Ezekelo 38 - Amazwi Yakwe Leza 2013

Leza wakatusya Gogi umwene waku Magogi

¹ Nupya Yawe avwanga kunondi ati,

² “We mwana wa muntu, unenole Gogi, waku mpanga ya Magogi, kateeka mukalamba waku musumba wa Mesyeki nu wa Tubali, nga umupele umulandu.

³ Umunene uti, Yawe Simwandalali walanda wati, natinja umwanisi wako, we Gogi, kateeka mukalamba wa musumba wa Mesyeki nu wa Tubali.

⁴ Ndakuseleula, nu kukuswela na maswelo mu vyamvu vyako, wewe pamwi ni mpuka yako ya vita ikulu, ni mfwalasi pamwi na yayo akakwelapo. Yonsi kwene yalasenda ivisyangu vyao ivikulu ni vinono, na malupanga yao.

⁵ Ivita vyaku Pesya, nu ku Kusyi nu ku Puti, vili pamwi na alio. Yonsi kwene yakweti visyangu ni vimpompo vya nkondo.

⁶ Ivita vyonsi vyaku mpanga ya Gomeli ni ya Togalima lwaku katutu vili pamwi na aliwe, ukwikapo na antu ukufuma ku mpanga zyuze izivule zya kutali.

⁷ Zwalilini, muiteyanye ningo, we mweneco pamwi ni vita vyako vyonsi, ukwika penepo na antu yonsi yano yakolongine ukwako apakwiza ntumika.

⁸ Ndi papita amanda aingi, kulaya insita imwi ino ndakupeela isunde lya kuzanza impanga imwi, muno antu yaikalila uku matwi cele ukwaula inkondo, ukutandikila sile pano antu yakolonganile ukufuma umu mitundu yuze iingi, nu kwiza muno myamba yamu Izlaeli, ino yasiile amapooli apa nsita ntali.

⁹ Alino lyene ulakatuka nu kwiza wa cipunga. Ulavimbilikizya impanga wi kumbi, wewe kwene, ivita vyako vyonsi ni mitundu iingi pamwi nawe.

¹⁰ Vii ivyalanda Yawe Simwandalali kuli Gogi, apa wanda ulya, amelenganyo yaliza umu mano yako, nu kuteyanya ulateyanya amapange aipe.

¹¹ Ulalanda ukuti, namakatukila impanga ino itacingililwa, namazanza antu yaa yano yaikalila ku matwi cele, umu misumba ino itakwata amalinga, imilyango nanti mipikilizyo.

¹² Ndayasampa ivyuma nu kuvisenda. Ndalwisya na matongwa umwiza mwikalamo antu nu mutundu uno wakolongine ukufuma umu mitundu, uno ukateeka iviteekwa nu kucita ivya uculuzi, uwikala apa cifulo cimwi cikalamba pano nsi.

¹³ Aina Syeba, Dedani, aculuzi aku Tasyisyi nga nu tumizi tonsi utwamuzinguluka yalakuuzya yati, ‘Uzye watwizila sile umu kutusampa ivyuma? Uzye wakolonganika ivita vyako apa kutupokolola sile ivyuma nu kutusendela zaabu na siluva, iviteekwa ni vya uculuzi vyuze ni vyuma vyuze nyanya?’ ”

¹⁴ Icaleka fwandi, we mwana wa muntu, sesemela Gogi, umunene ukuti, Yawe Simwandalali wati, “Mu wanda ulya, lino antu yane yalikala mutende, uzye kwene umu cumi, utalapanga ukukatuka?

¹⁵ Ala, ulakatuka uku cifulo cako icayela ukutali uku katutu, we mweneco kwene pamwi ni mitundu iingi iyayela kunuli. Mulapita mwensi apa mfwalasi, iumba ilikalamba ilya vita ivitanga pendwa.

¹⁶ Uliza uzanze antu yane aina Izlaeli, ulakolana ni kumbi ilyati livimbilikizya impanga. Amanda kwene yayo, anene ndakuleta we Gogi, ukukwiza lwisya impanga yane, apakuti imitundu ikamanye, lino ndalanga ucindami wane pa manso yao muli wewe, we Gogi.

¹⁷ Yawe Simwandalali wavwanga wati, ‘Awewe navwanzile umu nsita yampiti, lino aomvi yane yakasema amu Izlaeli, yasesime umu manda yalya, iyasowela ukuti ulayizila.’ ”

Leza alafulula Gogi

¹⁸ Mu wanda ulya, lino Gogi alazanza impanga ya Izlaeli, icipyu cane cilalunkuma wa moto. Ivyalanda Yawe Simwandalali.

¹⁹ Umu cipyu cane, mu uzuwa wane, nu mu ukali wane navwanga nati, “Nalapa ndi vino umu wanda ulya mulaya icimvulunganya wakwe cimwi umu mpanga ya Izlaeli.

²⁰ Inswi zya muli yemba, ivyunyi vya mwiyulu, inyama zya mpanga na vyonsi ivikasela pansi, na antu yonsi pano nsi yalazakaza uku ntete pa mulola wane.

²¹ Imyamba ilaongololaka, ivilimba vya vimawe vilamokoka na malinga yonsi yalapona pansi. Ndamuletela ivya kumoofya ivya misango ni misango. Ivyalanda Yawe Simwandalali. Antu yakwe yalakomolana uku vipanga vyao kwene.

²² Ndamupezya uku mpungo. Nupya ndaleka ukuti kukaye uwanisi uwa kuzwisyanya uwazi. Umweneco kwene Gogi, pamwi ni vita vyakwe, na antu ya mitundi iingi yano yalaya nawe, yonsi ndayatumila icifutika ni mvula ya mawe, nu munyeswa nga na yamunyela ya moto.

²³ Ali vino nemo ndalanga antu ya mitundu yuze ukuti nene mukulu, nupya nene mucindami. Ali lino antu yalasininkizya ukuti fwandi nene, indi Yawe.”