2 Yamwene 10 - Amazwi Yakwe Leza 2013

Yeu wakoma amu mupanda wakwe Aabu yonsi

¹ Lyene mu Samaliya mwatenzi amu mupanda wakwe Aabu aonsi ukufika ku mpendwa ya makumi cinimbali. Fwandi Yeu alemba amakalata aambulula pa mapepala alino atumila intunguluzi zyamu musumba wa Yezileele, ku yakalamba yamwi yamwi alino na kuli yakalinda yonsi ya ana yakwe Aabu. Avwanga ati,

² “Mwemuno mukulinda amu mupanda wa mwene winu Aabu, nupya mukweti amaceleta ni mfwalasi, nu musumba wa malinga ni vyanzo,

³ musolole penepo umuntu angalinga nupya umusuma ukuluta yonsi pa ana aonsi ya musambazi winu. Alino mu mulasike pa cilimba ca wene cakwe isi. Lyene mulwisye kuti mumucingilile.”

⁴ Lelo yene yuvwa intete wakwe cimwi nga yavwanga yati, “Iye! Uzye yamwene yatatu ndi yaposiwe kumulwisya, lyene swemo tungamulwisya uli?”

⁵ Nga lilyo kwene kangalila wakwisano, nu mulasi uwamu musumba, na aikolo na yakalinda yatuma amazwi yaa kuli Yeu, yati, “Swemo pano sweswe aomvi yako nga sweswe aiteyanye wakwe cimwi ukucita consi cino umatunena. Swemo tutalasonta umwi ali wensi kuti aye umwene. Wemo ungala ucite consi cino watemwa nanti cino welenganya ukuti cingakuzipila.”

⁶ Lyene Yeu ali pakuyalembela kalata muze, ati, “Fwandi mwemo ndi cakuti muli ku lusansa lwane nu kuiteyanya mwemwe aiteyanye ukunjela, mutondo apa kasita ndi kakwene, muce muputule imitwe ya ana aonsi ya musambazi winu Aabu, nga mundetele ku musumba wa Yezileele.” Amu mupanda wakwe Aabu, yano yali amakumi cinimbali, yasungwanga ni ntunguluzi zyamu musumba wa Samaliya nu kuyakuzya izilizyo kwene izyayakuzizye.

⁷ Lino intunguluzi zizya zyapokelela kalata wakwe Yeu, izilema amu mupanda wakwe Aabu yonsi amakumi cinimbali, nga ziyaputula imitwe. Alino iziika imitwe yao mu mise nga zitumila Yeu ku Yezileele.

⁸ Lino inkombe yafika, inena Yeu iti, “Yatiyaleta imitwe ilya iya amu mupanda wa mwene Aabu.” Alino Yeu ayapeela ilamulo ati, “Kaitulikini mu mitumba iili pa wingililo wa mpongolo ya musumba, muleke ilale papo kwene mpaka ukufika mutondo katondo.”

⁹ Akatondo uwanda uwalondelilepo Yeu afuma, aya kweneko nga anena antu yonsi ati, “Anene naile numana akapi na antu nu kukoma umusambazi wane Yolamu, mwemo mwemwe yakaele. Lelo uzye aweni uwatakoma antu yaa yonsi?

¹⁰ Lyene manyini ukuti amazwi yonsi yano Yawe wavwanzile pamulandu na amu mupanda wakwe Aabu yalafikiliziwa. Yawe watafikilizya vino wavwanzile kupitila muli Eliya, umuomvi wakwe.”

¹¹ Pacisila cakwe vii Yeu akoma yonsi asyala akazi kakwe Aabu ku Yezileele, na yacilolo, na yacuza yakwe apa mwenzo, nga na yasimapepo. Kutali nanti wenga uwasile umupuma.

Akazi ka mwene Aaziya yakomwa

¹² Lyene Yeu atenuka alungama ku Samaliya. Lino wafika pa cifulo icamwangwa ukuti, “Inkambi yakwe yakacema”.

¹³ Akomenkanya yamwi akazi ka mwene Aaziya, umwene waku Yuda nga ayuzya ati, “Uzye mwemwe yaweni?” Nayo yamwasuka yati, “Sweswe akazi ka muyazi Aaziya, nga twatitwiza ku kulola akazi ka mwene na yakwe namwene Yezebele.”

¹⁴ Alino Yeu anena antu yakwe ati, “Yalemini, muyasende apuma.” Awe mukwai yayalema, nga yayakomolela umu pipi ni cifula ca Beti Ekedi. Yonsi pamwi yali amakumi yani na yaili. Atasile umuntu nanti umwi umupuma.

Akazi kakwe Aabu asile yonsi yakomwa

¹⁵ Lino wafuma kuku, Yeu akomenkanya Yeonadabu umwana umonsi wakwe Lekabu, ala akumukomenkanya. Yeu pali pakumuzengela nu kumunena ati, “Wewe nani tukaelenganya icili cimwi. Uzye lyene utange uye ku lusansa lwane?” Yeonadabu nawe aasuka ati, “Ee, ali kuno nemelile.” Yeu nawe avwanga ati, “Ndi cakuti avino citenzi, ndema umwi kasa.” Nawe avino acita, nga Yeu amwazwa ku kwela mwi celeta lyakwe.

¹⁶ Yeu avwanga ati, “Tuye kuno, uilolele vino nkuipelesya kuli Yawe.” Nga yapita nawe mwi celeta lyakwe.

¹⁷ Lino yafika ku Samaliya, Yeu akoma akazi kakwe Aabu yonsi asile kuku. Ayakoma wakwe muno Yawe wavwangile muli kasema Eliya.

Yakapepa yakwe Baali yonsi yakomwa

¹⁸ Lyene Yeu akonganika antu yonsi pamwi nga ayanena ati, “Aabu watumikilanga Baali panono sile. Lelo nemo namamutumikilanga wakwe cimwi.

¹⁹ Acino fwandi mungamile yakasema yonsi pyu yakwe Baali, na yonsi yano yakamupepa, pamwi na yasimapepo yakwe yonsi. Mutaleka umwi asyale, pamulandu wakuti nkasi kupeela impolelwa ikulu sana kuli Baali. Wensi atalazanwa kweneko alakomwa.” Lelo Yeu wacisile cii mu usomvi pakuti aonone yonsi akapepa Baali.

²⁰ Alino Yeu avwanga ati, “Konganikini antu pakuti kuye ukupepa Baali.” Nga antu yuma imbila wakwe cimwi.

²¹ Lyene Yeu atuma amazwi konsi umu mpanga ya Izlaeli, nga na yonsi apepanga Baali yiza. Kutasiile nanti wenga. Alino yonsi kwene yingila mu ng'anda ikulu yakwe Baali cakuti mutasile incende nanti imwi.

²² Alino Yeu anena uwasunganga ivyakuzwala vya mapepo, ati, “Letela yakapepa yakwe Baali imingila.” Acino umuntu wiyo ayaletela imingila.

²³ Pacisila cakwe cico alino Yeu na Yeonadabu umwana umonsi wakwe Lekabu yingila mu ng'anda ikulu yakwe Baali. Yeu pali pakunena yakapepa yakwe Baali ati, “Mulwenge monsi monsi nu kusininkizya ukuti aomvi yakwe Yawe yasi pano pakasi kinu, suka sile yayo akapepa Baali.”

²⁴ Acino Yeu na Yeonadabu yingila ku kupeela impolelwa na mawila yakoca kuli Baali. Lilyo ala Yeu wataika antu yamwi apanzi ukufika ku mpendwa ya makumi cinani, nu kuyanena ati, “Antu yonsi ali mu ng'anda ii yamapepo muyakome. Wensi amaleka umuntu umwi pali yaa apuuke, ale wene amafwila penepo.”

²⁵ Lino Yeu wamala ukupeela impolelwa yakoca, apeela ilamulo kuli yakalinda na yakapitao yao ati, “Lyene ingilini muyakome yonsi pyu. Mutaleka nanti wenga apuuke.” Nayo fwandi ali pakwingila mwenemo, nga yakoma yonsi pyu ku lupanga. Yakalinda na yakapitao yao iyakulila ivyala vya antu yaya ukunzi. Alino yaya yingila mu muputule wa mukasi ka ng'anda ikulu ilya yakwe Baali.

²⁶ Alino yakululula ulucesi lwamuzilo lwa ng'anda ikulu ilya yakwe Baali nga yaloca.

²⁷ Fwandi ali vino yononyile ulucesi lulo ulucindame kumwi ni ng'anda ikulu yakwe Baali, nga na antu yaisangula icimbusu ukufika na pilelo kwene.

²⁸ Ali vino Yeu walesizye upefi wakwe Baali mu mpanga ya Izlaeli.

²⁹ Lelo Yeu atatelelile ukucita iviipe vino umwene Yeloboamu umwana wakwe Nebati wacitanga, vivyo vino walenzile kuti na ina Izlaeli yacita. Atatiile kupepa utwana twa ng'ombe twakwe zaabu ku Betele nu ku Dani.

³⁰ Yawe anena Yeu ati, “Pamulandu wakuti wacitila amu mupanda wakwe Aabu mu musango uno nemwisikulu nakunena kuti ucite, ali cino fwandi nakulaya ukuti ana yako ku kwizafika nu ku mukulo uwalenga cini, ali yano yamayanga aene mu mpanga ya Izlaeli.”

³¹ Lelo Yeu atatekile mu kuyela amalamulo yakwe Yawe, Leza wa ina lzlaeli nu mwenzo wakwe onsi. Wene watwalilile kucita iviipe vino Yeloboamu umwana wakwe Nebati walenzile kuti aina lzlaeli yacita.

Imfwa yakwe Yeu

³² Mu manda kwene yaya Yawe atandika kucefya ukulu wa mpanga ya Izlaeli. Umwene Hazaeli waku Asilya wacimvizye aina Izlaeli mu mpanga yao yonsi.

³³ Watandikile lwaku ufumondaka wakwe Yodani mu mpanga yonsi ya Gileadi, mpaka nu ku kaeya ku musumba wa Aloeli mu mbali ya Luzi lwa Alinoni. Impanga kwene ii ukwika penepo ni mpanga ya Gileadi na Basyani, umwikalanga amu mupanda wakwe Gadi, na wakwe Lubeni, na wakwe Manase.

³⁴ Ivintu vyuze vyonsi vino Yeu wacisile, ni milimo yakwe yonsi, nga na vyonsi vino watukwite, vyalembwa mu lupapulo lwa Milandu yakwe Yamwene ya ina Izlaeli.

³⁵ Lino Yeu wafwile, yamuzisile ukwazikwa ivikolwe vyakwe mu musumba wa Samaliya. Alino Yeowazi umwana wakwe umonsi amupyana pa cilimba ca wene.

³⁶ Yeu wali umwene waku Izlaeli mu musumba wa Samaliya apa myaka amakumi yaili na cinani.