Ezaya 39 - Amazwi Yakwe Leza 2013

Inkombe zyaku Babiloni zyafika

¹ Apa nsita kwene ilya, umwene waku Babiloni, izina lyakwe a Melodaki Baladaki, uvwile ukulwala kwa mwene Hezekiya nu kupola kwakwe. Fwandi nawe Melodaki ali pakutumila Hezekiya kalata, ukwikapo ni vyawila.

² Hezekiya nawe fwandi pasi pakutemwa, azengela ni nkombe zyakwe, azilanga na mang'anda akusungilamo ivintu vyakwe, ivili wakwe siluva, zaabu, ubani, vyakununkizya vyakulya, amafuta asuma, ni vyanzo vyakwe vyonsi ivya nkondo. Umwi sano lyakwe lyonsi nu mu mpanga mutasile akantu nanti kamwi kano Hezekiya atalanzile inkombe zizi.

³ Alino kasema Ezaya aya uku mwene Hezekiya, atandika ukumuzya ati, “Uzye antu kwene yaa yafumile kwi, navino yakunenyile ivyani?” Hezekiya nawe aasuka ati, “Yafumile ukutali, uku mpanga yaku Babiloni.”

⁴ Ezaya nawe apali pakuuzya ati, “Uzye ivyani vino yatiyalola kuno ukwako ukwisano?” Nawe Hezekiya ati, “Yatiyalola vyonsi. Umu nkoma zyane mutasile nanti cimwi cino ningati yataweni.”

⁵ Ezaya ali pakunena Hezekiya ati, “Uuvwe kuno vino Yawe Wamaka yonsi akukunena.

⁶ Akukunena ukuti kuliza insita ino ivintu vyonsi ivyaya kuno ukwako ukwisano yalavisenda nu kuvitwala uku mpanga yaku Babiloni. Yalasendela kumwi ni vintu vyonsi vino ivikolwe vyako vyasezizye ukufika nu mwilelo, kutalasyala nanti conga.

⁷ Na pa ana yako aonsi yano waivyalila we mweneco, yalasenda penepo yamwi nu kuya yacita yamutungwi, akuombela umwene ukwisano lyaku Babiloni.”

⁸ Lyene umwene Hezekiya ali pakwasuka Ezaya ati, “Amazwi yakwe Yawe asuma sana.” Pano wene welenganyanga ati, “Kulaya cituku nu longo mu manda yonsi asyala aumi wane.”