Ezekelo 27 - Amazwi Yakwe Leza 2013

Ulwimbo lwa kulosya Tuli

¹ Yawe avwanga kunondi ati,

² “We mwana wa muntu, imba ulwimbo lwa ulanda ulukumile Tuli.

³ Nena Tuli, umusumba uwaya apa nkumba yakwe yemba, uno ukacita uculuzi na antu amitundu ivule yaku nko zivule aikala umu mbali ya luzi, uti, ‘Vii ivyalanda Yawe Simwandalali. We Tuli ukalanda ukuti wewe uli mufumaluke mukuyemba.’

⁴ Wikalo wako waya mukasi kasi muli yemba. Yakakuula yano yakukuuzile alenzile ukuti kuyemba kwako kuye kufumaluke.

⁵ Yene yakupangile ni mbao zya milemo amapaini ukufuma ku Senili. Yatozile ni mikelide ukufuma ku Lebani kuti yakupangile umupando.

⁶ Yakupangile inkafi uku mbao zya muoko ukufuma ku Basyani. Yakupangile umuputule wa wato uku mbao zyafumile ku nkumba yaku Saipulasi, nga yaiyemvya na mino ya nzovu.

⁷ Itanga lyako lyali ilya nsalu ipikolezye yakwe bafuta. Yene yafumile ku Eguputo, nupya yali ungati ili mendela yako. Itaalu lyako lya kuuwamo lyapangilwe ni nsalu zya cifungo ni ziyenzulukile, izyafumile ku nkumba yakwe Elisyaa.

⁸ Aina Sidoni na ina Alivadi ali yano yakufiyanga, ni ncenjezi zyako we Tuli, izyatungululanga uwato.

⁹ Munuli mwali na yakasinda ya mato aku Gebali akukusinsintila ivipongo vyako. Amato yonsi apali yemba na kuyapisya yizanga kunuli ku kukauzyanya vya uculuzi

¹⁰ “Aina Pesya, aina Lidya, na ina Puti, yingilanga mu maumba yako aulwi nu kuya ivita vyako.

¹¹ Aina Alivadi ni vita vyao yacingililanga amalinga yako ukuzinguluka, ni vita vyaku Gamadi vyalindanga na pa mpungu zyako. Yene yakowekanga ivisyangu vyao pa ng'umba zyako ukuzinguluka nu kuleka ukuti ukuyemba kwako kuloleke kumalilike.

¹² “Wemo mwacitanga uculuzi na ina Tasyisyi. Pa vyuma vyako ivitaivulila wemo walonkelangapo siluva, icela, na malata nga ni mitovwe.

¹³ Waculuzyanga mu Gilisi, nu mpanga ya Tubali, nu mu mpanga ya Mesyeki nga nu mu vyuma vyako walonkelangamo ivintu vya mukuwa.

¹⁴ Aina Beti Togalima yakukauzyanga imfwalasi zya milimo, ni mfwalasi zya nkondo, nga ni nyumbu zyakuculuzya.

¹⁵ Ana yakwe Dedani yaculuzyanyanga nawe, ni mpanga izivule zyamu nkumba yakwe yemba, yakulipilanga amino ya nzovu ni miti ya eboni.

¹⁶ Aina Edomu yacitanga uculuzi nawe pamulandu wa vintu wingi vino wapanganga. Yakuletelanga utumawe twamutengo twakwe emalodi, ni insalu iziyenzulukile, ni zipikulwe, ni nsalu zisuma, nu tumawe twamutengo twakwe kolali nu twakwe lubi. Avino yakauzyanyanga ni vyuma vyako.

¹⁷ Ayuda na ina Izlaeli nayo kwene yaculuzyanyanga nawe, yakuletelanga ingano zyaku Miniti, ipula, uci, amafuta, ni cinyamuti ca bamu.

¹⁸ Aina Damasiko yaculuzyanyanga nawe, pamulandu wa vintu ivivule vino wapanganga, nu ukankala wako ukalamba. Yakuletelanga waini ukufuma ku Heliboni na mavumbu ya mfwele zyaku Zaala.

¹⁹ Aina Dani na Agiliki, ukufuma ku Uzali, yakuletelanga ivyela visule, iviseekwa nga ni vintu vyuze ivikanunkila usaka mu vyakulya. Ali vintu vino yakauzyanyanga ni vyuma vyako.

²⁰ Aina Dedani yakukazyanga amalangeti akwikalapo kuli yakapita apa mfwalasi.

²¹ Aina Alabya ni ntunguluzi zyaku Kedali zyonsi, nayo kwene yaculuzyanyanga nawe, yakulipilanga utwana twa mfwele, yasuuku nga na yasawe.

²² Aculuzi aku Syeba na Laama yakauzyanyanga nawe, yakuletelanga ivintu vinunkile wakwe cimwi, tumawe tukankala twakwe zaabu, nayo ali vintu vino yakauzyanyanga ni vyuma vyako.

²³ Amu misumba ya Halani, Kane na Edeni, nga na aculuzi aku Syeba, aku Asyuli na aku Kilimadi yaculuzyanyanga nawe.

²⁴ Yakukazyanga insalu zikankala, iziyenzu ni zipikolezye umu mbali, insalu zya mingololozi nga ni myando ipyatwe iyamaka.

²⁵ Amato aku Tasyisyi yalambukanga yemba pa kusenda vya uculuzi vyako. Wali wa wato ukankala pali yemba, uwazulanga vyuma tupu.

²⁶ Yakafiya yako yakufiyanga mukasi kakwe yemba, lelo umuza waku ufumondaka wakufwantola mukasi kako.

²⁷ Ivyuma vyako vyonsi vya uculuzi, vyalowela muli yemba, na yakapisya yako yonsi, na yakalungisya yako, na aculuzi yako, ni viya vyako vyonsi vino ukasenda, yonsi pyu yaunzile nu kumwela, lino we ciwato wononike.

²⁸ Pa kuvwa impooma zyakwe yakafiya, impanga zyaya mu nkumba yakwe yemba zyatenta zyonsi.

²⁹ “Na yakafiya yonsi ya mato yalafuma mu wato wao. Yakapisya ya mato na akalamba pali yemba yonsi yalasyala ku cituntu.

³⁰ Yalasanzula izwi pa kulosya nu kupomola impooma ikalamba. Yene yalaiswela ulukungu ku mitwe nu kukunkula mwi twi.

³¹ Yalapeela inkuzu pamulandu wako nu kuinyepelela amasaka mu misana. Mu kutovoka kwao, yalasaula ulwimbo lwa ndosya umu kunyunguluka.

³² Yalakulilila ulanda nu kukulosya, yalapomola impooma yati, ‘Uzye aweni alingine na Tuli, Tuli wilya uwali pakasi kakwe yemba?

³³ Lino walongololanga vya uculuzi vyako, pakwikusya imitundu ivule vii, ni vyakukazya vyako ivivule vyalenganga yamwene ya pano nsi yaye akama.

³⁴ Lyene watamoka ku maimbi mukasi kakwe yemba. Iviya vino wasendanga na antu akupisyanga yonsi yamwela pamwi nawe.’

³⁵ “Yonsi aikalanga mu nkumba zya kutali, ulanda wati uyalema pamulandu wako. Yamwene yayo intete zikalamba zyatiziyalema, yatiyafimfintika na pa manso.

³⁶ Aculuzi amitundu yakuwa imiluvi pali wewe, pano watusanguka cakoopa, nupya watuononeka.”