2 Milandu 5 - Amazwi Yakwe Leza 2013

¹ Lino umwene Solomoni wamala uku kuula Ng'anda ikulu yakwe Yawe aika mwenemo iviombelo vyonsi vino isi Davidi wapile kuli Yawe umu ntanta zyamu Ng'anda ikulu yakwe Yawe ivili wakwe zaabu, siluva navyuze ivyasyala.

Yaleta Mbokosi ya Upangano ku Ng'anda ikulu yakwe Yawe

² Alino lyene umwene Solomoni aama aikolo ya mitundu ni nko zya ina Izlaeli kuti yakongane uku Yelusalemu apakuti yingizye Mbokosi ya Upangano ukufuma uku Zioni, umusumba wakwe Davidi nu kuikusizya mu Ng'anda ikulu yakwe Yawe.

³ Lilyo lino yakongine, cali apa nsita ya manda makulu a nsakwe, umu mwezi wakwe cinimbali, umwipukutu.

⁴ Alanga intunguluzi zyonsi zyakongana, aina Levi ali pa kukatusya Mbokosi ya Upangano ilya.

⁵ Alino yasenda Mbokosi ya Upangano uku Ng'anda ikulu yakwe Leza. Lyene iyatandika nu kuya uku Ng'anda ikulu yakwe Leza. Yasimapepo pamwi na ina Levi yasenda ni Taalu lya Ukongano kwene, kumwi ni viya vyonsi ivyali mwenemo.

⁶ Umwene Solomoni na ina Izlaeli yonsi akongine pamwi na aliwe, yimilila inkolelo ya Mbokosi ya Upangano, ala yakupeela impolelwa izingi zya mfwele ni ng'ombe, ivitangapendwa foo.

⁷ Lyene yasimapepo yasenda Mbokosi ya Upangano nu kuingizya mu Ng'anda ikulu yakwe Leza. Yaya yaiteka apa Ncende Yamuzilo kuluta umwisika ya mapa yakwe yakelubi.

⁸ Fwandi amapa yakwe yakelubi yasapalile nu kuvimbilikizya Mbokosi ya Upangano yonsi pyu kumwi ni mitembo ino yaipingile kweneko.

⁹ Imitembo ino yapingile Mbokosi ya Upangano yatalimfile icakuti impela zyalolekanga, ukufuma umu mbokosi apa nkolelo ya muputule wi Taalu, lelo ukufuma ukunzi ya Ncende Yamuzilo kwene italolekanga. Na ndakai kwene icili kuku kwene.

¹⁰ Umukasi ka Mbokosi ya Upangano mutaya mwenemo nanti acimwi suka sile amawe yaili apapatale yano Mose wisile mwenemo ukufuma apa Mwamba wa Holebu, lino Yawe wapangine na ina Izlaeli lino yafumile uku Eguputo.

Ucindami wakwe Yawe

¹¹ Lyene lino yafuntuka umu Ncende Yamuzilo kuluta (pano yasimapepo yonsi azanyilwepo alanga yatiyaizilizya nu kufuntuka ku mpuka zyonsi.)

¹² Alino aina Levi yonsi ali yakiimba ya nyimbo, ivili wakwe Asafu, Hemani na Yedutuni pamwi na ana yao aonsi na akazi kao apano yali. Alanga yatiyazwala ni nsalu izitelepelele, ala yimilile lwaku ufumondaka wa kavuwa, yakulizya iviwaya, na yababatoni na yabanjo. Ala yali pamwi na yasimapepo 120 yakulizya ni ntandala.

¹³ Yakiimba ya nyimbo na yakalizya ya ntandala yonsi yapomokela capamwi nu kulumbanya Yawe ni zwi lyonga sile. Api zwi lyakufuma umu ntandala ni vyakulizizya vyuze, yonsi pamwi yasanzula izwi lyao nu kulumbanya Yawe yati, “Endi, Yawe umusuma, pasi pano uluse lwakwe ulwa muyayaya.” Lino yasimapepo yafuma mu Ng'anda ikulu yakwe Yawe, ikumbi liiza ilizula mu Ng'anda ikulu yakwe Yawe, nga iliyengesa apakulanga ucindami wakwe Yawe.

¹⁴ Yasimapepo iyaposiwa ukuomba imilimo yao ya mapepo apamulandu ni kumbi lilyo, pasi pano ucindami wakwe Yawe wazile mu Ng'anda ikulu yakwe Leza.