Ezaya 3 - Amazwi Yakwe Leza 2013

Icimvulunganya umu Yelusalemu nu mu Yuda monsi

¹ Silolini lyene mwe! Yawe Wamaka yonsi, wasya apokolole ivintu vyonsi pyu, vino aina Yelusalemu na ina Yuda yikalila mwenemo. Wasya apokolole na vyonsi vino antu yikalila, ivikayazwilizya nu kuyazwilizya. Wasya apokolole amanzi ni vyakulya,

² impalume ni vita, yakapingula na yakasema, yakasapoola ni vilolo,

³ yamusika na yakapitao, yasing'anga yonsi, yafundi yonsi acenjele kumwi na yayo akalanda ivingiza uku nkolelo.

⁴ Yakalume ali yano Yawe alaleka kuti yace yayateeka, yano yatacili yakwate na mano.

⁵ Antu yalacuzyanya, umwina nu mwina, umwinipamba wenga nu muze. Ana yanono yalakatukila aikolo. Iviwelewele vya antu vilasangukila yasimucindikwa.

⁶ Kuliza insita ino amu lupwa ululi longa kwene, yalasola umwi apa mwao nu kumunena iyati, “Nga vino awewe sile ukweti icakuzwala icicindame. Fwandi awewe kwene ulinzile waya simatongwa apa mwitu, uteeke ni vitalang'anda vya matongwa yaa!”

⁷ Lelo wene alaasuka mu wanda ulya ati, “Ala mwe! Nemo insi nu mulembo, umwane musi icakulya nanti insalu. Fwandi mutancita intunguluzi ya antu.”

⁸ Ala umu cumi, Yelusalemu alaongoloka, Yuda alawa, pano imivwangile yao, ni vicitwa vyao vikacuzya Yawe, yakamutukola apaswe.

⁹ Imilolekele apa manso yao, ikuyasinila sile. Yasifisama foo apa kwifya, yakucitila sile ivintu uku mufulo ndi vino aina Sodoma yacitanga. Iye mwee! Icumi yailetelela sile.

¹⁰ Antu akacita ivyaololoke yene cilayazipila. Yalailyokezya ivizao vya milimo yao.

¹¹ Kalanda ku antu aipe! Yene yalacilola! Yalalipilwa apa uyi uno iminwe yao yacita.

¹² Ana yanono yalamwilikizya, na anaci nayo yakamuteeka. Mwe antu yane yakateeka inu yamuponzya, yonona ni nzila zinu.

Yawe wapingwila antu yakwe

¹³ Yawe watakatuka apa cilimba cakwe ica upinguzi. Wene watakatuka nu kulolwela antu yakwe.

¹⁴ Yawe waama ivilolo vyakwe uku cilye pamwi ni ntunguluzi zya antu yakwe, nga avwanga ati, “Amwemwe kwene mukaonona icalo ca matingi, nu kufisa ivyuma vya alanda vino mwasampa.

¹⁵ Uzye apacani cino mwapokela antu yane insambu? Uzye umulandu cii uno mukuliila apina amasuku pa mutwe?” Ivyavwanga Umwene, Yawe Wamaka yonsi.

Anaci yavilumba yalasyama

¹⁶ Yawe wavwanga wati, “Apamulandu wakuti anaci amu Zioni yakwatisya ivilumba, yakupita ala yati yatongomola utusingo twao, nu kuzyongola amanso yao, yakumeka pakupita intampulo izitali nu kulizya insaawa uku ngazo zyao,

¹⁷ icilaleka ukuti Yawe ayaletela yamuseela uku mitwe yao. Yawe alaleka yakwate amapala.”

¹⁸ Mu wanda ulya Yawe alapokolola insambo, ingala zyao na maelena ku matwi.

¹⁹ Alayapokolola amaukasi, ivitambala,

²⁰ insawa zyaku maulu pamwi ni misipi, ni misazi ya mafuta acinunu cisuma kumwi ni mpimpi,

²¹ imbalaminwe, ivipini vyaku mpuno zyao,

²² ivyakuzwala vya mutengo, ivikuwalo, ivitenge nu tuvyola kwene,

²³ ivilola, insalu iziyembe izyamutengo, ivya kuikoweka uku mutwe kumwi ni vyandaluwa.

²⁴ Apali icinunu icisuma, palaya akafungo. Apanyepwanga umusipi, palaya umwando. Apali ulunyele ulutelepe, palaya ulukuzu. Apali insalu zyamutengo, palaya ulusamu. Apali ukuyemba kwa mwili palaloleka ivyawinyi ivyakuleta insonyi.

²⁵ Ivita vyako vilafwa uku lupanga, na asilika yako umu nkondo.

²⁶ Impongolo zyako zilalila akalanda, nu kutulula impooma. Alino nawe we Zioni, ulikala pansi ale ukungumile.