2 Milandu 36 - Amazwi Yakwe Leza 2013

Umwene Yeowazi waku Yuda

¹ Alino antu amu mpanga yasonsile Yeowazi umwana umonsi wakwe Yosiya nu kumulasika apa cilimba ca wene umu Yelusalemu mu cifulo cakwe isi.

² Yeowazi wali ni myaka yakuvyalwa amakumi yaili na itatu apa nsita ino watandike ukuteeka, nga wateesile mu Yelusalemu imyezi itatu.

³ Pacisila cakwe vii, umwene waku Eguputo amufumya mu Yelusalemu, nga amusenda wa munyepwe. Lyene aika nu musonko uwakuti impanga yakwe Yuda yalipila icuma cakwe Siluva icinganyoma amakilogalamu 3, 400 na zaabu amakilogalamu 34.

⁴ Neko watozile Eliakimu, umwina wakwe Yeowazi, nu kumulasika pa cilimba ca wene waku Yuda na Yelusalemu. Asenula ni zina lyakwe ati umaamwangwa Yeoyakimu. Yeowazi wene asendwa uku Eguputo kuli Neko kwene.

Yeoyakimu umwene waku Yuda

⁵ Yeoyakimu wali ni myaka yakuvyalwa amakumi yaili na isano lino watandike ukuteeka, nga wateesile mu Yelusalemu imyaka ikumi na onga. Wene wacitanga inkota pa manso yakwe Yawe Leza wakwe.

⁶ Umwene Nebukadineza uwaku Babiloni wizile ukwiza lwa inkondo nawe. Lyene amulema nu kumunyepa umu minyololo nga amusenda ku Babiloni.

⁷ Nebukadineza wasenzile ivyuma vimwi ivyamu Ng'anda ikulu yakwe Yawe aya aviika nu mwisano lyakwe uku Babiloni.

⁸ Ivintu vyuze vyonsi vino Yeoyakimu wacisile, ukwika penepo ni vintu viipe vino wacisile wakwe vino yasokolwile ivya muzewanya, vyalembwa mu lupapulo lwakwe yamwene amu Izlaeli nu mu Yuda. Yeoyakini umwanakwe umonsi uwa mupyanyile apa wene.

Umwene Yeoyakini waku Yuda

⁹ Yeoyakini wali ni myaka yakuvyalwa ikumi na cinani apa nsita ino watandike ukuteeka, nga wateesile mu Yelusalemu imyezi itatu na manda ikumi. Nawe kwene wacitanga iviipe apa manso yakwe Yawe.

¹⁰ Walanga umwaka wasenuka, nawe kwene umwene Nebukadineza amusenda uku Babiloni wa munyepwe. Alunda penepo nu kusenda ivyuma navyuze ivyamu Ng'anda ikulu yakwe Leza, avitwala ukwakwe. Ali pakutoola Zedekiya umwina awino apyanikizya apa cilimba ca wene waku Yuda na Yelusalemu.

Umwene Zedekiya waku Yuda

¹¹ Zedekiya wali ni myaka yakuvyalwa amakumi yaili na onga apa nsita ino watandike ukuteeka mu Yuda, nga wateesile mu Yelusalemu imyaka ikumi na onga.

¹² Wene wacitanga inkota pa manso yakwe Yawe Leza wakwe, nupya ataicefizye pa manso yakwe kasema Yelemiya, uwavwanzile amazwi yakwe Yawe.

Ukuwa kwakwe Yelusalemu

¹³ Zedekiya wasangukile umwene Nebukadineza nanti walavile apa manso yakwe Leza ukuti alamuombela nu kumuyela. Wene wakanyile sana ukuswilila kukutontela Leza, wa ina Izlaeli.

¹⁴ Alino akalamba yonsi yasimapepo kumwi na antu kwene yalunduluka ukuntaya acumi, yala yakulondela imisango iipe ya mitundu yuze iyazingulwike. Umu mipepele ya tuluwi, iyasuka yakowezya ni Ng'anda ikulu yakwe Yawe ino Yawe umweneco wacisile ukuya iyamuzilo.

¹⁵ Yawe Leza wa vikolwe vyao walanga watwalilila ukuyatumila yakasema, aya nu luse apa antu yakwe alino ayapokolola nga apokolola ni Ng'anda yakwe ikulu.

¹⁶ Lelo yene yasulanga yakasema yayo nu kuyaseka. Lyene umukuya manda Yawe wasuka wasoka, icakuti lyene pasi pano yangafyukila.

¹⁷ Icaleka lyene Yawe wasuka wayatumila umwene waku Babiloni uku kuyazanza, wiyo uwizile akomola alumendo yonsi amu mpanga ya Yuda, nu mu Ng'anda ikulu yakwe Leza, ukwaula kusya nanti wenga, umulumendo nanti umukazyana, umukombe nanti umukoloci. Leza ayapeela yonsi kwene mu makasa yakwe.

¹⁸ Nebukadineza umwene waku Babiloni wasenzile ivyuma vyonsi pyu vyamu Ng'anda ikulu yakwe Leza kumwi ni vyuma vya mwene kwene, avitwala uku Babiloni.

¹⁹ Alino aoca ni Ng'anda ikulu yakwe Leza nu kuwisya ilinga lya musumba wa Yelusalemu kumwi na masano kwene nu konona ivintu vyamutengo ivyali mwenemo.

²⁰ Ali pakusenda yao asile impondo ayatwala uku Babiloni kuko kuno yaile yamuombela nga yaombela na ana yakwe kwene mpaka nu kukwiza kwa wene waku Pesya.

²¹ Acino fwandi icintu cino Yawe wavwanga ukupitila muli yakasema ali wakwe Yelemiya, casusile cafikiliziwa icikati, “Impanga yi ilasunga Isabata apa nsita yonsi ino ilikala iyononeke mpaka ikasuke ikasyukile ukupuza kwi Sabata, myaka amakumi cinimbali isuke ipite.”

Kilusi wapeela ilamulo ku Ayuda kuti yaswilile kumwao

²² Umu mwaka wakutandikilapo wa kuteeka kwakwe Kilusi umwene waku Pesya, apa kufikilizya amazwi yano wavwanzile ukupitila muli kasema Yelemiya, Yawe akatusya ilango muli Kilusi umwene waku Pesya ukuti aume imbila zuwa iyakuti ilembwe nu kuiwelenga apalwalala monsi monsi umwapeezile uteko wakwe. Imbila iyo iyakuti,

²³ “Kilusi umwene waku Pesya wavwanga wati, ‘Yawe, Leza wa mwiyulu wampeela amawene yonsi apanonsi, nupya wansonta kuti imukuulile Ng'anda ikulu umu Yelusalemu umu mpanga ya Yuda. Umuntu ali wensi uwa munomuli nupya uwamu antu yakwe Leza, angaswilila kweneko. Yawe Leza umwene wakwe aye na aliwe.’ ”