Ezaya 30 - Amazwi Yakwe Leza 2013

Mutaezya ukupangana ni mpanga ya Eguputo

¹ Yawe walanda wati, “Antu yano yakateeka impanga yakwe Yuda, yalacilola pamulandu wakutalamila ne Leza wao. Yene yakacita vino nemo ntateinye. Nupya yakapangana ni mpanga zyuze, ivipangano vino nemo nsyalonda. Fwandi lyene ali pakucililako ukwifya.

² Yene yakazenzemalila uku Eguputo, ukukulenga uwazwilizyo kuti Falao ayacingilileko ukwaula ukuti yatale yanguzye. Yakalonda ukuti impanga ya Eguputo aino iye icisao cakutuwilizyamo.

³ Lelo kwene uwazwilizyo wakwe Falao ulaposiwa na munyele alayakangoka. Pano ukuzenzemalila uku Eguputo uku kutuwilizya kulayaletela sile umuzewanya.

⁴ Nanti angala inkombe zyao zyatizifika mpiti umu musumba wa Zoani na Hanesi mu mpanga ya Eguputo,

⁵ ukuya kwene, Ayuda yamatezanga apa lwa kutaila umutundu wa antu utaya na cisinka, uno usiyatuula ndi yazina kunuli.”

⁶ Amazwi asowilwe pamulandu ni nyama zyamu Negebu, aeya akuti, “Inkombe zikapitana umu mpanga umwavula ivilyanyi, muno mwaya yacisama, umwaya ivizoka iviipisye, nga alino ni vinjelengwe vyuze ivikapapuka. Inkombe zizyo zikasenda pali yapunda napa ngamila, ivintu ivya wila ivya mutengo ivya kutwalila umutundu wa antu uno ukaposiwa nu kuyazwilizya kweneko.”

⁷ Uwazwilizyo uno ukafuma uku mpanga ya Eguputo uwa ciwelewele sile. Icaleka fwandi izina lino natemela Eguputo ilya misuli yakwe, ilyakuti, “Laabu Mulya sile.”

Utalami wa antu

⁸ Yawe wanenyile ne Ezaya ati, “Lemba umu lupapulo lumwi, pa misango ya antu apakuti cice ciye umboni wakuyasinila uwa manda pe.”

⁹ Apamulandu wakuti antu cila nsita yakatalamila Leza, yakapepa ufi nu kukana uvwa kuli vino Mwene akuyasunda.

¹⁰ Yakanena yakalola yavilolwa, iyati, “Mute ukulola ivilolwa!” Nga na kuli yakasema nako iyati, “Mwemo mute ukutunena ivintu vyacumi, ivikatucisa uku myenzo. Mwemo mwatunena ivikatusansamusya. Muleke sile swemo twacita vino tuweni ukuti avino vyati vilola mwenemo.

¹¹ Mwemo mwatusenkela umu nzila, mutatucinga foo. Mutatupalizya na matwi umu kuvwanga vyakwe Leza winu, Wamuzilo wakwe Izlaeli.”

¹² Lelo ukuya kwene Yawe Wamuzilo wakwe Izlaeli, walanda wati, “Apa misuli ino mwakwata kunondi, mwikalila sile ukuncuzya nga nu ucenjezi.

¹³ Caleka mwemo mwakwatila umulandu. Mwaya wi linga ilitali, lino lyalanga ukufuma ukupela mpaka na pansi. Muliukila sile mwatimuongoloka na pansi.

¹⁴ Mulafwamfwantika sile wa nyungu ya mbulo, icakuti patalasyala icinga icikulu nanti conga, cino yangapalila penepo nanti umoto, nanti ukutapwila penepo utumanzi mu cifula.”

¹⁵ Ala nemo ne Leza Wamuzilo wakwe Izlaeli, nkumunena mwe antu nati, “Welulukini sile kunondi. Mwamfukilila ningo. Lyene alino mumakwatanga amaka nu kwikala mumaikala ukwaula kusakamala nanti cimwi.” Lelo mwemo vivyo avino mukakana.

¹⁶ Mukalonda sile ukuzinganya anisi inu pa mfwalasi. Nu kulungika ee kwene mukalungika, kamwalukuutuka! Mukaelenganya ukuti imfwalasi zinu izyalwilo sana. Lelo mulalola ukuti yano yakamuzinganya yalamulusya ulwilo.

¹⁷ Antu inu izimbi lyonga yalapuuka, apakulola sile icita conga ca anisi inu. Alino ivita visano sile ivya anisi inu vilakumana pakumuzinga mwensi pyu. Api umba lya vita vinu patalasyala akantu nanti konga, suka sile imendela inu aino ilyasyala ikupepela sile apa mwamba!

¹⁸ Nanti cingaya vivyo, lelo kwene nemo ne Yawe namamulolelanga pakuti namukwatila uluse. Nkalondesya ukumukwatila uluse, pano nemo lyonsi nkacita ivilondoloke. Ala asyuke ayayo yano yataila muli Yawe.

Leza alapolelela antu yakwe

¹⁹ Nga alino nupya atwalilila ati, “Mwe ikazi amu Yelusalemu, mutalalila aminsozi nupya foo. Leza waya nu luse. Wene alamutuula ndi mwamwama.

²⁰ Ukuya kwene alatala aleke mupite umu macuzi. Lelo umweneco ali wino alaya penepo apa kumusambilizya. Atalafisama foo, namwe mulamulola ntontonto na manso inu.”

²¹ Ndi mwaca mwafuma mu nzila, mwapumbukila ukwi kasa lilungi nanti limani, mulauvwa izwi lyakwe kuno likumunena iliti, “Mwe, ala inzila aeyi kuno ndangini muilondele.”

²² Utuluwi twinu tuno yapomela na siluva, na tuno yapomelela na zaabu mulatutoola nu kutusumba ungati avino yakasumba usaali, ala mukuti, “Yangini ukutali mwe vintu vya ciwelewele mwe!”

²³ Nanti sile lino mulakomela imbezu mu vyalo vinu, Yawe aliwe alamezya nu kukuzya vino vyaya mwenemo. Lelo kwene mulaasampa ivyakulya kwene vivyo. Mu wanda ulya ni ng'ombe zinu kwene zilakwata incende zingi zya mulemvwe umwakuliila.

²⁴ Yamasaye inu na yapunda inu yano mukaomvya uku kulimila ivyalo yalaalya umulemvwe utekete wakwe cimwi.

²⁵ Uwanda uno amalinga ya anisi inu yalapokwa nu kukomolelwamo antu yano yikala mwenemo, ali lino mu myamba yonsi mulafunkuka tufukoka twa manzi.

²⁶ Umwezi ulawala kwati ali lanzi kwene, alino ilanzi lilawalisya ukuluta mu cipimo. Uluswepo lwakasanya lulaya ungati ulwa manda cinimbali, alino lyene lwize lwakile capamwi pa kasanya kali konga kwene! Vivyo vyonsi vilacitika lino Yawe alanyepela antu yakwe ivilonda vino wayaletile pakuti vingapola.

Leza alavunuka aina Asilya

²⁷ Nupya Ezaya avwanga ati, “Mwalola amaka yakwe Leza nu ucindami wakwe! Avivyo vikuloleka akatalamukila! Umoto ni cunsi ali vino vikulanga ukali wakwe. Lino amavwanganga, amazwi yakwe yamalunkumanga sile wa moto.

²⁸ Apa kwiza, Leza atatuma cipunga cino cikwiza ungati ukuzuula kwa manzi ya mvula yano yafika umu nsingo. Alino nawe akukumbulula sile antu ya mitundu yonsi nu kuyalovya apa kuyamalila ku viipe vyonsi vino yapanga ukuti yangacita.

²⁹ Lelo kwene mwemo mwe antu yakwe Leza, mwemuno mumasansamukanga, mumaimbilanga ni nyimbo zizi kwene zino mukaimbila usiku pa wanda ukulu wakucindika Leza. Mumasansamukanga wa antu akapita umulongo ala yakulizya imitolilo pakuya ku Ng'anda ikulu yakwe Leza, Kataasya wa ina Izlaeli.

³⁰ Yawe amaleka antu yonsi yuvwe izwi lyakwe lya lulumbi, amaleka yuvwe na pano icipyu cakwe capelela. Kumaya icimbilimbili ca moto, ukupangalansya, imvula ya mawe nga nu kumyansya kwa mvula ya mawe.

³¹ Aina Asilya yamaizakazilanga sile uku ntete lino yamauvwa izwi lyakwe Leza nu kuvwikisya apapela ukali wakwe.

³² Lyonsi lino Leza alayazinga apa maila na maila, antu yakwe lyene yalalizya ingoma na mazeze yao. Leza umweneco aliwe amalwisyanga aina Asilya.

³³ Ala ampiti sana lino yateyinye icilinkwa ca moto umwakocela umwene wa ina Asilya. Ciwina icizike nupya icikulu, muno inkwi zyazulamo tupu, Yawe umweneco aliwe amaiza auvwiile nu mupu wakwe nu moto wize utumuke kwati amaluti akupya.”