2 Petulo 2 - Amazwi Yakwe Leza 2013

Yakasema na yakasambilizya yaufi

¹ Ku mpiti kwalolike yakasema yaufi pakasi ka ina Izlaeli. Mu musango uli onga kwene yakasambilizya yaufi yalaloleka munomuli. Mu nkama yene yalaleta usambilizyo uwakonona nupya usi wa cumi. Yene yalakana musambazi wino wayakulwile. Acino yalailetelela kononwa mukupumikizya.

² Vivyo kwene antu aingi yalalondela misango iya ulenzyo. Acino pamulandu wa vintu vino yakacita, yauze yalavwangila ilandwe lisuma viipe.

³ Pamulandu wa kutemwisya cuma yene yalamusomba na mazwi aucenjezi. Lelo kuvunukwa kwao kwateyanyiziwa mpiti, nu kononwa kwao kukayalolela.

⁴ Leza atapanyizye angeli yano aiifizye. Lelo wayanyepa nu kuyasumbila mu Gehena mu ciwina ca mfinzi, anyepwe yakalolela upinguzi.

⁵ Leza atapanyizye yakaifya amu manda yampiti yakwe Nowa. Wene wayononyile ku manzi, lelo watuuzile Nowa ngaa na antu yauze cinimbali, wino uwakosozile cumi cakulenga antu yacita vyawololoke.

⁶ Leza wavunwike antu amu misumba ii ku moto kuti ciye icilangililo ca cintu cino cilacitikila yakaifya.

⁷ Wene watuuzile Loti, umuntu uwacitanga vyawololoke, wino wanyungulukanga pa vya winyi vino antu yankota yacitanga.

⁸ Muntu wiya uwacitanga vyawololoke watenzi pakasi kao, nga cila wanda wene wanyungulukanga pa kulola nu kuvwa vintu viipe vino yacitanga.

⁹ Cii cikalanga ukuti Leza wamanya ivya kutuula antu asuma ku kweziwa kwao, nga ni vya kuvunuka antu aipe lino yacili yakulolela Wanda wa upinguzi.

¹⁰ Mwene alacita cii maka maka kuli yao akalondela imbunu zyao izya winyi, yao akasula maka yakwe. Yakasambilizya yaa aufi, apame nupya acilumba. Yene yasyacindika yao alulumbi mwiyulu. Lelo yakayatuka.

¹¹ Nanti angala angeli yaya na maka kuluta yakasambilizya yaa aufi, yene yasyayapeela mulandu na mazwi ya ntusi pa manso ya Mwene.

¹² Lelo antu yaa yakoline wa nyama, viumbwa vizenzembe, zino zikalemwa nu kukomwa. Yene yakalanda vintu viipe pa vintu vino yatamanyile. Yene yalononwa wa nyama,

¹³ nupya yalacitilwa viipe pa viipe vino yacitila antu yauze. Yene yakaelenganya ukuti icisuma kuitumpa mu vyamuzangalwe mu nsita zya musanya kuti yazanzye imbunu zyao. Yene yakacita vya winyi, nupya yakamucita insonyi nu kucita usomvi lino yakulya pamwi namwe.

¹⁴ Yene yakaelenganya sile kulongozya. Imbunu yao yakwifya itakwata impela. Yene yakasomba antu mu citeyo cao. Myenzo yao yasambilila kuya nu lwiswa nupya yali ni citipu cakwe Leza.

¹⁵ Yasya inzila ya wololoke, nupya yaponga pa kulondela musango wakwe Balamu mwana wakwe Beoli. Balamu watemilwe impiya pa kuluvyanya kwakwe.

¹⁶ Lelo punda wamulungike pa ciipe cino wacisile. Wene wavwanzile kunoli mwi zwi lya muntu nu kulesyanya cicitwa cakwe ca uwelewele.

¹⁷ Antu yaa yakoline wa tufukoka twaula manzi, nanti wa makumbi akaululwa ni cipupu. Leza wayasungila ncende mu mfinzi ikulu cuze.

¹⁸ Yene yakavwanga mazwi ya cilumba nupya akutumpa. Mu mbunu zyao yene yakasomba antu yano afyuka sile pakasi ka antu aipe.

¹⁹ Yene yakalaya untungwa ku antu onsi, lino aisikulu yali azya ya miyele ino ikaonona. Pano umuntu akaya umuzya wa cintu consi cino camucimvya.

²⁰ Lino antu yasambilile pali Yesu Klistu, Mwene nupya Katuula witu, yene yatuuzilwe ku vintu vikowele ivyamu nsi. Lelo nupya ndi yalemwa nu kutungululwa ni vintu vii ivya winyi, ale lyene yali mu mwata uwipisye kuluta vino yali nkolelo.

²¹ Cange cizipe cuze ndi cakuti yatamanyile nzila ya wololoke, kuluta yafutatile isunde lyamuzilo lino Leza wayapile.

²² Icayacitikile cikulanga ukuti mapinda yaa acumi. Ipinda limwi likati, “Simbwa akaswilila ku kulya malusi yakwe,” nga nalyuze likati, “Kapoli ndi wafulwa nawe akaswilila ku kuivumvunya mu ntipa.”