2 Yamwene 6 - Amazwi Yakwe Leza 2013

Impasa iyausokwa yelela pa manzi

¹ Iumba lyakwe yakasema yano Elisya watungululanga ilitandika ukuinong'onya liti, “Ing'anda muno tukakonganila yaticepa!

² Cingazipa mutuzumilizye ukuya ku luzi lwa Yodani, tukakome ivimuti vyakuti twize tukuulile umwakuti twaikala.” Elisya nawe atali umukanyi, ayazumilizya ati, “Pitangini.”

³ Kasema wenga ali pakuya uzya Elisya kuti ayasukilile, nga

⁴ ayasukilila. Walanga yafika ku luzi lwa Yodani, iyatandika nu kukoma ivimuti.

⁵ Lino kasema wenga akukoma icimuti, impasa yakwe isokokela mu manzi. Kasema wiyo ali pakupunda ati, “Owe tata we! Uzye namacita uli? Impasa ii iyakwazima sile!”

⁶ Alino kasema Elisya auzya ati, “Uzye impasa iyo isokokile lwapi?” Alino umuntu wilya amulanga apali pasokokela impasa. Elisya nawe pali pakutema akamusambo ka muti, akasumbila mu manzi, lwa pano impasa iyo yaliyaponela. Alino papo kwene impasa iiza ifuma iyaelela pa manzi.

⁷ Elisya amunena ati, “Ale izuulule.” Lyene umuntu wilya azuulula impasa ilya.

Elisya na antu yakwe yapumikizya aina Asilya

⁸ Alino kwali inkondo pakasi ka ina Asilya na ina Izlaeli. Umwene wa ina Asilya ali pakuvwanga ni nkombe zyakwe, yasolola ni ncende pano yangakuulila insakwe zyao.

⁹ Lelo kasema Elisya atuma inkombe ku mwene wa ina Izlaeli ati, “Ucenjele sana, nupya utalinzile kupita ku ncende ilya, pamulandu wakuti aina Asilya yakutentemukila kweneko ku kukufisamila.”

¹⁰ Acino umwene waku Izlaeli nawe acelula antu yakwe aikalanga mu ncende ilya, nga nayo yacenjela. Icintu cii cacitikanga amaila avule.

¹¹ Acino umwene wa ina Asilya asoka wakwe cimwi pamulandu wa cintu kwene cico. Ali pakwama inkombe zyakwe nga azyuzya ati, “Uzye aweni pali mwemwe uwaya ku lusansa lwa mwene wa ina Izlaeli?”

¹² Nkombe yonga ali pakwasuka iti, “Musambazi, ala pataya nanti wenga. Kasema Elisya ali wino akanena umwene waku Izlaeli amazwi yano wemo ukavwanga ukukasi ku muputule wako kuno ukasendama.”

¹³ Umwene nawe ayanena ati pitangini mufume mukalonda kuno wikala, pakuti muleke ince intume akuti yakaye yakamuleme. Alino antu yaya yawezile kuku, nga yamunena yati, “Elisya ali ku Dotani.”

¹⁴ Lyene umwene atuma ivita vivule ku musumba ulya, ivyali ni mfwalasi na maceleta. Alino ivita iviya pa nsita ya usiku, iviteyamila umusumba ulya, iviuulizizya.

¹⁵ Katondotondo lino muomvi wakwe Elisya wazyuka, cino wafumila sile apanzi, alola kuno ivita vya ina Asilya vyativizinguluka umusumba, ala vili ni mfwalasi nga na maceleta yao. Alino umuomvi wilya aswilila kuli Elisya nga amunena ati, “Awe lyene catala musambazi! Uzye lyene tumacita uli?”

¹⁶ Alino Elisya avwanga ati, “Utuvwa intete. Antu yano yali ku lusansa lwitu avule ukuluta yano yali na aliwe.”

¹⁷ Elisya pali pakupepa ati, “We Yawe, su ngayula amanso ya muomvi wane kuti alolekesya!” Yawe nawe ali pakuyula amanso ya muomvi wilya, nga lino wene walolekesya alola umwamba kuno watiulimba imfwalasi na maceleta aingi amoto. Yonsi ala yatiyalizizya Elisya.

¹⁸ Lino aina Asilya yakatukila Elisya, Elisya nawe apepa kuli Yawe ati, “Si leka antu yaa yapafule.” Acino Yawe ayapafuzya. Alino Yawe nawe auvwa ipepo lyakwe, alenga nu kuti antu yayo yapafule.

¹⁹ Lyene Elisya anena asilika yaya ati, “Inzila ino mwali mwizile mwenemo asi nzila ii foo. Nu musumba uno mwali mufumile mwenemo, asi uno foo. Mwemo ndondelini sile, nani namamutungulula ku muntu wino mwalimukulonda.” Fwandi ali vino Elisya wayatwazile ku musumba wa Samaliya.

²⁰ Lili kwene sile lino yatiingila mu musumba ulya, Elisya apepa kuli Yawe ati, “We Yawe, yayulile amanso kuti yalola.” Yawe nawe auvwa ipepo lwakwe Elisya, nga ayalenga nu kulola. Ali vino yiukila sile ukuti yali mu musumba wa Samaliya.

²¹ Lino umwene waku Izlaeli wayalola, auzya Elisya ati, “We musambazi wane, uzye njakome? Uzye njakome yaa?”

²² Elisya nawe aasuka ati, “Utezya kuyakoma. Nanti ivita vyao vino mumalema apakulwa inkondo, navyo kwene mutavikoma.”

²³ Acino umwene ayateyanyizizya icimulo cikulu. Lyene pacisila lino yamala ukulya nu kumwa, ayata kuti yapita, nga nayo yaswilila ku musambazi wao. Kufuma lili kwene aina Asilya iyata kuzanza impanga ya ina Izlaeli.

Aina Asilya yalilizya umusumba wa Samaliya

²⁴ Walanga papita insita itali, Beni Hadadi umwene waku Asilya waile ni vita vyakwe vyonsi ku mpanga ya ina Izlaeli, nga yalizizya umusumba wa Samaliya.

²⁵ Pa nsita ilya lino aina Asilya yazinguluka umusumba wa Samaliya, kwaponyile icipowe icikulu wakwe cimwi mu musumba ulya. Cico calenzile kuti umutwe wakwe punda wakaziwa pa mutengo wa lupiya lwakwe siluva ukulingana 80. Alino nacitumbi akamela mu vizule nawe nga waloleka, wakalwanga pa mutengo wa mpiya zisano sile zyakwe siluva.

²⁶ Uwanda umwi umwene waku Izlaeli walyatokanga papeela yi linga lya musumba ulya, nga auvwa umwanaci umwi akupunda kunoli ati, “Musambazi, ala cumi napapata yangazwilizye kweneko!”

²⁷ Umwene waku Izlaeli nawe amunena ati, “Ndi cakuti Yawe aliwe atakwazwilizye, uzye aukwi kuno nemo ningafumya icakukwazwa? Uzye uku lwano lwa kupuulila nanti ukwakufenela amatingi kwasyalako cimwi?”

²⁸ Alino umwene amuuzya nupya ati, “Uzye icani cino cakucuzya sana?” Umwanaci wiya nawe aasuka ati, “Mukwai uwanda ulya unji, umwanaci wii wanenyile ati, ‘Koma umwanako kuti tumulye ilelo, nga mutondo tulakoma umwanane kuti tumulye.’

²⁹ Acino twelike umwanane wilya, nga tumulya. Lyene uwanda walondelile namunenyile inti, ‘Koma umwanako kuti tumulye.’ Lelo wene afisa umwanakwe!”

³⁰ Lino umwene wilya uvwa amazwi ya mwanaci wilya, alepula ivyakuzwala vyakwe. Lino umwene akulyatokela pi linga, antu ali mukasi pipi ni linga yalola ukuti umwene azwite ivyakuzwala vya ndosya mukasi ka vyakuzwala vyakwe.

³¹ Lyene umwene wilya avwanga ati, “Si Leza andye, ndi cakuti Elisya, umwana umonsi wakwe Syafati, yasikumuputula umutwe ilelo kwene, lino ilanzi litali liwe!”

³² Pa nsita kwene ilya walanga Elisya atenzi pansi mu ng'anda yakwe, nga na ikolo ala yatenzi pamwi na aliwe, lyene umwene wilya atuma wenga uwamu nkombe zyakwe kuti amukolelele. Lelo lino inkombe ilya itali kuti ifike kuku, Elisya anena aikolo yalya ati, “Uwi, si lolini vino inkomi ilya yatituma umuntu wakuti aize amputule umutwe. Fwandi ndi cakuti umuntu wilya wafika, lilyo kwene mwemo mwize muyale sile icisasa nupya mutaleka aize aingile muno. Umwene nawe kwene wasya amulondelele pacisila.”

³³ Lino Elisya acili akulanda nayo, inkombe itentemuka yiza kunoli. Alino umwene avwanga ati, “Yawe uwatatuponyezya intazi zii. Uzye pacani cino ningatwalilila ukulolela Yawe kuti acite cimwi?”