2 Yamwene 20 - Amazwi Yakwe Leza 2013

Ukulwala kwakwe Hezekiya na vino wapozile

¹ Umu manda yaya umwene Hezekiya alwala indwala yakumutwala uku mfwa. Alino kasema Ezaya, umwana wakwe Amozi aya ku kumufwilizya, nga lino amunena ati, “Yawe Leza wavwanga wati cange cizipe utandike ukutantika ivintu ningo, pano indwala ii isi ningo foo, imakukoma sile.”

² Hezekiya nawe ali pakusenukila uku lung'umba apepa kuli Yawe ati,

³ “We Yawe, si ungala wiusye vino nakuombelanga usaka. Nakutontelanga amanda yonsi. Si angala wiusye vino nezyanga ukucita vyonsi vino wanena kuti incite.” Lyene Hezekiya alila aminsozi nu ulanda ukulu cuze.

⁴ Alino Ezaya afuma. Lelo lino atacili afume pa musolo wakwe Hezekiya, Yawe amunena ati,

⁵ “Swilila ukamunene Hezekiya umwene wa antu yane uti, ‘Yawe, Leza wa cikolwe cako Davidi wavwanga ukuti natinuvwa ukupapata kwako, na minsozi yako natinjalola. Fwandi nemo namakupozya nu wanda uwalenga yatatu, ale wakwela kunondi, uku Ng'anda ikulu yakwe ne Yawe.

⁶ Ndakulundila penepo imyaka ikumi na isano yakuti wikale pano nsi. Nupya anene kwene namakutuula uku mwene waku Asilya nga ntuule nu musumba ukwene uwa Yelusalemu. Namakucingililanga pamulandu wakuti avino nalavile umuomvi wane Davidi.’ ”

⁷ Ezaya ali pakunena umwene ati, “Teyanya icikamangwa ca mateca, uweleke cikaye, alino uwike apa cilonda cako, nu kupola umapola.”

⁸ Hezekiya wene auzya Ezaya ati, “Nga fwandi icani cino tungamanyila kweneko ukuti Yawe amampozya nu mu wanda wakwe citatu inkaye nu ku Ng'anda ikulu yakwe Yawe?”

⁹ Ezaya nawe aasuka ati, “Yawe umweneco ali nu kukulanga icakumanyila kweneko ukuti cino walaya suka sile icicitika. Uzye ungatemwa ukuti icinzingwa ciye apankolelo yako, nu kuya imilila apa lutampulo ulwalenga ikumi, nanti kuti ciswilile apacisila, ciye cikimilile apa lutampulo ulwalenga ikumi?”

¹⁰ Hezekiya wene aasuka sile ati, “Ala icintu cimwi icangupale sana uku cinzingwa ukuya imilila uku nkolelo apacisila ca ntampulo ikumi. Fwandi wemo leka ciye cimilile apacisila ca ntampulo ikumi, zizi kwene zino umwene Aazi wapanga.”

¹¹ Ezaya ali pakupepa kuli Yawe, nga nawe alenga kuti icinzingwa ciweluluke uku cisila nu kuya imilila apa lutampulo ulwalenga ikumi.

Inkombe izyafumile uku Babiloni

¹² Apa nsita kwene ilya Melodaki Baladani, umwana umonsi wakwe Baladani, umwene waku Babiloni, auvwa ukuti umwene Hezekiya akulwala. Acino atuma inkombe kuti zimutwalile kalata nu wila.

¹³ Hezekiya azengela inkombe zizi nga azilanga ni ng'anda zino wasungilangamo ivyuma vyakwe ivili wakwe siluva, zaabu, ni vyakununkizya ivyakulya na mafuta amununko usuma pamwi ni vyanzo vya nkondo. Kutali nanti conga pa vintu vino Hezekiya wakweti vino wakanyile ukuyalanga.

¹⁴ Ezaya kasema ali pakuya ku mwene Hezekiya nga amuuzya ati, “Uzye antu yaa yafumile kwi, nupya ivyani vino yalanda kunuli?” Hezekiya nawe aasuka ati, “Yafumile ku mpanga ya kutali sana, uku Babiloni.”

¹⁵ Ezaya nawe amuuzya ati, “Nga fwandi ivyani vino yatiyalola umwi sano lyako?” Hezekiya nawe aasuka ati, “Yatiyalola ivintu vyonsi pyu umwi sano lyane. Umu nkoma zyane, pasi nanti conga cino ntayalanzile.”

¹⁶ Ezaya ali pakunena umwene Hezekiya ati, “Yawe Wamaka yonsi wakunena ukuti,

¹⁷ icumi kwene kuliza insita yonga lino ivintu vyonsi vino wakwata kuno ukwako ukwi sano, yalavisampa nu kuvitwala uku mpanga yaku Babiloni. Yalasendenkanya kumwi ni vintu vyonsi vino ivikolwe vitu vyasezya ukwizafika na pilelo kwene. Fwandi mutalasyala nanti kamwi, avino Yawe wavwanga.

¹⁸ Nanti sile amu mupanda wako, ukufuma mu ana yano waivyalila, yalayasenda nu kuyatungula nga yalatumikila umwene waku Babiloni umwi sano lyakwe.”

¹⁹ Lyene umwene Hezekiya apakuvwa amazwi yayo, amanya ukuti amazwi yalola umukuti apa manda yonsi asyala aumi wakwe, wene alikala mu mutende. Ali pakwasuka Ezaya ati, “Amazwi yakwe Yawe yano wanena umucumi asuma.”

Impela ya wene wakwe Hezekiya

²⁰ Ivintu vyuze vyonsi vino Hezekiya wacisile, ni milimo yakwe yonsi, na vyonsi vino watukwite na vino wapanzile icilambe ca manzi nu kwimba umufolo wa manzi ukuuleta ku musumba, vyalembwa mu lupapulo lwa Milandu yakwe Yamwene aku Yuda.

²¹ Lyene Hezekiya afwa, nga yamuzika ku nzisi ya vikolwe vyakwe. Alino Manase umwana wakwe umonsi amupyana pa cilimba ca wene.