2 Milandu 8 - Amazwi Yakwe Leza 2013

Imilimo ino Solomoni waomvile

¹ Casendile Solomoni imyaka amakumi yaili apa kumalila uku kuula Ng'anda ikulu yakwe Leza ni sano lyakwe.

² Pacisila cakwe cico akuululula ni mizi ino Hilamu wamupile. Anena na ina Izlaeli kuti ikale mwenemo.

³ Alino Solomoni aya apokolola ni mpanga yaku Hamati na Zoba.

⁴ Alino akuula na Tadimoli mu lwanga, nga ni misumba yonsi yakusungilamo icuma ino wakuuzile ku Hamati.

⁵ Alino akuululula ni misumba kwene ya Beti Holoni wakupeela alino na Beti Holoni wakwisika, nga aikuulilila na malinga nu kwika imifikilo apa mpongolo.

⁶ Akuula nu musumba waku Baalati, pamwi ni misumba yakwe yonsi umwali inkoma zyakusezezyamo ivintu alino ni misumba yonsi umwakusungilamo imfwalasi na maceleta yakwe. Wakuuzile icili consi cino walondanga ukukuula mu Yelusalemu, mu Lebanoni nga nu mu mpanga yonsi muno wateekanga.

⁷ Antu yonsi yano yasile apa ina Hiti na ina Amoli na Pelizi na ina Hivi na ina Yebusi, aatali aina Izlaeli inkonko,

⁸ kuli kuti amu mupanda wao yano yasiile umu mpanga, yayo yano aina Izlaeli yatakomile, Solomoni ayacita azya akuombela umulaza ukufika na pilelo kwene.

⁹ Aina Izlaeli yene kusi yano Solomoni wapile umulimo wa uzya. Yene wayapile umulimo wakuya ivita vyakwe, na yamusika akalamba ya vita alino na yamusika ya vita vya maceleta ni mfwalasi zyakwe.

¹⁰ Akalamba angalilanga aomvi yakwe Solomoni yali 250, yayo angalilanga amakuule apusanepusane.

¹¹ Solomoni atoola uwakwe, umwana wakwe Falao amukusizya nu mu musumba wakwe Davidi, uku mufumya umu citente campiti icamu Yelusalemu nu kumutwala umu ng'anda yuze ino wamukuulile. Nga avwanga ati, “Awe, cakana sana, atanga aikala umwi sano lyakwe Davidi umwene waku Izlaeli apamulandu sile wakwe nene. Incende zii izyamuzilo nupya ali muno ni Mbokosi ya Upangano yakwe Yawe yikalanga.”

¹² Fwandi Solomoni wapeelanga amawila yakoca apa kavuwa kakwe Yawe kaka kano wakuuzile apankolelo ya muputule uwakwingilila mu Ng'anda ikulu yakwe Yawe,

¹³ ndi vino yalondekwanga cila wanda. Wene wapeelanga impolelwa apakulondela amalamulo ndi muno calembelwa umu masunde yakwe Mose ukulingana na manda yi Sabata, na pa ndoleko ya mwezi, nga na pa vimulo vitatu vya cila mwaka, kuli kuti Cimulo ca Mukate usi na Citutumusi, Cimulo ca Uzombozi ni Cimulo ca Nsakwe.

¹⁴ Solomoni wawakanga sana ivyacitanga isi Davidi. Fwandi nawe wankinye impuka zyakwe yasimapepo umwakuombela incito zyao amanda yonsi. Wankinye na ina Levi aazwilizyanga yasimapepo umu kwimba inyimbo nu kuomba imilimo yuze.

¹⁵ Amalamulo yano Davidi wapile yasimapepo na ina Levi apa misungile ya nkoma muno yakasezezya ivintu na pa milandu yuze iyasyala, vyonsi vyalondelwanga usaka sana.

¹⁶ Alino Solomoni amala imilimo yakwe, ukutandikila sile pano watandike uku kuula umufula wa Ng'anda ikulu yakwe Yawe, mpaka na pano wamalilile, imilimo yonsi yapitanga sile ningo.

¹⁷ Lyene Solomoni aya uku Ezioni Gebeli nu ku Eloti, ivilalo ivyayela uku nkumba yakwe yemba uku mupunda waku Agabu umu mpanga yaku Edomu.

¹⁸ Umwene Hilamu nawe ali pakumutumila ivyombo na antu yafundi ya mato kwene. Yakapisya ya mato yali antu yakwe Hulamu yanyela kwene. Nayo ali pakuya uku mpanga yaku Ofili pamwi na aomvi yakwe Solomoni. Apa kuwela iyaletela Solomoni icuma cakwe zaabu anganyoma amakilogalamu pipi na 16,000.