kwaca iyalola ukuti vyonsi vyativiola, muli ni ngonyo nupya ala vikununka. Cii cilenga kuti Mose asokele antu.

²¹ Lyene katondo umuntu wensi akolonganika kulingana nu kulonda kwakwe. Lelo ndu musanya wawala, kwakaya, vino vyasile pansi visunguluka.

²² Pa wanda uwalenga mutanda yakolonganika ivyakulya kulingana maila yaili, cila muntu malita yani. Alino intunguluzi zyonsi zya ina Izlaeli ziza zinena Mose pali cii.

²³ Alino Mose azinena ati, “Yawe watapeela ilamulo ukuti mutondo uwanda wa kupuza, uwanda wi Sabata uwapaatulwa kuli Yawe. Mupange umukate onsi uno mukulonda, nupya mweleke consi cino mukulonda kweleka. Ivyasyala muvisunge pa mbali mpaka mutondo.”

²⁴ Antu iyacita wakwe vino Mose wapeezile ilamulo. Iyasunga ivyasyala mpaka katondo, lelo kwaula kuti vyononeke nanti kuola. Nupya vitakweti ingonyo foo.

²⁵ Mose anena antu ati, “Ilelo lini vikwene, pano ilelo uwanda wi Sabata, uwanda wakupuza uwapaatulwa kuli Yawe. Ilelo mutakuyazana cakulya kunzi ya nsakwe.

²⁶ Mulinzile mwakolonganika ivyakulya mu manda mutanda. Lelo pa wanda uwalenga cinimbali, uwanda wa kupuza, ivyakulya visiizanwako.”

²⁷ Pa wanda uwalenga cinimbali antu yamwi yaya kukukolonganika ivyakulya, lelo yatavizanyile.

²⁸ Lyene Yawe auzya Mose ati, “Uzye kufika insita cii lino mumakana kuyela malamulo yane?

²⁹ Mwiusye ukuti Nene, ne Yawe, namupeela uwanda wi Sabata. Cili cino pa wanda uwalenga mutanda nkamupeela ivyakulya vivule vya manda yaili. Muntu wensi alinzile aikala kunoli pa wanda uwalenga cinimbali. Atafuma pa ng'anda yakwe.”

³⁰ Caleka antu yataombanga imilimo pa wanda uwalenga cinimbali.

³¹ Aina Izlaeli yatemela ivyakulya vivi izina yati, “Mana.” Mukuloleka mana walolekanga ngati tupece twa nkona, nupya tutiswe. Ndi walya utulyompe ngati umukate wa mpanda upapatale uno yapangila nu uci.

³² Lyene Mose avwanga ati, “Yawe watapeela ilamulo kunotuli kuti tusunge mana umwi pakuti aizikulu itu yakalole cakulya cino Yawe watupile kuti tulye mu lwanga lino watufumizye mu Eguputo.”

³³ Mose anena Aaloni ati, “Tola inyungu, itilamo mana wakulingana na malita yaili. Ndi wacita vivyo umwike pa manso yakwe Yawe pakuti mana wiyo asungwe na kuti aizikulu inu yace yamulole.”

³⁴ Wakwe vino Yawe wapeezile ilamulo kuli Mose, Aaloni aiika inyungu ku nkolelo ya Mbokosi ya Upangano, pakuti mana angasungwa.

³⁵ Aina Izlaeli yalyanga mana pa myaka amakumi yani, mpaka lino yafisile ku mpanga ya Kenani, kuno yaile yikala.

³⁶ (Cipimilo cino caomviwanga mwingilanga inteko kulingana na malita amakumi yaili.)