Ezaya 62 - Amazwi Yakwe Leza 2013

Ukucindama kwakwe Yelusalemu mupya

¹ Nemo pali wewe Zioni ntange nikale sile cele. Nemo pali wewe Yelusalemu ntange ntonte kulanda pali wewe, mpaka sile ukululwe, mpaka sile indole ukuti insambu zyako zicate wa kasanya nu kucimvya kwako kuye wa luswepo ulukukozya usiku mu kanda.

² Alino imitundu ilalola uwololoke wako, na yamwene yonsi yalalola ucindami wako. Yene yalaakwama izina lipya, lino akanwa kakwe Yawe kalasokolola.

³ Wemo ulaya wa cingala ca mwene, kuli Yawe.

⁴ Antu lyene yatalatala nupya yakwame, yati, “Icikona”, nanti yati, “Impanga isuulwe.” Lelo yamakwamanga yati, “Lukundo lwane.” Impanga yako yamayamanga yati, “Utwazi usuma.” Pano lyene Yawe watazangila munuli, ni mpanga yako imafumalilwa kuli Yawe.

⁵ Ndi vino umulumendo akafumalila umukazyana nacisungu, ali vino kaumba wako amakufumalila nu kwikala mumaikalanga pamwi nawe, nu luzango wakwe cimwi.

⁶ Nemo ne Yawe, namaika yakalinda pa malinga yako. Nayo yataezya ukwikala cele usiku nu musanya. Yalinzile ukunjiusya apakukana ilila vino namulaya.

⁷ Nupya cisi cakuleka ukuti yandeke intale mpuze, suka sile natala nakuululula Yelusalemu nu kumulenga aye uwa lulumbi pano nsi yonsi.

⁸ Yawe watalapa umulapo. Alino ukwi kasa lyakwe lilunji, alaufikilizya! Wene atalatala apeele cakulya cakwe ku anisi ya antu yakwe. Aenyi nayo yatalatala yamwe waini wa antu yakwe wino yaifenile.

⁹ Lelo yano yavizombwile ali yano yalavilya nu kulumbanya Yawe. Mwemuno mwasunganga nu kukulula amatingi amwemwe sile mulamwa waini mu misolo yane yamuzilo.

¹⁰ Pitini, pitini mu mpongolo! Umilini antu inzila! Lundumalikini umuseo, fumini mwenemo amawe! Tumpwilini imitundu imendela!

¹¹ Yawe akulaizya ku mitundu yonsi, mpaka nu kumpela yansi ati, “Nenini umukazyana mwana Zioni muti, Katuula wakwe awiyo akwiza. Ali ni cilambu ca kucimvya kwakwe, watakolezya ni visampwe vyakwe.”

¹² Yalaama umutundu wamuzilo yati, “Akululwa yakwe Yawe.” Nawe yalakwama yati, “Umulondwe, Umusumba Utalatazyelwa.”