Ezaya 56 - Amazwi Yakwe Leza 2013

Ainamasi nayo kwene yalaya antu yakwe Leza

¹ Yawe wavwanga wati, “Nemo nasya imupususye. Mwasya mulole vino ne mulungami nkacimvya. Fwandi mwemo mwacita sile ivyaololoke nga ni visuma.

² Nemo namapolelelanga antu yano yakacindika pee uwanda wi Sabata, ukwaula ukucita vyaindwa pa wanda uo. Namapolelelanga antu yano yasicita iviipe nanti vimwi.”

³ Umwinamasi umwi wino wiza wikala pali pamwi na antu yane atavwanga ndi vino Yawe wene atange aleke napepela pamwi na antu yakwe. Mutungwi nawe atavwanga ati, “Nemo ningaposiwa ukuya icili conga na antu yakwe Leza.”

⁴ Ala nemo ne Yawe nkunena yamutungwi yayo inti, “Mwemo ndi cakuti mumancindikanga pamulandu wa kwika amano ku kucindika Sabata, mwatandika nu kucita vino nkalonda, mumasunga ningo nu upangano wane,

⁵ lyene ndamupeela icintu cimwi cizipisye ukuluta na pikwata lya ana aonsi na anaci. Akuli kuti nemo ndaleka amazina inu yakasyale mu ng'anda yane, yakasyale nu ku antu yane. Ali kuti yace yaiusya pee ukwaula kufutikwa.”

⁶ Mwemo mwe inamasi mwaya icili conga na antu yane, mwemo mwe muno mwantemwa mwe muno mukambombela, mwemuno mwika amano ku kucindika Sabata, ukwaula ukucitamo ivyaindwa, mwemuno mukawaka nu upangano wane.

⁷ Ala anene ne Yawe nkumunena nati ndamuleta ku mwamba wane wamuzilo, mwamba wa Zioni. Ndamusansamusya mu ng'anda yane, ndapokelela impolelwa zinu zyakoca nga nazyuze zino mulaatula pa kavuwa kane. Pano ng'anda yane ali ino ilaamwa ukuti ing'anda yakupepelamo antu amitundu yonsi pyu.

⁸ Anene ne Yawe navwanga. Nene kwene nemuno nafumizye antu yane aina Izlaeli mu uzya nu kuyawezezya kumwao. Nalaya nu kuti ndakolonganika nayauze kwene pakuti yakize yakaye pali ponga kwene na yano nakolonganika mpiti.

Intunguluzi zya ina Izlaeli zyasimangwa

⁹ Yawe waamanga ainamasi kuti yize yasinsole antu yakwe wa vilyanyi.

¹⁰ Wayamanga ala akuti, “Intunguluzi zyonsi izyaya nu mulimo wa kusoka antu yane zyene impafu zitupu. Zitamanya nanti cimwi, zyakolana sile wakwe yasimbwa yano yasiwata, yano yikalila sile ukulala utulo nu kulota iviloto. Pasi pakutemwa ukuinyunza pano yalambalile.

¹¹ Intunguluzi zizyo zyaya wakwe yasimbwa, yakalya mukululu. Intunguluzi zimwi imbulwamano. Zyonsi sile yonga yonga zikacitila ivintu muno zitemilwe. Zikalondelela sile ulonsi.

¹² Intunguluzi zimwi zikolesi izikavwanga zikuti, ‘Katwalya sile nu kumwa waini umukalipisye apakuti tukolekesye! Mutondo lyene tulacizyapo.’ ”