Aina Levi 18 - Amazwi Yakwe Leza 2013

Kuinda misango ya ukambwe

¹ Yawe anena Mose ati,

² “Nena aina Izlaeli uti, ‘Nene indi Yawe, Leza winu.

³ Mutalondela micitile ya ina Eguputo kuno mwatenzi, nanti micitile ya ina Kenani, ku mpanga ino nkumutwalako ndakai.

⁴ Mwayela amasunde yane nu kucita kulingana na malamulo yano namupeela. Nene indi Yawe, Leza winu.

⁵ Mwalondela micitile na masunde yano napeela kunomuli, pano mulapususya umi winu ndi mwacita vivyo. Nene indi Yawe.’”

⁶ Yawe apeela malamulo yaa. “Utalongozya nu muntu ali wensi uwamu akazi kako.

⁷ Utazewanya so pakulongozya na nyoko. Utalinzile kuzewanya nyoko pano wene anyoko.

⁸ Utazewanya so pakulongozya na aci yakwe yauze.

⁹ Utalongozya na kaci wako, nanti kaci wako wamuli yanyoko yano so wapalika nanti wino so wazana, nanti wino mutakulile mu ng'anda ili yonga nawe.

¹⁰ Utalongozya nu mwizikulu wako umwanaci, pano cico cingaya camuzewanya cuze kunuli.

¹¹ Utalongozya na mwana so wino so wavyala mu ng'anda yuze, pano nawe kwene akaci wako.

¹² Utalongozya na nyokosenge,

¹³ nanti angaya akaci wakwe so nanti mwina nyoko.

¹⁴ Utalongozya na muka nyokolume pano nawe kwene a nyoko.

¹⁵ Utalongozya na nyokovyala,

¹⁶ nanti muci wakwe solenzi nanti wa muto wako.

¹⁷ Utalongozya nu mwana nanti mwizikulu wa mwanaci wino walongwizye nawe, pano limwi yangaya akazi kunuli. Camusango uwo cingaya isiku.

¹⁸ Utatola muto wa muci wako umwanaci kuti aye umuci wako, lino umuci wako acili nu umi.

¹⁹ “Utalongozya nu mwanaci wino ali ku mwezi, pano wene uwamifitalila kulingana nu lutambi.

²⁰ Utalongozya nu muci wa muzo, cico cingalenga kuti uye uwamifitalila kulingana nu lutambi.

²¹ Utapeela umwi uwamu ana yako kuti aomviwe mu mapepo yakwe leza Moleki, pano cico cingaleta muzewanya kwi zina lyakwe Leza, Yawe.

²² Umonsi atakezye kuulungana nu monsi muze. Pano Leza wapata camusango uwo.

²³ Umonsi nanti umwanaci atakezye kuulungana ni nyama, pano lunkumbwa lwa musango uwo lukalenga kuti muye amifitalila.

²⁴ “Mutailenga kuya amifitalila pa kucita vintu vii. Pano avino akulukuwa yailenga ukuya amifitalila. Akulukuwa yano yakwikala mu mpanga ino mutacili mwingilemo, yano Yawe akufumyamo kuti mwingilemo.

²⁵ Micitile yao yalenzile kuti mpanga iye iyamifitalila. Caleka Yawe watavunuka impanga pakuti azinge antu yano yakaikalamo wakwe vino umuntu akaluka cilyo iciipe.

²⁶ Akaya na inamasi yene yakacita ivintu vyonsi vii, ivyamuselu nu kulenga impanga ukuya iyamifitalila. Lelo mwemo mutalinzile ukucita ivintu vii.

²⁷ Mwensi mwe ina Izlaeli nanti ainamasi akaikala pakasi kinu, mulinzile kusunga malamulo yakwe Yawe.

²⁸ Ndi mwacita vivyo, lyene ale impanga italamuluka wakwe vino yatiluka akulukuwa yano yali mu mpanga kwene iyo ino mukwingilamo.

²⁹ Mwensi mwamanya ukuti umuntu ali wensi wino wacita vintu vii vyamuselu, wene alinzile kusukulwa mu antu yakwe Leza.”

³⁰ Nupya Yawe avwanga ati, “Mwayela malamulo yano nkumupeela, nupya mutalondela micitile ya antu yano yakwikala mu mpanga ino mukwingilamo. Mutailenga ukuya amifitalila pa kucita cimwi camu vintu vii. Nene indi Yawe, Leza winu.”