Galatiya 4 - Amazwi Yakwe Leza 2013

¹ Lelo ndakai nkulanda vii, mwana wino alapyana vyakwe isi, lino acili umwance yakamucita wa muzya nanti angala wene ali mwine wakwe vyonsi.

² Lino acili mwance, akauvwila yao akumusunga nu kutungulula vyonsi vili pali aliwe, kufika na pa nsita ino akwasi yakwe yateyanya.

³ Vii, avino cali na kuli sweswe. Twali wa ana atungululwanga na masambilizyo ya ntambi zya nsi.

⁴ Lelo lino nsita yafisile Leza watumile Mwana wakwe, uwizile avyalwa ku mwanaci. Mwana kwene wii wayelanga Masunde yakwe Mose

⁵ pakuti akulule onsi ali azya ya Masunde yakwe Mose na kuti tuye ana yakwe Leza.

⁶ Leza watumile Mupasi wa Mwana wakwe mu myenzo itu, pakusininkizya ukuti sweswe ana yakwe, Mupasi wino akati, “Abba, Tata wane.”

⁷ Caleka, utacili muzya lelo wewe mwana. Nga ndi wewe mwana wakwe Leza, ale wene alakupeela vyonsi vino walaya ana yakwe.

Paulo wasakamala aina Galatiya

⁸ Lino mutamanyile Leza mwemo mwali azya ya tuluwi tutali tuleza.

⁹ Lelo ndakai mwamanya Leza, nga kuluta pali cii, Leza nawe wamumanya. Uzye lyene mungaswilila uli ku kutekwa uzya ni ntambi zya nsi zisi na muzano nupya zikalenga insonyi?

¹⁰ Mwemo mukazevya nu kucindika manda, myezi, tusita nga ni myaka imwi.

¹¹ Nemo nati nsakamikwa pamulandu namwe! Uzye ale limwi ukuomba kwane pakasi kinu ukwasilesile?

¹² Inane, nkumupapata kuti muye wakwe nene, ndi vino nani kwene ndi wakwe mwemwe. Mwemo mutancitile ciipe nanti cimwi lino nkolelo nakosozile kunomuli.

¹³ Wakwe vino mumanyile lino natandike kukosola Ilandwe Lisuma kunomuli nali nene mulwale.

¹⁴ Nanti angala kulwala kwane kwamusakamike, mwemo mutampasile nanti kunkankamba. Lelo mwanzengile kwati namanye nene mungeli wakwe Leza nanti a Klistu umwisikulu kwene.

¹⁵ Mwali nu luzango cuze! Uzye lyene icani cacitike pa luzango lwinu? Nemo nkusininkizya ukuti ndi cingacitika, mwange muitonkole manso mu mpele.

¹⁶ Uzye lyene naya nene mwanisi winu pa kumunena cumi?

¹⁷ Antu yao akulanga ukuti yamusakamala cuze, mapange yao yasi yasuma. Yene yakulonda sile ukumitalusya kunondi pakuti namwe muyasakamale.

¹⁸ Lyonsi caya cisuma kusakamala cintu campomvu, nanti pa nsita ino nsi namwe.

¹⁹ Mwe ana yane akundwe! Nupya kwene, wa kuwaika kwa muumbuza, avino nani kwene nkuuvwa pamulandu winu, usuke mwata wakwe Klistu uye munomuli.

²⁰ Cange cizipe nemo nje pamwi namwe, lyene nange ndonde umwakuvwangila kunomuli. Nemo mwampezya mano.

Cilangililo cakwe Haga na Sala

²¹ Yamwi munomuli yangatemwa kuteekwa uzya na Masunde yakwe Mose. Uzye mutamanya vino Masunde yakalanda?

²² Malembelo yakati Abulaamu wakweti ana aonsi yaili. Mwana wenga wavilwe ku mwanaci uwali muzya, nga nu muze wavilwe ku mwanaci uwali muntungwa.

²³ Mwana wa mwanaci uwali muzya wavilwe mu musango uno onsi yakavyalwa. Lelo mwana wa mwanaci uwali muntungwa wene wavilwe pamulandu wa ulayo wakwe Leza.

²⁴ Vii vyonsi vikweti cino vikusenula. Cila wenga uwamu anaci yaa yaili, akwimilila upangano. Haga akwikilila upangano uwacisilwe pa Mwamba wa Sinai. Ana yakwe azya

²⁵ Haga, wino akwimilila Mwamba wa Sinai mu Alabya, wene icikope ca musumba Yelusalemu ulipo ndakai, uno uli mu uzya pamwi na antu yonsi aikala mwenemo.

²⁶ Lelo Yelusalemu wa mwiyulu umuntungwa, nupya wi kwene ali mayo witu.

²⁷ Pano calembwa mu malembelo cati, “Zanga, we ng'umba! Umila kapundu, we muno utatala wawaika mu umbuza! Lelo ulakwata ana aingi kuluta ana ya mwanaci wino iya atatala amusye.”

²⁸ Inane, ndakai mwemwe ana yakwe Leza avyalwa pamulandu wa ulayo wakwe, ndi vino Isaki wavilwe.

²⁹ Pa nsita ilya, mwana uwavilwe mu musango uno onsi yakavyalwa watandike kuzunya mwana uwavilwe ku maka ya Mupasi wakwe Leza. Cili cimwi kwene cikucitika ni lelo.

³⁰ Uzye malembelo yakati uli? Yene yakati, “Zinga mwanaci muzya pamwi nu mwana wakwe? Pano mwana wakwe atalapyana nanti conga pa vintu vyakwe isi. Lelo mwana uwamu mwanaci muntungwa wene alapyana vyonsi.”

³¹ Caleka mwe inane, swemo tusi ana ya mwanaci muzya, lelo sweswe ana ya mwanaci muntungwa.