Ezaya 48 - Amazwi Yakwe Leza 2013

Yawe Leza ali cinda wa vintu iviliiza inkolelo

¹ Uvwini kuno mwe ang'anda yakwe Yakobo, mwemuno mukaamilwa kwi zina lyakwe Izlaeli, mwe amu mupanda wakwe Yuda. Mwemuno mukalapa mwi zina lyakwe Yawe, nu kwama Leza wakwe Izlaeli ukwaula ufumacumi nu wololoke.

² Pano kwene mukayama mweisikulu ukuti mwemwe ikazi amu musumba wamuzilo. Nu kutaila sana muli Leza wakwe Izlaeli, wino izina lyakwe a Yawe Wamaka yonsi.

³ Yawe akunena aina Izlaeli ati, “Apa mpiti nemo nasowelanga calimwi, ivili nu kucitika uku nkolelo. Mwiukilanga sile ukuti vyativicitika.

⁴ Namanya ukuti mwakoma imitwe, nupya yakoma wa cela. Mwaya aumalale wa cela ca mukuwa.

⁵ Ali cino navisokolwile calimwi lino vitacili vifikile apakuti mutakize mukati, ‘Akaluwi kitu akano kaomba. Nanti muti unkolanya uno twapanzile, nanti uno twengulwile, auno walenga kuti vicitike.’

⁶ “Vyonsi vii wavyuvwa, acino uvilole ningo. Uzye lyene wemo utacili usininkizye? Ukutandika sile ndakai mpaka nu ku nkolelo namakunenanga ivintu ivipya, ivintu ivifisame vino utamanyile.

⁷ Ivintu kwene vii namaleka kuti vicitike likwene, vino wemo utatala uvwa penepo ukufika na pilelo. Pano kwene ndi cakuti wavyuvwilepo mpiti, ungalanda uti, ‘Endi, vintu vii, kwene navimanya mpiti.’

⁸ Nemo namanyile ukuti mwemo musi antu akutaila, pano kwene ukufuma sile pano mwavyalilwe, mwemo mwamanyika ningo ukuti mwemwe yacisanguka. Uli mulandu kwene uno mutatala muvwila ivintu vii. Ali cino na mazwi kwene apa vintu vii yatatala yuvwika kunomuli.

⁹ “Apakuti antu yace yandumbanya, namatala imfusye ukali wane. Namafukilila nu kumulovya ntalamulovya.

¹⁰ Vivi kwene vino yakaengulula siluva umu moto, ali vino nani kwene namupisya umu macuzi yano yakolana nu moto ukukalipa. Lelo kwene nemo nalola ukuti mwemwe viwelewele sile.

¹¹ Nacino nemo nkucitila vii, umulandu sile uwakulonda ukuti antu yandumbanye. Ntangentemwe ukuti antu yansausya, awe. Nupya ntange ntemwe ukuti muze awino yalumbanya. Awe, cipelele ukutali! Pano anene sile nenga, nemuno antu yalinzile kuti yandumbanya.”

Kilusi, intunguluzi ino Yawe wasolola

¹² Yawe wavwanga wati, “Uvwini kunondi, mwe amu mupanda wakwe Yakobo, mwemuno naama. Anene Leza wilya kwene. Nene wankolelo nga nu wakusyalikizya.

¹³ Amakasa yane ayano yatungilila insi, nu kwandatila iyulu. Ndi navyama, navyo vikaasuka.

¹⁴ “Kolonganini mwensi, nga muuvwe. Pataya kaleza kinu akaluwi nanti konga, akatatazile ikalandila calimwi ukuti umukundwe wane wenga alavwangatila umusumba wa Babiloni, kumwi na ikazi ya mwenemo. Umukundwe wane wiyo alacita vino nemo nkalonda ukucita.

¹⁵ Anene kwene navwanga, nu kumwama anene kwene nkumwama. Anene kwene nkamutungulula nu kumupeela ulongo.

¹⁶ “Acino fwandi mwemo palamilini sile kuno, muvwe vino nemo nkuvwanga. Ukutandika sile uku katalili, nemo nkamulandila ivintu apaswe, nupya lyonsi nkaleka vino ndanzile vicitike.” (Lyene Yawe wampeela Umupasi wakwe, nu kuntuma.)

Ipange lino Yawe wakwatila antu yakwe

¹⁷ Yawe, Katuula wako, Wamuzilo wilya wakwe Izlaeli, wavwanga wati, “Nene indi Yawe, Leza winu, wiyo akamusambilizya vyakuti vyamuzipila, kuti ivintu vimuzipile. Nkamutungulula umu nzila ino mulinzile kupita mwenemo.

¹⁸ “Mwemo ndi cali cakuti mwasumbisya amano ku masunde yane, ulongo lwinu lungaya wa luzi ulukapita lyonsi sile. Nu kucimvya kwinu kungaya wa mayimbi akaipumola ku cituntu cakwe yemba.

¹⁹ Ana inu nayo yangavula wa musensenga, nupya ntange ndeke ukuti yalowelele foo.”

²⁰ Fumini mu musumba wa Babiloni, utukini mufume mu mpanga ya uzya. Umilini utupundu twa nsansa, musansante umulandu uu ale mukuti, “Yawe watakulula Yakobo, umuomvi wakwe.”

²¹ Lino Yawe wapisyanga antu yakwe umu lwanga, umukaye see uku cipuki, nupya umuume ndi, antu yakwe yataculanga ku lusala awe. Wene walenzile ukuti amanzi yafukoka umu ciliwe. Yawe walepwile iciliwe na manzi yapongwela.

²² Yawe akuti, “Lelo antu aipe yatakweti umutende, awe.”