Aina Levi 19 - Amazwi Yakwe Leza 2013

Masunde ya miyele isuma nu ulungami

¹ Nupya Yawe anena Mose

² kuti anene aina Izlaeli yonsi ati, “Muye amuzilo pamulandu wakuti Ne Yawe Leza winu Nene wamuzilo.

³ Cila muntu alinzile kucindika isi, nupya alinzile kuyela isunde li Sabata wakwe vino napeela ilamulo kunomuli. Nene Yawe Leza winu.

⁴ “Mutansya nu kuseleukila ku kupepa tuluwi. Mutaipangila tuleza twavyela nu kutupepa. Nene Yawe Leza winu.

⁵ “Lino mukupeela uwila wa utandano kuli Yawe Leza winu, mwasunga malamulo yano napeela kunomuli. Lyene alino nkaapokelela uwila uwo.

⁶ Inyama ya mpolelwa iyo ilinzile kuliwa pa wanda kwene uno yafyuliwapo nanti pa wanda walondelelapo. Inyama ili yonsi iyasyala pa wanda uwalenga yatatu ilinzile kocewa,

⁷ pamulandu wakuti inyama iyo iyamifitalila kulingana nu lutambi lwa mpolelwa iyo. Nupya ndi cakuti umuntu umwi walya inyama iyo pa wanda uwalenga yatatu, ntangapokelela impolelwa iyo.

⁸ Muntu wensi wino walya inyama ya mpolelwa iyo ali nu kupelwa mulandu wa kucita icapaatwilwa kunondi ukuya icintu casilesile. Muntu wiyo alinzile kusukulwa mu antu yane.

⁹ “Lino mukuzombola ivyakulya vinu mu vyalo, mutazombola ingano kufika nu mumbali umwapelela icalo. Nupya mutaswilila ku kuzombola ingano zino mwasile mumbali.

¹⁰ Mutaswilila mu vyalo vinu vya matingi ukuya kolonganika matingi yano yatiyapona pansi. Vyonsi vivyo musile alanda na inamasi. Nene indi Yawe Leza winu.

¹¹ “Mutaiya nanti kusomba nanti kutumpoka.

¹² Mutalapa ufi mwi zina lyane. Cico cikaleta muzewanya pi zina lyane. Nene Yawe Leza winu.

¹³ “Utacenjezya umuntu nanti umwi, nanti kumwiila vintu vyakwe. Utalengezya malipilo ya muomvi wako nanti uwanda onga.

¹⁴ Utatipwila cipuuli nanti kwika icintu cimwi cakupumikako ku nkolelo ya mpafu. Waoopa Leza. Nene indi Yawe Leza wako.

¹⁵ Uye umufumacumi lino ukupingula imilandu. Utacita kasoozi pakasi ka muntu mupina nu mukama. Lelo wapingula umuntu muzo mu ulungami.

¹⁶ Utapitanapitana ku na ku kukusalanganya ufi pakasi ka mutundu wako. Utacita icintu icili consi cino cingaleta uzanzo ku umi wa mwinipamba wako. Nene Yawe.

¹⁷ “Utaya na kaikila ku muntu umwi mu mwenzo. Lelo utiifya pamulandu wa muntu wiyo.

¹⁸ Utalandula uyi wa muntu umwi nanti kutwalilila kupata umuntu umwi. Lelo uwatemwa muzo ndi vino waitemwa. Nene indi Yawe.

¹⁹ “Mwayela amasunde yane. Utalenga ukuti inyama zya mwata upusanepusane zyalondelelana. Utakomela misango ya mbezu iili mu calo conga. Utazwala insalu iyapangwa ni nsalu ziili zipusane.

²⁰ “Mwanaci muzya ndi cakuti wamanyika ukuti umuci namuze uwa monsi umwi, nomba umonsi wii atalipila zya ukuluzi nupya mukazyana atasapulwa, lyene umonsi muze walongozya nu mwanaci wiyo muzya, monsi wiyo pamwi nu mwanaci muzya yalinzile kuvunukwa. Lelo kusi ukukomwa pano mukazyana wiyo acili muzya.

²¹ Monsi wino watalongozya nu mukazyana muzya alinzile ukuleta suuku pa mulyango wi Taalu lya Ukongano kuti amupeele kuli Yawe wa wila wa cizumila mulandu.

²² Alino simapepo atoole suuku wiyo uwa wila wa cizumila mulandu nga acite ulutambi lwa kufuta amaifyo ya muntu wino watalongozya. Lyene Leza ali nu kumwelela.

²³ “Lino mulingila mu mpanga ya Kenani nu kulema imiti ya viseekwa vya mwata uli onsi, iviseekwa vya ku miti iyo ivilaseeka pa myaka itatu mukavicite wa viseekwa vyamifitalila. Pa myaka yonsi itatu mutalinzile kulya iviseekwa vya ku miti iyo.

²⁴ Mu mwaka wakwe cini iviseekwa vyonsi vilinzile kupaatwilwa kuli Yawe kuti vikaye wa wila wa kutaizya kunondi, ne Yawe.

²⁵ Lelo mu mwaka wakwe cisano mungalya iviseekwa vya ku miti iyo. Ndi cakuti mulacita vyonsi vii, imiti inu ilaseeka iviseekwa vivule cuze. Nene indi Yawe Leza winu.

²⁶ “Mutasaapola nanti ukucita vya ulozi.

²⁷ Mutapeela inyele mumbali ya mitwe inu nanti ukupela mumbali ya vilezu vinu

²⁸ nanti kukala inkalo nanti kukala mpoloto pa mili inu pa kulosya. Nene indi Yawe.

²⁹ “Mutazewanya ana inu anaci pakuyalenga ukuya yacizelele. Pano ndi mwacita vivyo mulasenukila kuli tuleza tuze, nga lyene ni mpanga ilazulamo vyawinyi.

³⁰ Mwasunga amanda yane ya Masabata nu kucindika cifulo cane camuzilo. Nene indi Yawe.

³¹ “Mutaya ku kuuzya kuli yakasapoola nanti ku antu yano yakavwanga ni mipasi ya antu afwe. Pano yangamulenga ukuya amifitalila. Nene indi Yawe Leza winu.

³² “Mwalanga umucinzi ku ikolo nu kuyacindika. Mwaoopa nu kunjela. Nene indi Yawe.

³³ “Mutazunya ainamasi yano yakwikala mu mpanga inu.

³⁴ Mwayasunga ndi vino mukasunga aina Izlaeli yauzo. Nupya mwayatemwa ndi vino mwaitemwa mweisikulu. Mwaiusya vino mwali ainamasi mu mpanga ya Eguputo. Nene indi Yawe Leza winu.

³⁵ “Mutacenjezya muntu wensi pa kuomvya cipimo caufi, pa kupima utali nanti kunyoma nanti kuvula.

³⁶ Mwaomvya vipimo vyacumi pa kupima utali, kunyoma nu kuvula kwa vintu. Nene indi Yawe Leza winu, nemuno namufumizye mu mpanga ya Eguputo.

³⁷ Mwayela amasunde na malamulo yane yonsi. Nene indi Yawe.”