2 Yamwene 3 - Amazwi Yakwe Leza 2013

Inkondo pakasi ka ina Izlaeli na ina Moabu

¹ Yolamu umwana wakwe Aabu umwene wa ina lzlaeli mu Samaliya, mu mwaka walenga ikumi na cinani uwa kuteeka kwakwe Yeosafati umwene waku Yuda. Wene wateesile imyaka ikumi na iili.

² Wene wifyanga pa manso yakwe Yawe, lelo ukwifya kwakwe kutali ndu kwifya kwakwe isi nanti nyina Yezebele. Yolamu watamozile akaluwi kakwe Baali kano isi wapanzile.

³ Lelo nanti cali vivyo wene wemelile ku kucita iviipe ndi vino Yeloboamu, umwana umonsi wakwe Nebati wacitanga, vivi kwene vino walenzile aina Izlaeli ukucita. Nupya atatiile ukucita vivyo awe.

⁴ Lyene Mesya, umwene waku Moabu, wateesile imfwele, nga cila mwaka wapelanga umwene waku Izlaeli ana ya mfwele 100,000 nga na mavumbu ukufuma kuli yasuuku 100,000.

⁵ Lelo pacisila lino Aabu wafwa, umwene waku Moabu asangukila umwene waku Izlaeli.

⁶ Acino pa nsita ilya kwene umwene Yolamu atenuka ukufuma ku Samaliya, aya ku kukonganika aina Izlaeli yonsi.

⁷ Wene atuma amazwi kuli Yeosafati, umwene waku Yuda, ati, “Umwene waku Moabu watansangukila. Uzye utange upite nani ku nkondo, kuti tukalwe na ina Moabu?” Alino Yeloboamu aasuka ati, “Namapita nawe. Nemo nawe tuli cili conga, na antu yane na antu yako kwene, pamwi ni mfwalasi zyane ni mfwalasi zyako zyonsi kwene cili conga.”

⁸ Nawe auzya ati, “Uzye inzila cii ino tulapita pakuya uku nkondo?” Yolamu nawe amwaasuka ati, “Tulapita inzila iitali, iyapita mu Lwanga lwaku Edomu.”

⁹ Awe mukwai umwene Yolamu nu mwene waku Yuda pamwi nu mwene waku Edomu ali vino yakatwike. Lino yapita amanda cinimbali, amanzi iyasila ukwaula ukusyala nanti tunono utwakumwa antu ni mfwalasi.

¹⁰ Alino umwene Yolamu avwanga ati, “Owe mwe! Twafwa! Yawe akulonda atukomole swensi swe yamwene yatatu uku mwene waku Moabu!”

¹¹ Umwene Yeosafati ali pakuuzya ati, “Uzye pano, pano tuli pasi kasema umwi angatuuzizya kuli Yawe?” Musika wenga uwamu vita vyakwe Yolamu aasuka ati, “Apano ali. A Elisya umwana wakwe Syafati, awino wazwilizyanga Eliya imilimo.”

¹² Umwene Yeosafati nawe avwanga ati, “Elisya wene a kasema wampomvu wakwe Yawe.” Fwandi yamwene yonsi yatatu ali pakuya kuli Elisya.

¹³ Alino Elisya anena umwene waku Izlaeli ati, “Uzye cino nemo ningakwazwilizya icani? Yanga ukuuzye yakasema yaya yano so na nyoko yuzyanga.” Yolamu nawe aasuka ati, “Awe, ala apamulandu wakuti Yawe aliwe akulonda kuti atusumbe swe yamwene yatatu ku mwene waku Moabu.”

¹⁴ Elisya nawe ali pakwasuka ati, “Nalapa umwi zina lyakwe Yawe waumi, Wamaka yonsi wino nkatumikila, ukuti inkana ukucindika sile Yeosafati umwene waku Yuda, wemo Yolamu ntange nkusakamale foo.

¹⁵ Lelo usi mulandu, ndetelini kiimba wa nyimbo wenga.” Lino kiimba wa nyimbo akwiimba, alino umupasi wakwe Yawe iwikila pali Elisya, nga nawe atandika nu kusema.

¹⁶ Alino avwanga nu kuvwanga ati, “Yawe wavwanga wati, ‘Mwimbe ivifula vya manzi monsi monsi umu luzi kwene luu nanti lwatilupwa.

¹⁷ Pano nanti angala mutalalola icipunga nanti imvula, umu luzi luu mwene mumayanga amanzi, akuti mwemwe mumwe na antu yonsi kumwi ni vinyama vinu vyonsi.’ ”

¹⁸ Elisya atwalilila ukulanda ati, “Icintu cii icanguke kuli Yawe ukucita, nupya ali nu kuleka kuti mukacimvye aina Moabu.

¹⁹ Mwemo muli nu kucimvya imisumba yonsi iyakwao iya malinga akome. Mulakomola ni miti yao yonsi iya viseekwa. Mulaziika utufukoka twao twa manzi tonsi apa konona ivyalo vyao ivivunde, vino mulasumba mwenemo insakalawe na mawe.”

²⁰ Awe mukwai akatondo apa nsita ino yatuulilanga penepo impolelwa, katondotondo, amanzi yatandika ukuzwa ale yakufuma ku ntunga yaku Edomu, yatandika ukukonkoloka sile konsi konsi.

²¹ Lino aina Moabu yuvwa ukuti yamwene yatatu yakwiza ku kuyalwisya, ali pakukonganika aonsi yonsi pyu, ukutandikila sile ku ikolo, ukufika nu ku ance kwene, yayo yonsi ali na maka akulema ivyanzo. Alino yayatantamika na muli mumpaka wa mpanga.

²² Lino aina Moabu yazyuka akatondo, ilanzi iliwala nga lileka nu kuti amanzi yaloleke ayenzulukile cee, wa wazi.

²³ Aina Edomu ali pakuvwanga yati, “Iye mwe, uwazi! Yamwene ali kuko yati yalwa, ni vita vyao vyativikomana! Fwandi lyene swe ina Moabu katwapita tuye tukasampe ivintu!”

²⁴ Lelo lino aina Moabu yafika pa nsakwe, aina Izlaeli iyayakatukila nga iyayazinganya nu kuyazinganya. Aina Izlaeli pali pakuzinganya nu kuzanza aina Moabu mu mpanga ilya, nga yayakomola.

²⁵ Iyaya yonona imisumba yao. Nalino yafumile yakupita, yapita mu vyalo vyao ivivunde, ala yafumile yakusumba amawe ni nsakalawe mwenemo. Suka ivyalo vyao ivizula sile amawe ni nsakalawe. Yazika utufukoka twa manzi. Iyakomola ni miti ya viseekwa vyao. Fwandi ikusyala sile umusumba onga uwaku Kili Haleseti. Lelo nao kwene aina Izlaeli aipangisye ni vyanzo yaile iyauzinguluka nu kuuzanza yauzanza.

²⁶ Lino umwene wa ina Moabu walola ukuti yatiyamucimvya, atoola antu imyanda cinimbali alwanga ni mpanga, ali muno azina, atuwilizya apakupita mu anisi nu kupuuka umwene wa ina Asilya. Lelo aposiwa ukucita cico.

²⁷ Wasuka watola umwana wakwe uwiyeli, uwali nu kupyana apa wene. Ali wino wamupeela impolelwa kuli kaleza ka ina Moabu, apapela yi linga lya musumba ulya. Aina Izlaeli apakulola cico, iyuvwa intete, nga yatandika ukwelenganya ukuti kaleza kao akaluwi limwi kangacita penepo cimwi. Fwandi lyene ali vino yafumile ku musumba, yaswilila nu kumwao ku mpanga kuno yafumile.