Ezila 1 - Amazwi Yakwe Leza 2013

Kilusi wapile Ayuda ilamulo lya kuswilila ku Yelusalemu

¹ Umu mwaka wakutandikilapo uwa kuteeka kwakwe Kilusi umwene waku Pesya, izwi lyakwe Yawe lyafikiliziwe lino kasema Yelemiya wavwanzile. Lyene Yawe aleka Kilusi mwene waku Pesya akuntikilwa pakuti anguma imbila mu mpanga yakwe yonsi nu kulemba yakalata umwali amazwi akuti,

² “Lii ilamulo lyakwe Kilusi, umwene waku Pesya. Yawe, Leza wa kwiyulu, watampela amaka akuteeka impanga yonsi. Watanena ukumukuulila Ng'anda ikulu uku Yelusalemu mu mpanga yakwe Yuda.

³ Umuntu ali wensi uwamu antu yakwe, si Leza angaya nawe. Lekini aye ni nsambu iya kuswilila kumwao ku Yelusalemu, umu mpanga yakwe Yuda, aye akakuulile Yawe Ng'anda ikulu, Leza wino yakapepa mu Yelusalemu.

⁴ Wiyo wensi acili nu umi konsi kuno angazanwa, antu yano wikala nayo yamupele icuma icili wakwe siluva na zaabu. Yike penepo ni viteekwa nga ni vya mawila vino angaya akapele mu Ng'anda ikulu yakwe Leza ku Yelusalemu.”

⁵ Lyene intunguluzi zya ng'anda zya mitundu yakwe Yuda na Benjamini, yasimapepo na ina Levi, iyakatuka pamwi nu muntu wensi wino wakuntikilwe na Leza iyaiteyanya ukuya ku kukuula cipya cipya Ng'anda ikulu yakwe Yawe uku Yelusalemu.

⁶ Na inipamba yao nayo iyayazwilizya ukuyapeela ivintu vyalondekwanga ivili wakwe siluva na zaabu, ni viteekwa pamwi ni vyuma vyuze vya mucinzi vino yangapeela nu mwenzo wao onsi.

⁷ Ukulunda pali cico, umwene Kilusi ayawezezya ni viya vyonsi ivyamutengo, ivyali mu Ng'anda ikulu yakwe Yawe, vino Nebukadineza wasenzile ukufuma mu Yelusalemu, nu kwiza viika umu ng'anda ikulu yakwe tuleza twakwe.

⁸ Kilusi kateeka waku Pesya avipela kuli Mitiledati kasunga wa cipao, nga nawe avipela kuli Syesyibaza intunguluzi yamu mpanga yakwe Yuda.

⁹ Impendwa ya viya vyatantikwe ndi vii: imbale zyakwe zaabu zyali amakumi yatatu (30), imbale zyakwe siluva zyali izimbi lyonga (1,000), utumbale tuze nato twali amakumi yaili na fundimbali (29).

¹⁰ Imbale zyakwe zaabu zinono nazyo zyali amakumi yatatu (30), imbale zyakwe siluva zinono nazyo zyali imyanda ini ni ikumi lyonga (410). Ni viya vyuze navyo izimbi (1,000).

¹¹ Fwandi iviya vyonsi pamwi vyakwe zaabu na vyakwe siluva vyali amazimbi yasano ni myanda ini (5, 400). Avili vino Syesyibaza wawelulwike navyo ukufuma ku uzya mu Babiloni avileta uku Yelusalemu.