Ezaya 52 - Amazwi Yakwe Leza 2013

Leza aliwe alapususya Yelusalemu

¹ Zyuka, vwandamuka! Zwala amaka yakwe Zioni! Zwala insalu zyako zyausaka we Yelusalemu, we musumba wamuzilo! Yano yatamanya Leza na yano yakowela yatalatala yingilemo nupya.

² Kunta ulukungu lwako, katuka we mukulikwa Yelusalemu! Sapula iminyololo mu nsingo yako, we mukazyana mwina Zioni.

³ Yawe Simwandalali akuti, “Mwemuno yamukazizye ukwaula umuzano mulakululwa sile ukwaula kusumbapo ulupiya.

⁴ Wene akuti, Mwatenzi mpiti mwe antu yane ku wenyi ku Eguputo, alino nalyuze aina Asilya yamutesile uyi uyi ukwaula umulandu uno mwatazile.

⁵ Lelo api lelo mu Babiloni namo ululi lumwi kwene, mwikala mu uzya ukwaula umulandu uno mwatala. Yano yamuteeka uzya pasi pakuyuvwa nu kuiwanzya. Lyene nani kwene pasi pakunsuula insita zyonsi. Kuu kuli kulanda kwakwe Yawe

⁶ Mu wanda ulya lyene mulasininkizya ukuti fwandi nene ne Leza wino akalandila calimwi, nu kuti nkalandilila mu cumi.”

⁷ Iye mwe, vino ingazo zya nkombe yi landwe lisuma zyayemba lino akutelemuka ukufuma ku myamba. Waleta ilandwe lya longo ni nsansa. Wasowela ukuluzi nu kunena Zioni vino Leza wakwe akuteeka.

⁸ Uvwa kuno yakalinda yasanzula izwi, yapunda capamwi ni nsansa, pano yasimpana amanso na Yawe lino akuswilila ku Zioni.

⁹ Pundini capamwi ni nsansa, mwe vitalang'anda vyamu Yelusalemu, pano lyene Yawe watamyalalika antu yakwe yano yakukuulula Yelusalemu.

¹⁰ Yawe watavimbula ikasa lyakwe lyamuzilo pa manso ya antu ya mitundu yonsi. Alino lyene impela zya nsi zyonsi zilalola ufyusi wakwe Yawe Leza witu.

¹¹ Pitangini, pitangini, fumini mu Babiloni! Mutezya muleme vyamankowezya mwe muno mukusenda iviya vyamuzilo vyakwe Yawe fumini mwenemo muisangulule.

¹² Lelo mutafumamo mukupamviwa, mutafuma wa mbutusi. Yawe alamukolelela. Leza winu alamucingilila.

Umuomvi wakwe Leza alacula

¹³ Yawe wavwanga wati, “Umuomvi wane alacula muli vino alaomba. Alaya umukulu nu kucindikwa wakwe cimwi.

¹⁴ Antu aingi cayaputwile umusana pa kumulola, pano icata cakwe cali icivulungane apakumutakanya kwati asi muntu.

¹⁵ Ali vino alalenga ukuti imitundu iingi izunguke, na yamwene kwene yatalalanda apakulola icata cakwe, apakulola cino citatazile cilandwapo, nanti ukulola cino citatazile cuvwike.”