Ezaya 22 - Amazwi Yakwe Leza 2013

Leza alavunuka Yelusalemu

¹ Amazwi asowilwe pamulandu ni Cifoloma ca Cilolwa: Uzye icacitika icani pakuti mwensi kwene mukwele apa mapaala ya mang'anda inu?

² Umu musumba monsi mwatimukaya na see! Owe, we musumba wa cimvulunganya ni ciwowo! Antu yako yatakomilwe uku lupanga foo, nanti ukufwa umu nkondo.

³ Intunguluzi zyako zyonsi zyatizipuuka, nupya zyatizilemwa ukwaula ukuomvya uluceto nanti longa. Mwensi pyu mwemuno mwalemilwe mwasenzilwe ku kunyepwa, apacisila cakupuuka anisi lino yacili ukutali.

⁴ Caleka navwanzile inti, “Senkini pano, munte sile ne mweneco nalukulila nu kulumanya incecete. Mutaezya nu kuntekezya, apakononeka kwa antu yane.”

⁵ Ndakai ili nsita ya malanda, iya wilikizi na kanyati nupya iya cimvundawila muno umu Cifoloma ca Cilolwa. Na vii vyonsi Yawe Wamaka yonsi aliwe avilesile kunotuli. Uli wanda wa kuwisya kwa malinga, Ni mpooma zyakwe tutulwe, zyati zyuvwika papela ya myamba.

⁶ Ivita vyamu Elamu vyali viizile pa mfwalasi, ala vyati visenda na malapwa ni nceto. Ivita vyaku Kili navyo kwene vyali viizile ala vyativizwalila ni visyangu vya viko.

⁷ Umu mikonko ivunde yaku Yuda mwali muzile amaceleta yatupu. Ivita vino vikapitila pa mfwalasi navyo vyali vimilile apa mpongolo zya musumba wa Yelusalemu.

⁸ Fwandi vivyo ali vino tungati amalinga yano yacingililanga Yuda yali yaongoloka. Lino icintu cico cali caloleka, ali lino namwe mwali mwatoola ivyanzo vinu umwi Sano lya Mumutengo muno mukavisungila.

⁹ Lyene mwali mwalola mwe eneco utonte uli mu misungile ya Musumba wakwe Davidi. Mwakolonganika na manzi umu cifula icayela apisika.

¹⁰ Mwapenda amang'anda amu Yelusalemu, mwaongolola yamwi apakuti mukwate ingelwa zya kukuulila ilinga, nga na pakuti mungasunga amanzi umu musumba.

¹¹ Lwa mukasi, ali muno mwemo mwimvile icifula, icakufumyamo amanzi umu cifula campiti. Lelo mutasumvile amano kuli Cinda winu uwa cipanzile, nu kuti mulole cino wamuteyanyizizye cico ukufuma nu ku katalili.

¹² Yawe Wamaka yonsi, wamwamile apa wanda ulya uku kulilizika nu mukulosya, kuti mungapela inkuuzu uku mitwe, nu kuzwala visamu.

¹³ Lelo mwemo kuno muli kwali sile ukusansamuka nu kucina. Mwakomile ing'ombe, yacipambasi nu kufyula imfwele. Nga muvwanga, muti, “Lekini twalya nu kumwa, pano mutondo limwi tulafwa.”

¹⁴ Yawe Wamaka yonsi wansokolwelile amazwi akuti, “Umu cumi, mutalalipila api ifyo lilyo suka sile mukafwe. Ivya landa ne Yawe Wamaka yonsi.”

Usoko wapelwa kuli Syebina

¹⁵ Yawe Wamaka yonsi wanenyile ukuya kuli Syebina musika wakwisano, uku kumunena inti,

¹⁶ “Uzye wemo papo pano uli wewe weni?

¹⁷ Nanti ungailola wa muntu mucindame, lelo Yawe angakuvwinta sile iila lyonga na amaka.

¹⁸ Angakuzingulusya sile wa mupila nu ku kuvwintila umu mpanga ikulu. Ali muno ungaca ufwile na maceleta yako kwene yano yakucindamika, vilasyala izewanya uku ng'anda ya musambazi wako.

¹⁹ Yawe alakufumya apa mulimo wakwe umusika, alacefya icifulo cako cakwe umusika.”

²⁰ Mu wanda ulya, alaama Eliakimu umuomvi wakwe, umwana umonsi wakwe Hilikiya.

²¹ Alamuzwika umwingila nu musipi wako. Alamupeela ukulu na amaka yako yano wakweti. Ali wino alaya umukwasi wa ina Izlaeli ni ng'anda yakwe Yuda.

²² Ndamupeela imfungulo zya ng'anda yakwe Davidi. Ndi wayula kutalaya wino angayala nupya. Alino ndi wayala kutalaya angayula.

²³ Ndamupampamila wa lupopo apa ncende ikome ndii. Alaya wa cilimba cicindame uku ng'anda yakwe isi.

²⁴ “Alino lyene, yalakoweka ucindami onsi pyu, uwa ng'anda yakwe isi, uku ana aku vizikulula vyakwe. Ukutandikila sile uku viya vinono ivili wa ngako ukufika nu ku vikulu ivili wa nkolo.

²⁵ Mu wanda ulya, ulupopo lulasomoka ukufuma pano yalupampamile, lukaponele na pansi. Ni viya vyonsi vino yakowekanga kweneko vilatamika. Ilaya ali na mpela ya viko.” Vii ivyalanda Yawe.