2 Samueli 5 - Amazwi Yakwe Leza 2013

Davidi yamulasika pa cilimba ca wene waku Izlaeli nu ku Yuda

¹ Lyene antu amu mitundu yonsi iya ina Izlaeli yiiza kuli Davidi ku Hebuloni nga yavwanga yati, “Sweswe namwe twaya awazi onga.

² Ku mpiti, lino Saulo wali umwene awewe kwene watungululanga aina Izlaeli umu nkondo. Yawe nawe wakulavile ukuti ulatungulula antu yakwe nu kuya umwene wao.”

³ Ali vino aikolo amu Izlaeli yaile ku mwene Davidi ku Hebuloni, nga umwene apangana nayo kuku kwene pa manso yakwe Yawe. Alino iyapaka Davidi amafuta iyamulasika uwene wa Izlaeli.

⁴ Davidi wali ni myaka amakumi yatatu iyakuvyalwa lino watandike ukuteeka, nga wateesile imyaka amakumi yani.

⁵ Wene wateesile umu Hebuloni umu mpanga yakwe Yuda imyaka cinimbali ni myezi mutanda. Alino umu Yelusalemu namo wateesile imyaka amakumi yatatu na itatu.

⁶ Umwene Davidi na antu yakwe waile ku Yelusalemu ku kuzanza aina Yebusi, aikalanga kweneko. Aina Yebusi nayo iyanena umwene Davidi yati, “Utakutala wingile muno. Impafu ni vilema kwene vitanga kuta kuti wingilemo.”

⁷ (Lelo Davidi apokolola umusumba wao wi linga uwa Zioni, umusumba nga iyawama ukuti “Umusumba wakwe Davidi.”)

⁸ Uwanda kwene uwa Davidi auzya antu yakwe ati, “Uzye umwi wapata aina Yebusi ndi vino nayapata, cakuti angaya akayakome? Lyene pitini muli yamwimbwe nga mukome antu yaya asi na maka nupya impafu.” Uli mulandu umuvwango ukati, “Impafu ni vilema vitangingila mu ng'anda yakwe Yawe.”

⁹ Pacisila cakupokolola umusumba wi linga, Davidi aikala mwenemo nu kuutemela izina ati, “Umusumba wakwe Davidi.” Aukuulilila ukuzinguluka, ukutandikila sile ku Milo mpaka nu kwingila umukasi.

¹⁰ Amaka yakwe Davidi yavulilangako sile, pamulandu wakuti Yawe Leza Wamaka yonsi wali nawe.

¹¹ Lyene Hilamu umwene waku Tuli atuma inkombe kuli Davidi ni vilongelelwa ivya uculuzi. Wayalongelizye imilando ya mikelide, pamwi na yakawaza ya mbao na yakaconga ya mawe, nga nayo iyakuulila Davidi isano.

¹² Davidi pali pakwiluka ndi vino umu cumi Yawe aliwe watamuzumilizya ukuya umwene wa Izlaeli nga nu kucindamika uwene wakwe pamulandu wa antu yakwe aina Izlaeli.

¹³ Pacisila lino Davidi wafuma mu Hebuloni, wene asenda aci nayauze kumwi na aci yampiti umu Yelusalemu, nga yamuvyalile ana nayauze aonsi na anaci kwene.

¹⁴ Yaa, ali mazina ya ana yakwe avyalilwe umu Yelusalemu: Syamua, Syobabu, Natani, Solomoni,

¹⁵ Ibaala, Elisyua, Nefegi, Yafiya,

¹⁶ Elisyama, Eliyada na Elifeleti.

¹⁷ Lino aina Filisti yuvwa ukuti Davidi iyamupaka amafuta nu kumulasika uwene wa Izlaeli, iyafuma ni vita vyamaka, iyaya ku kumulondalonda, lelo Davidi auvwa pali cii nga atentemukila ku musumba wi linga ku kuzina.

¹⁸ Lyene aina Filisti yiza yasansantika umu Cifoloma ca Lefaimu amuno yikala.

¹⁹ Acino Davidi auzya Yawe ati, “Uzye ningaya nkalwisye aina Filisti? Uzye umapeela aina Filisti umu makasa yane?” Yawe aasuka ati, “Ee, yanga ukayalwisye, pano icumi kwene namayapeela umu makasa yako.”

²⁰ Acino Davidi aya ku Baali Pelazimu, nga ayacimvya kuku kwene. Alino avwanga ati, “Yawe watatulwila pa ansi yane kwati avino mulamba akapongwela.” Ali vino ni ncende iyo ikaamwa ukuti Baali Pelazimu

²¹ Lino aina Filisti yutwike nu kusya utuluwi twao papa kwene, Davidi na antu yakwe yatusenzile.

²² Lyene aina Filisti iyaswilila ku Cifoloma ca Lefaimu nga iyaya yikala mwenemo.

²³ Acino Davidi auzya Yawe, nga nawe amwaasuka ati, “Apakulwisyanya nayo utayalungama foo. Lelo uye lwaku matundu yao, akuno uzingulukile, ulunga ni miku.

²⁴ Lyene zuwazuwa lino uvwa inswaswa apapela ya muti, uye ukaiteyanye. Nemo ne Yawe namaya nkakukolelele pa kukoma ivita vya ina Filisti.”

²⁵ Acino Davidi acita wakwe vino Yawe wamupile ilamulo, nga akoma aina Filisti nzila yonsi ukufuma ku Geba ukufika ku Gezeli.