2 Milandu 6 - Amazwi Yakwe Leza 2013

Solomoni wapeela amalamulo ku antu

¹ Alino Solomoni avwanga ati, “Yawe wavwanga ukuti amaikalanga mwi kumbi litifi.

² Lelo nemo natinkukuulila Ng'anda ikulu icindamisye, icifulo umwakuti ungaikala amanda onsi.”

³ Fwandi alanga aina Izlaeli yonsi akongine yaciimi papa, umwene asenukila kuno yali nga ayapolelela.

⁴ Lyene avwanga ati, “Alumbanyiwe Yawe, Leza wa ina Izlaeli, wino watafikilizya ulayo uno walavile tata Davidi, lino wavwanzile ati,

⁵ ‘Ukutandikila sile pa wanda uno nemwisikulu nafumizye antu yane umu Eguputo, ukwizafika na pilelo kwene, ntatazile nsolole umusumba nanti onga umu mpanga ya mitundu yonsi ya ina Izlaeli umwakuti yangampepela mwenemo. Nupya ntatala nasolola umuntu nanti wenga uwakuti awino atungulula antu yane aina Izlaeli.

⁶ Lelo nemo nasolola umusumba wa Yelusalemu kuti amuno antu yampepela mwenemo, nupya nasolola Davidi kuti ateeka antu yane aina Izlaeli.’ ”

⁷ Solomoni atwalilila ukuvwanga ati, “Ukuya kwene, tata Davidi walondanga uku kuula Ng'anda ikulu yakwe Leza iya kupepela mwenemo Yawe, Leza wa ina Izlaeli.

⁸ Lelo Yawe wanenyile tata Davidi ati, ‘Pamulandu wakuti wemo wacisile icisuma pa kukwata ipange lya kunkuulila Ng'anda ikulu muno mulauvwika izina lyane.

⁹ Nanti cili vivyo, asi awewe ulankuulila Ng'anda ikulu awe. Lelo umwanako umonsi, umwanako kololo, aliwe alankuulila Ng'anda ikulu muno mulauvwika izina lyane.’

¹⁰ “Ali cino fwandi musambazi Yawe watafikilizya ulayo wakwe uno wacisile. Nemo napyana tata Davidi apa wene, nga nupya ntenzi apa cilimba ca wene cakwe tata Davidi nu kuteeka aina Izlaeli, wakwe vino Yawe walavile, nupya natinkuula Ng'anda ikulu muno mulauvwika izina lyakwe Yawe, Leza wa ina Izlaeli.

¹¹ Natiniika mwenemo ni Mbokosi ya Upangano, umwaya amawe apapatale yaili, aupangano wakwe Yawe uno wene wapangine na ina Izlaeli.”

Ipepo lyakwe Solomoni

¹² Solomoni ali pakuya imilila apa nkolelo ya kavuwa kakwe Yawe, ala na ina Izlaeli yonsi akongine yakumulola, nga akatusya amakasa umupela.

¹³ Walanga wamata apakwimila apa tumpuke, apa cela ca mukuwa cino wisile apa musolo. Umu mbali zyonsi cali amamita yaili na citika. Ukuya papela namo cali mita wenga na citika. Fwandi apano aya aimilila, nga afukama, ala aina Izlaeli yonsi akongine yakumulola nga atumpula na makasa umupela.

¹⁴ Alino avwanga ati, “Iye, we Yawe Leza, Leza wa ina Izlaeli, umwi yulu na pano nsi mutaya Leza nanti wenga uwaya wakwe wewe.

¹⁵ Pasi pano wemo usifutuka ulayo uno walavile tata Davidi, ali cino wemo ilelo wafikilizya.

¹⁶ Ali cino lyene fwandi, we Yawe Leza wakwe Izlaeli ungala usunge na malayo yano walavile tata Davidi umuomvi wako, lino wavwanzile uti, insita sile zyonsi swe ana yakwe Davidi, wenga uwamu mupanda wakwe tata amaikalanga apa cilimba ca wene, icakuteeka aina Izlaeli, cikulu sile naswe twalondela amasunde yako ningo wakwe vino Davidi umweneco wacitanga.

¹⁷ Iye, we Yawe, Leza wa ina Izlaeli, ndakai si fikilizya vyonsi vino walavile umuomvi wako Davidi.”

¹⁸ “Uzye kwene umu cumi Leza angikala pano nsi pamwi na antu? Vino iyulu litupu nanti lyakula uli litange likukumane. Ale lyene uzye Ng'anda ikulu ii ino natinkukuulila, ali ino ingakukumana?

¹⁹ Iye, we Yawe, Leza wane, ala nemo nene muomvi wako sile. Ungala uvwe ipepo lyane ne muomvi wako kuti uye na mizu kunondi. Uvwa ukulila kwane nga ni pepo lino ne muomvi wako nkupepa pa manso yako.

²⁰ Si amanso inu yalukulolekesya apa Ng'anda inu ii ikulu, umusanya nu usiku. Walaya mpiti ukuti amuno tumakupepelanga. Fwandi lyonsi lino namaizanga umu Ng'anda ino uku kupepa uwanguvwa.

²¹ Uwauvwa amapepo yane na mapepo ya antu yako aina Izlaeli lino yamaizanga mwenemo uku kupepa. Na lino uvwa amapepo yao, uwaelela.”

²² “Ndi cakuti umuntu umwi wapelwa umulandu wa kwifya umuze, alino lyene umuze nawe wamutipwila, nga lyene yamuleta uku kavuwa kuti aize alape umu Ng'anda inu kwene ii ikulu, ukuti uwakaele,

²³ lyene we Yawe uvwe ukupela kuko kuno wikala, nga ucitepo cimwi nu kupingwila aomvi yako umulandu. Wiyo ali nu mulandu umuvunuke apa uyi wakwe nu wakayele nawe uleke aye umuntungwa.

²⁴ “Antu yako aina Izlaeli ndi cakuti anisi yao yayacimvya pamulandu wa kukwifya nga lino yazenzuka nu kwama api zina lyako, yala yakupepa nu kupapata apa manso yako umu Ng'anda kwene ii ikulu,

²⁵ kuko ukwako kuno wikala uwauvwa nu kwelela iifyo lya antu yako aina Izlaeli nu kuyawezya umu mpanga ino we mwisikulu wayapile, nupya ino wapile ni vikolwe vyao kwene.

²⁶ “Lino walesya imvula ukutonya, apamulandu wakuti antu yako yiifya kunuli, nga ndi yapepa ulunga ni ncende kwene ii, yaama api zina lyako nu kuzenzuka apamulandu wakuti wayavunuka,

²⁷ lyene kuko ukwiyulu kuno wikala uwauvwa nu kwelela antu yako aina Izlaeli uluse api ifyo lino yakwifya. Wayasambilizya ukucita ivisuma, uwaleka ni mvula iyatonya apa mpanga ino wapeela antu yako kuti iye icaupyanyi cao.

²⁸ “Na lino icipowe nanti impungo yapona umu mpanga ii, limwi nanti ivyakulya vyononeka uku mvuvuma, nanti makanta nanti ivikwe, nanti lino anisi yazanza antu yako mu musumba wao uli onsi, nanti yaponelwa nu uzanzo uli onsi nanti indwala ili yonsi,

²⁹ wemo uwauvwa amapepo yao. Umwina Izlaeli umwi ndi cakuti wazenzuka nu mwenzo wakwe onsi, wakatusya amakasa yakwe nu kuyalozya uku Ng'anda kwene ii ikulu,

³⁰ wemo uwauvwa amapepo yao. Uwauvwa kuko ukwako ukwiyulu kuno wikala, uwayayelela kweneko nu luse. Wewe wenga sile, awewe wamanya vino umuntu akaelenganya umu mwenzo wakwe. Umuntu ali wensi uwa mulambula ukulingana ni vicitwa vyakwe.

³¹ Ali pakuti antu yako yakukwatila icoopo nupya yakuuvwila amanda yonsi yano yalikala umu mpanga ino wapile ivikolwe vitu.

³² “Umwinamasi wino akaikala umu mpanga mbuze, nga uvwa ululumbi lwako na maka yano wakwata, na vino wemo waya umuiteyanye insita zyonsi ukucita cimwi, alino wiza uku kupepa umu Ng'anda ikulu ino yakwe Leza,

³³ lyene uwauvwa ipepo lyakwe ukwiyulu, kuko kuno wikala, nu kumucitila consi cino wakulenga, pakuti antu yonsi umu mpanga zyonsi yamanye izina lyako nupya yakoopa, ndi vino antu yako aina Izlaeli yakacita, nu kumanya ukuti Ng'anda ii ikulu ino nakuula, ali Ng'anda sile umwa kukupepela.

³⁴ “Wemo ndi wanena antu yako ukuya ku kulwa inkondo na anisi yao, konsi kuno ungayatuma, lino yapepa kunuli ala yalozizye ivinso vyao ulunga nu musumba uu uno wasolola, nga ni Ng'anda ii ikulu ino nakukuulila kuti izina lyako lyauvwika mwenemo,

³⁵ lyene kuko ukwiyulu ukwako kuno wikala uwauvwa amapepo nu kupapata kwao, uwayapeela na maka akucimvya.

³⁶ “Antu yako ndi yakwifya, pasi pano kutaya umuntu nanti wenga asiifya, nga nawe wayasokela nu kuyapeela mu makasa ya anisi yao, nga nayo yayasenda umu uzya ku mpanga mbuze ukutali,

³⁷ lyene mumu kwene umu mpanga muno yali umu uzya ndi yazenzuka nu kuvwanga yati, ‘Twatitwifya, nupya twatituluvyanya apakucita ukakasi,’ yatandika nu kukupepa umu cumi, yalaizya ukuti yata, yapapata pano yaluvyanya, ala we Yawe uwauvwa ipepo lyao.

³⁸ Nga ndi cakuti antu yayo yaweluluka kunuli na mano yao yonsi nga ni myenzo yao yonsi umu mpanga kwene ilya muno yasendwa umu uzya, nga yapepa ala yalozizye ivinso ku mpanga ino wapile ivikolwe vyao, nu ku musumba uno wasolola ni Ng'anda ikulu ino nakuula,

³⁹ wemo uwauvwa amapepo yao nu kupapata kwao, ukwako kuko ukwiyulu kuno wikala. Uwaelela antu yako, yano yakwifya.

⁴⁰ “Ale lyene fwandi we Yawe, ungala uvwe amapepo yano twakutuula umu ng'anda ino nu mu ncende yii.”

⁴¹ “Iye! We Yawe Leza, ale lyene katuka wingile mu cifulo cako, wewe kwene pamwi ni Mbokosi ya Upangano, iili icimanyililo ca maka yako, amuno uwaikalilila amanda pe. Uwapolelela yasimapepo yako umu vintu vyonsi vino yamacitanga. Uwaleka nu kuti antu yako yonsi yakusansamukila pano awewe ukayazanzya cuze.

⁴² Iye! We Yawe Leza, utafumya amanso uku muzya wako, iusya uluse lwako luno wakwatile umuomvi wako Davidi.”