Ezekelo 37 - Amazwi Yakwe Leza 2013

Amafupa aume imisakalala yalaya nu umi

¹ Nemo ne Ezekelo nuvwile amaka yakwe Yawe yanjizila, nu mupasi wakwe ali pakunsenda antwala nu mucifoloma umwazile amafupa ya antu.

² Alino Leza ampisya umu mbali ya cifoloma consi, nani ndola ukuti muli amafupa ya antu nyanya, nayo aume nswakala.

³ Alino anguzya ati, “We mwana wa muntu, uzye umu mafupa yaa mungaswililamo nupya uumi?” Nga nani naasuka inti, “Musambazi, angamanya awewe.”

⁴ Alino anena ati, “Sesemela amafupa yaa amazwi yane. Nena amafupa yaa aume yuvwe amazwi yane ne Yawe.

⁵ Yanene ukuti ne Yawe nkuyanena ndivino namayaputilizya umupu wane nu kuyawezezyamo uumi.

⁶ Nemo namafupilizya imikole iminyefu alino ni nkanda. Namaputilizyamo umupu nu kuyawezezya uumi. Alino lyene mumasininkizya ukuti nene indi Yawe.”

⁷ Fwandi lyene nani ali pa kusesema ndi muno anenile. Akula sile lino nasesema amazwi yakwe Leza, awe mukwai nuvwa amafupa kuno yakulila na palakata palakata, yatandika nu kulundinkana.

⁸ Lino ncili nkulolekesya, awe mukwai amafupa iyaya ni milimba, iminyefu ni nkanda. Lelo ukwaula kuti imiili ilya yafuta.

⁹ Alino Leza anena ati, “We mwana wa muntu, sesemela umuza amazwi yane. Nena umuza ukuti, ne Yawe inku ukonkomezya ukuti utunke monsi monsi nu kwiza putilizya umu vyala apakuti vyafuuta nupya.”

¹⁰ Fwandi nani ali pakusesema ndimuno nenilwemo. Awe nu mupu wingila umu vyala, na antu yazyuka, yakatuka, imilila nu kwimilila. Nalyo lyali iumba ilikulu, pasi paukulu.

¹¹ Alino Yawe anena ati, “We mwana wa muntu, ala aina Izlaeli yaya wa mafupa yaa. Yene yakati, ‘Swemo tuuma solokoto wa mafupa kwene yayo, nu upaalilo kutacikweti, foo; Twala twalowelela sile.’

¹² Fwandi, sesemela antu yane aina Izlaeli amazwi yane, yanene ukuti ne Yawe ndacenamika amalindi yao, nu kuyafumya mwenemo, nkayaswilizye mu mpanga ya Izlaeli.

¹³ Amalindi muno antu yane yalala lino ndayacenamika nu kuyafumya mwenemo, alino yalasininkizya ukuti fwandi nene indi Yawe.

¹⁴ Nemo ndayaputilizya umupu wane, ndayawezezya umi nu kuleka yaikala nu umi umu mpanga yao. Ali lino yalasininkizya ukuti fwandi nene indi Yawe. Nemo nalaya ukuti avino ndacita. Ivyalanda ne Yawe.”

Aina Izlaeli na ina Yuda yalaya nu wene uli onga sile

¹⁵ Nupya Yawe avwanga kunondi ati,

¹⁶ “We mwana wa muntu, tola intuwa ya cimuti, ulembepo nu kuti, ‘Uwene wa ina Izlaeli,’ na pa ntuwa yuze ukuti, ‘Uwene wa Ciyuda.’

¹⁷ Alino ulemenkanye intuwa zyoili umwi kufi apakuti ziye sile wa ntuwa yonga.

¹⁸ Lino aina Izlaeli yauzo yamakuuzya muno cii calola,

¹⁹ uyanene ukuti ne Yawe Simwandalali, ndatoola intuwa iyo iyalembwapo Izlaeli, nu kuilemenkanya pamwi naino yalembwapo Yuda. Ndazisangula intuwa yonga sile, nupya ndailemela sile umwikasa lyane lyonga.

²⁰ “Wemo lemenkanya intuwa zizyo ziili zino ulemvilepo. Uleke na antu yazilole.

²¹ Yanene ukuti ne Yawe ndafumya Aina Izlaeli umu mitundu ya yantu yauze muno yaya nu kuyakolonganika pamwi, nga alino nkayaswilizye umu mpanga yao.

²² Ndayuminkanya pamwi apakuti yakaye umutundu sile onga umu mpanga, umu myamba yamu Izlaeli. Yalakwata umwene sile wenga awino alayateeka, kutalaya nupya imitundu iili nu wene wao utalapatukana paili foo.

²³ Yatalaikowezya nupya uku tuluwi foo, nanti ukuikowezya uku vintu vyuze iviipe. Ndayapususya uku misango yao iipe ino yayalenganga ukwifya nu kunsangukila. Ndayazifya nayo yalaya antu yakwane sile, nani ndaya Leza wao.

²⁴ Umuomvi wane Davidi aliwe alaya umwene wao. Yonsi kwene yalateekwa kuli kateeka wenga sile. Yalatontela na masunde yane ukwaula untelengu.

²⁵ Yalaikala umu mpanga ino napiile umuomvi wane Yakobo, umwikalanga ni vikolwe vyao. Ali muno na eneco kwene yalaikala amanda pe pamwi na ana yao, kumwi ni vizikulula vyao kwene.

²⁶ Umuomvi wane Davidi ali wino alayateeka pee na pee. Ndapangana nayo upangano uwakuti yace yasininkizya ndi vino yalaikala amanda pe umu longo. Ndayasandulula pakuti yace yakaye nyanya, nupya nemo ndasonta ni ncende yonga iya kumpepelapo umu mpanga yao, nu kuyelelela ali muno ice iyelele pee.

²⁷ Tulaikalamo pamwi na alio, nupya nemo indaya Leza wao, nayo yalaya antu yane.

²⁸ Lino ndasontapo incende yonga iya kumpepelapo, ilaya lyonsi kumwao. Alino antu ya mitundu yuze yalasinikizya ukuti fwandi nene indi Yawe, naipaalwila nenga antu yane aina Izlaeli.”