2 Milandu 9 - Amazwi Yakwe Leza 2013

Namwene waku Syeba watandalila Solomoni

¹ Namwene waku Syeba uvwile vino Solomoni walumbwike. Nawe fwandi ali pakuya uku Yelusalemu, afuma watateyanya na mauzyo akome wakwe cimwi. Apakuya kweneko waile ala watasenda antu nyanya, ingamila zino zyasenzile ubani ni vinyamuti ivikanunkila usaka. Alino na aomvi yano yasenzile amawe ayengese amutengo na zaabu nyanya. Walanga wafika kuli Solomoni, amuuzya vyonsi vino welenganyanga.

² Solomoni nawe amwaasuka pali vyonsi vino wamuzizye.

³ Namwene wilya waku Syeba ali pakulola nu kumanya amano yakwe Solomoni, alola ni sano lyakwe lino wakuuzile.

⁴ Alola ni vyakulya vino Solomoni akulya, alola kumwi na akalamba aomvi yakwe, alola ni miombele ya aomvi ya kwisano na vino yakuzwala pamwi na vino aomvi yapa matebulo yakuzwala apa kwimula. Alino alolekesya na mawila yakoca yano Solomoni akupeela mu Ng'anda ikulu yakwe Yawe. Vyonsi vivyo ivipezya amano yakwe namwene.

⁵ Namwene ali pakunena Solomoni ati, “Fwandi vino nuvwile lino ncili ukwane, ivyakutukuta kwako ni vyapa mano yako, ivyacumi!

⁶ Nemo ntazumilanga vino nuvwanga, suka lyene vino nailolela na manso yane nemwisikulu. Cumi kwene vino nalanga nuvwa ivyapa mano yako ivinono sile. Wemo lyene wemwisikulu walusyapo pali vino antu yakalanda.

⁷ Alongo antu yako! Alongo aomvi yako, yayo akaimilila pa manso yako insita zyonsi nu kuvwa ku mano yako!

⁸ Kalumbanyiziwe Yawe Leza wako! Watalanga apaswe vino watemilwe ukuti uye umwene wakuteeka impanga. Pasi pano watemwa antu yakwe yano waisolwile umwisikulu. Uli mulandu kwene uno wemo wakulasika apa cilimba ca wene pakuti ungayapingwila imilandu ino yakweti umu ulungami nu mu ololoke.”

⁹ Alino namwene wilya apeela Solomoni zaabu umunyome ukulingana manye amatani 5,000. Ni vinyamuti ivingi. Alino nu tumawe twamutengo nato kwene utwingi. Kutatala kwaya ivinyamuti ivinunkile usaka wakwe vino Namwene waku Syeba waletile umwene Solomoni.

¹⁰ (Antu yakwe Hilamu na antu ya mwene Solomoni yaleta zaabu ukufuma uku Ofili nga yamuletela ni mbao kwene zya lukula lutupu izya miti itali yakwe Yupita pamwi nu tumawe twamutengo.

¹¹ Solomoni atoola imbao zizyo apanga mwenemo apakutanta apakwingila mu Ng'anda ikulu yakwe Yawe, nu kupangilako yababatoni na yabanjo akulizya yakiimba ya nyimbo. Ivintu vyamwata uo vitatazile viloleke umu mpanga ya Yuda.)

¹² Umwene Solomoni nawe alongelezya namwene waku Syeba vyonsi vino wamulenzile. Alunda pali vino yakauzinye nawe amakau. Alino lyene namwene wilya pamwi na aomvi yakwe iyaswilila kumwao.

Ivyuma ivyakweti Solomoni

¹³ Cila mwaka umwene Solomoni wapokelelanga zaabu anganyoma amakilogalamu ukucila uku mazimbi amakumi yaili na yasano,

¹⁴ ukulunda apa misonko ino aculuzi anono na akalamba yasonkanga. Yamwene aku Alabya na alasi amu mpanga ya Izlaeli, nayo kwene yamuletelanga siluva na zaabu.

¹⁵ Solomoni wapanzile ni visyangu ivikulu ukulingana ni mpendwa ya myanda iili. Kuli cila cisyangu yengelile kweneko zaabu wino yasula uku nondo wiyo anganyoma amakilogalamu mutanda.

¹⁶ Wapanzile ivisyangu navyuze ivinono penepo ivingafika uku mpendwa ya myanda itatu, nako aengelela zaabu anganyoma amakilogalamu yatatu. Vyonsi vivyo, aviika umu muputule umwi uno yamanga ukuti, “Isano lya Mutengo waku Lebanoni.”

¹⁷ Umwene Solomoni wapanzile ni cilimba ca wene icikalamba sana ica mino ya nzovu nu kucipomela na zaabu musuma cuze.

¹⁸ Cakweti na pakusamilizya amakasa konsi konsi. Nupya cakweti ni vintu vino yapanginkinye kweneko ivyakola yacisama. Vyayelile umu mbali mbali ya mupando, lwa mu mbazo ya cilimba. Lwa pankolelo pali cilimba ca ngazo, cino yengelile zaabu mutuputupu.

¹⁹ Cakweti ni vintu ikumi na viili ivyalolekanga wakwe yacisama, vimilile apa mpela ya ntampulo. Imbali yonga mutanda ni yuze nayo mutanda. Kutatazile kuloleke icilimba icali wakwe cico umu mawene yonsi asyala.

²⁰ Ingako zyonsi zino Solomoni wamwelanga kweneko zyali izyakwe zaabu. Ni viya vyonsi pyu ivyali umu muputule uwamwangwa ukuti “Isano lya Mutengo waku Lebanoni” vyali ivyakwe zaabu musuma cuze. Kutali icapangilwa na siluva, pamulandu wakuti mu manda yakwe Solomoni siluva wali icintu icasilesile.

²¹ Umwene Solomoni wakweti ivyombo ivyayanga uku Tasyisyi vila vikutungululwa na aomvi yakwe Hilamu. Lyonsi apacisila ca myaka itatu yawelanga, iyafuma yalonka zaabu, siluva na mino ya nzovu ukwika penepo na yakolwe ya myamba alino na amu misitu kwene.

²² Umwene Solomoni walusizye yamwene yonsi ali pano nsi uku ukama na mano.

²³ Yamwene yonsi yamuuzyanga apakumanya amano yano Yawe Leza wamupile.

²⁴ Yamwene yonsi yamuletelanga ivya mawila, iviya vyakwe siluva na vyakwe zaabu, ivyakuzwala, ivyanzo ni vinyamuti vinunkile, imfwalasi alino ni nyumbu. Imyaka yonsi avino yacitanga.

²⁵ Solomoni wakweti imiputule amazimbi yani muno wasungilanga amaceleta yakwe ni mfwalasi zyakwe. Wene wakweti ni mfwalasi zya nkondo amazimbi ikumi na yaili. Yamwi yali umu Yelusalemu alino nayauze yali umu misumba yuze.

²⁶ Uwene wakwe walundulwike ukutandikila sile uku Luzi lwa Yufulate mpaka ukufika uku mpanga ya ina Filisti nu ku mupaka waku Eguputo.

²⁷ Lino Solomoni wali apa wene, siluva umu Yelusalemu wali a nyanya, ni miti imikelide nayo yavuzile wa misamvu mu misana ya twamba.

²⁸ Solomoni wakalanga imfwalasi uku mpanga ya Eguputo nu kumpanga zyuze izyasyala.

Umwene Solomoni wafwa

²⁹ Ivintu vyuze vyonsi vino Solomoni wacisile, ukufuma sile pakutandika ukufika nu kumpela ya nsita yakwe ya kuteeka, vyalembwa mu lupapulo lwakwe kasema Natani nu mu lupapulo lwakwe kasema Aiya umwina Syilo alino nu mu viloto vyakwe kasema Ido ivya pali Yeloboamu umwana wakwe Nebati.

³⁰ Umu Yelusalemu, Solomoni wateesile aina Izlaeli yonsi apa myaka amakumi yani.

³¹ Lyene umwene Solomoni afwa, nga yamuzika mwi lindi mu musumba wakwe Davidi isi. Alino Leoboamu umwana wakwe umonsi amupyana pa cilimba ca wene.