2 Milandu 7 - Amazwi Yakwe Leza 2013

Ng'anda ikulu yakwe Leza yapeelwa kuli Leza

¹ Walanga sile umwene Solomoni wamala ukupepa, umoto ufuma nu kwi yulu, oca ivyamawila vino yalanga yatiyapeela nga lyene nu ucindami wakwe Yawe uyengese wiza ulimba Ng'anda ikulu yakwe Leza yonsi.

² Yasimapepo iyaposiwa nu kwingila mu Ng'anda ikulu yakwe Yawe apamulandu wa luswepo lwa ucindami wakwe Yawe.

³ Apakulola icintu cico ica moto uwati upona ukufuma ukwiyulu, nu ucindami wa luswepo lwakwe Yawe, aina Izlaeli yonsi iyakontama suka ivinso vyao vifika na pansi apa ntampulo zya ukwelelo, nu kupepa ala yakutasya Yawe, yati, “Endi Yawe umusuma pasi pano ukutemwa kwakwe kusisila, lelo kukatwalilila umuyayaya.”

⁴ Alino lyene Solomoni pamwi na ina Izlaeli yonsi yapeela impolelwa kuli Yawe pa manso yakwe.

⁵ Solomoni wapile impolelwa yacipambasi 22,000 ni mfwele pamwi ni mbuzi nazyo 120,000. Ali vino umwene Solomoni pamwi na antu yonsi yapaatwile Ng'anda ikulu yakwe Yawe.

⁶ Yasimapepo yimilila umu ncende zino yapilwe ukwimilila mwenemo. Aina Levi ala nayo yatiyalolenkanya amanso na kuko ala yakulizya nu kulumbanya Yawe umu vyakulizizyako inyimbo vino Davidi wasile. Vivi kwene vino waomvyanga apa kwimbila Yawe umu lwimbo ala akuti “Ukutemwa kwakwe kusisila, lelo ukwamuyayaya.” Yasimapepo ala yimilile umu mbalimbali zyao yakulizya intandala. Aina Izlaeli asyala yonsi nayo kwene ala yatiyimilila.

⁷ Solomoni apaatula Ng'anda ikulu yakwe Leza kumwi ni ncende iya yonsi ino yali apakasi ka musolo wapa mulola wa ng'anda ipepo apamulandu wakuti ali pano wapelelanga amawila yakoca, na mafuta afumile ku mawila ya utandano. Wene wacisile cii pamulandu wakuti kavuwa ka mukuwa kali akanono cakuti atange alonge penepo amawila yakoca, na mawila ya mbezu nga ni viputulwa vya mafuta.

⁸ Alino lyene Solomoni pamwi na ina Izlaeli yonsi yazevya uwanda ukulu uwa nsakwe apa manda cinimbali pamwi na antu nyanya ukufuma uku wingililo wa Lebo Hamati ukufika uku luzi lwaku mupaka waku Eguputo.

⁹ Apa wanda uwalenga cinani iyapepa ipepo ilya kupapata apa maifyo yao. Pasi pano apa manda cinimbali antu yayo yapaatwile kavuwa nga mu manda cinimbali nayauze iyazevya cimulo cico.

¹⁰ Alino apa wanda uwalenga amakumi yaili na yatatu umu mwezi wakwe cinimbali, Solomoni aleka ukuti antu yaswilile kumwao. Nayo apakuswilila ale yatiyazanga nu kuzanga wakwe cimwi umu myenzo yao apamulandu nu usuma onsi uno Yawe wacitile Davidi, Solomoni nu mutundu wakwe uwa ina Izlaeli.

Nupya kwene Yawe walolekela

¹¹ Walanga Solomoni wamala uku kuula Ng'anda ikulu yakwe Leza pamwi ni sano lyakwe, na kali konsi, akalondekwanga ukupanga mu Ng'anda ikulu yakwe Yawe nu mwisano lyakwe kwene,

¹² Yawe wamulolekile usiku nga amunena ati, “Natinuvwa ipepo lyako nupya natimpokelela Ng'anda ii ikulu ukuti apano mumampeelelanga impolelwa.

¹³ “Ndi cakuti nayala amayulu ni mvula yakana ukutonya, nanti nanena makanta ukulya ivilimwa vyao nanti natumila antu impungo,

¹⁴ ndi cakuti antu yane, yano yakaamilwa ukwi zina lyane, yaicefya nu kupepa kunondi, yalondalonda ni cinso cane, nu kuzenzuka ku misango yao ya ukakasi, ale lyene nani ukwiyulu kuno nikala indayuvwa, njayelele uluse apa maifyo yao. Indaleka nu kuti umu mpanga yao muye ivyakulya nyanya.

¹⁵ Nene namasunganga icifulo cii nu kuvwa namauvwanga amapepo yano yamapepanga penepo.

¹⁶ Pano nemo nasolola Ng'anda ii ikulu nu kuiswefya kuti iye incende umwakuti antu yampepa amanda pe. Nemo namaisunganga lyonsi sile nu kuicingilila.

¹⁷ “Lyene wemo ndi umantumikilanga umu cumi wakwe vino so Davidi wacitanga, cikulu sile uwalondela amasunde yane nu kucita ivintu vyonsi vino namakunenanga ukucita,

¹⁸ ale lyene ndasunga ulayo uno nalavile so Davidi icakuti wewe na ana yako mumateekanga aina Izlaeli imyaka yonsi.

¹⁹ “Lelo ndi cakuti wewe na antu yako mwakana ukulondela amasunde yano namupeela, nu kuya ku kutumikila nu kupepa tuleza tuze,

²⁰ ale lyene mucimanye ukuti indamuzinga umu mpanga ino namupeela. Indafuma umu Ng'anda kwene ii ino natinzifya ukuti iye incende yamuzilo, iyakupepela mwenemo. Alino na antu amu mpanga zyonsi yalamusuula mwe ina Izlaeli. Nupya antu yalamulolekesya wa vintu vimwi ivisulwe.

²¹ “Alino nanti Ng'anda kwene ii icindamisye ilasyala itongwa, umuntu wensi wino alapita nu kulolesya penepo alazunguka nu kuuzya ati, ‘Uzye pacani cino Yawe wacitila icamusango uu uku mpanga ii nu ku Ng'anda ikulu kwene?’

²² Nga alino antu nayo yalaasuka yati, ‘Umulandu wa misuli ya ina Izlaeli kuli Yawe Leza wao wiyo uwa yafumizye umu Eguputo umu uzya. Yene yasumvile amano yao kuli tuleza twankandawa, utuluwi tuno yapepanga. Ali mulandu kwene uno Yawe wayaletela isyamo!’”