2 Tesalonika 1 - Amazwi Yakwe Leza 2013

¹ Kalata kufuma kuli ne Paulo, na Siluvano, nga na Timoti. Ku antu amwi uvi lyaku Tesalonika, antu yakwe Leza Tata nu Mwene Yesu Klistu.

² Cikuku nu mutende kufuma kuli Leza Tata nu Mwene Yesu Klistu viye namwe.

Upinguzi lino Klistu aliza

³ Mwe ina itu, tulinzile kutaizya Leza nsita zyonsi. Catuzipila kucita cii, pamulandu wakuti utailo winu ukukula cuze nga nu kutemwana pakasi kinu kukukulilako.

⁴ Uli mulandu uno swemo tukaitumika pamulandu winu mu mauvi yakwe Leza. Swemo tukaitumika pa kutwalilila kwinu ukwa kuposya, nga nu kutaila lino mukupita mu kuzunyiwa nu mu macuzi amuponile.

⁵ Vii vyonsi vikalanga ukuti upinguzi wakwe Leza usi wa lufyengo, nga nu kuti wene akumucita kuya alinge kukuma ku Wene wakwe.

⁶ Leza alacita cisuma pa kuvunuka yao alaleta macuzi panomuli.

⁷ Lelo wene alapeela upemwilo kunomuli mwe muno mukucula nga naswe kwene. Wene alacita cii lilyo lino Mwene Yesu alaloleka kufuma mwiyulu pamwi na angeli yakwe a maka,

⁸ mu cimbilimbili ca moto, kwiza vunuka yao akakana Leza nupya asyataila Ilandwe Lisuma lya Mwene witu Yesu.

⁹ Uvunuko wao ulaya ulovyo umalilike, uwa kupatululwa ku Mwene nu ku maka yakwe alulumbi.

¹⁰ Cii cilacitika pa wanda ulya lino Mwene aliza kuti apelwe lulumbi ku antu yakwe yonsi nga nu mucinzi kufuma kuli yonsi ataila. Namwe kwene mulapendelwako, pano mwataile vino twamunenyile.

¹¹ Uli mulandu uno tukamupepela lyonsi. Swemo tukalenga Leza witu kuti amucite kuya alingane kwikala umi uno wene wamwamako. Lekini Leza mu maka yakwe yonsi, afikilizye kulonda kwinu kwakucita visuma nga nu kuti utailo uleke mucite vivyo.

¹² Mu musango uu izina lya Mwene Yesu lilapelwa lulumbi kufuma kunomuli, nga namwe kufuma kunoli, kupitila mu cikuku cakwe Leza witu ni ca Mwene witu Yesu Klistu.