2 Samueli 7 - Amazwi Yakwe Leza 2013

Natani wafisya amazwi yakwe Leza kuli Davidi

¹ Lyene Davidi wasuka wikala umwi sano lyakwe, na Yawe asuka amucingilila ku anisi yakwe amuzunyanga lililili.

² Nga alino umwene Davidi anena kasema Natani ati, “Si lola nemo nkaikala mu ng'anda ino yakulwa ni mbao zya mukelide. Lelo Mbokosi ya Upangano yakwe Leza yene ikaikala mwi taalu.”

³ Natani aasuka Davidi ati, “Ale mwandi cita consi cino utemilwe, pano Yawe waya nawe pee.”

⁴ Umu wanda kwene uwa, Yawe anena Natani, ati,

⁵ “Pitanga, kanene Davidi umuomvi wane uti, ‘Yawe wavwanga wati, Uzye wewe ulankuulila ing'anda iya kwikala mwenemo?

⁶ Intatala nikala umu ng'anda ukutandika lino nafumizye aina Izlaeli mu Eguputo, ukufika nu wanda wi lelo. Lelo nkaikala umwi taalu monsi muno tukapita.

⁷ Umu ncende zyonsi muno twapisile na ina Izlaeli, uzye natazile inena nanti intunguluzi yonga pa ina Izlaeli, pali yano nasonsile ukutungulula antu yane aina Izlaeli inti uzye pacani cino utankuulila ing'anda ya mbao zya mukelide?’

⁸ “Ali cino, wemo fwandi pitanga ukanene umuomvi wane Davidi uti, ‘Nene ne Yawe Wamaka yonsi, anene nakufumizye kuku kuno wacemanga imfwele, nu kwiza kulasika uwene pa antu yane aina Izlaeli.

⁹ Nayanga nawe konsi sile kuno wapitanga. Nacimvyanga na anisi yako yonsi. Ndakucindamika ukulingana na antu acindamisye apano nsi.

¹⁰ Ndalondela antu yane icifulo cisuma. Ndayalasika cakuti nayo ali muno yalasyalilila umu cifulo kwene cico. Kusi umuntu aalayafumya mwenemo. Aipe nayo yatalatwalilila uku yacuzya wakwe vino yacitanga mpiti,

¹¹ mu manda yalya yano nasonsile intunguluzi zyakuti zyatungulula antu yane aina Izlaeli. Ndayatuula ku anisi yao yonsi nu kukuzya uluko lwako. Anene ne Yawe nalanda kunuli ukuti ndacita vivyo.

¹² Ndi cakuti wafwa, yakuzika ukwalala ivikolwe vyako, indasonta umwana wako wenga pali yano waivyalila nu kumucita umwene. Nu wene wakwe ndaukomya sana.

¹³ Mwana wako ali wino alankuulila ing'anda, nani ndalenga kuti ana yakwe yace yalondekana ukuya aene, amanda pe.

¹⁴ Nani ndaya isi, nawe alaya umwanane. Ndamunyamba wakwe vino isi wa muntu akakalipila umwana.

¹⁵ Lelo kwene ntalata ukumuyela uluse, wakwe vino nacisile kuli Saulo, wino nafumizye pa wene kuti we Davidi uye umwene.

¹⁶ Uluko lwako nu wene wako vilayelelela amanda yonsi pa manso yane. Nupya uwene wako ulaya uwa manda pe.’ ”

¹⁷ Natani waile anena Davidi amazwi yonsi yano Yawe wamunenyile na vyonsi vino wamusokolwile.

Ipepo lyakwe Davidi ilya kutaizya

¹⁸ Lyene umwene Davidi aingila mwi Taalu lya Ukongano, nga aya aikala pansi atandika ukupepa kuli Yawe ati, “We Yawe Simwandalali, uzye nene weni pamwi na akazi kane, pa kunsunga ukufika na pano mpezile?

¹⁹ Asi cico conga, we Yawe Simwandalali, watulunda nu kulanda pa akazi ka muomvi wako na vino uli nu kuyasunga ku nkolelo. Ali muno ukapingwila antu musambazi umwakuti yaikalila.

²⁰ Uzye icani cuze cino ningalanda kuli wewe? Pasi pano wamanya mpiti ne muzya wako.

²¹ Avili vino wemwisikulu walavile, nupya avili vino walondanga. Fwandi icaleka ukuti ne muomvi wako imanye ivintu vii vyonsi, ivikankala.

²² Si lola vino wacindamisya, we Yawe Simwandalali! Kusi umuntu nanti wenga angaya wakwe wewe. Nupya kutaya Leza muze suka sile wewe.

²³ Nupya kusi yano tungakolanya ku antu yako aina Izlaeli, uluko longa pano pansi luno Leza waile ku kukulula ukuti yangaya antu yakwe. Na kuti alumbuke, nga nu kucita ivizungusyo ivikulu ivyakoofya pa kuzinga imitundu ya inamasi kumwi na tuleza twao pa nsita ino antu yako yakwingila mu mpanga ya ulayo ukufuma ku Eguputo kuno wayakulwile.

²⁴ Walenga aina Izlaeli kuti yaye antu yako amanda pe, nu kuti nawe uye Leza wao.

²⁵ “Acino ndakai, we Yawe nkukulenga kuti ufikilizye amalayo yako yano wacita pali nene ne muomvi wako na amu mupanda wane, ukucita ndi muno walavile.

²⁶ Alino lyene izina lyako lilalumbuka nga na antu yalakulumbaya amanda pee yati, ‘Yawe Wamaka yonsi ali Leza wa ina Izlaeli.’ Alino yalasininkizya ukuti ana yane ali mpyanyi zya wene wane.

²⁷ We Yawe Wamaka yonsi, Leza wa ina Izlaeli, pamulandu wakuti watuvwanga kuli nene ne muomvi wako uti, ‘Ndatoola ana yako, ayano yace yaya pa wene,’ ali cino nu kupama natimpama pa kupepa ipepo lii.

²⁸ “We Yawe Simwandalali, wewe uli Leza! Wemo ukafikilizya amalayo yako lyonsi, nupya watundaya nu ulayo uu, utaizipila.

²⁹ Acino nkukulenga kuti upolelele amu mupanda wane ne muomvi wako, kuti yatwalilile ukuya nu longo umuyayaya. Pasi pano we Yawe wayapolelela mpiti, nga yalaya apolelelwe umuyayaya.”