2 Milandu 34 - Amazwi Yakwe Leza 2013

Yosiya umwene waku Yuda

¹ Yosiya wali ni myaka yakuvyalwa cinani apa nsita ino watandike ukuteeka, nga wateesile mu Yelusalemu imyaka amakumi yatatu na onga.

² Yosiya wacitanga ivintu ivisuma pa manso yakwe Yawe, ndi vivyo ivyacitanga Davidi icikolwe cakwe. Walondelanga usaka amasunde yonsi yakwe Yawe.

Yosiya watamola incende zya mapepo muno yacindikilanga utuluwi.

³ Umu mwaka wakwe cinani uwa kuteeka kwakwe Yosiya, ale acili sile akalumendo ka myaka ikumi na mutanda, wene watandike ukupepa nu kucindika sana Yawe Leza wakwe Davidi icikolwe cakwe. Ipapita sile imyaka ini, atandika ukutamola incende zizi muno yapepelanga tuleza utuluwi kumwi nu unkolanya wakwe ka leza kanaci ka Asyela. Atamola nu tuluwi tuze tonsi utwasyala.

⁴ Apela ilamulo ku antu yakwe nga nayo iyatamola tuvuwa twakwe tuleza Tubaali. Aonona nu tuvuwa twakocelapo ubani utwali lwa papela ya tuvuwa tutu twakwe Tubaali, nga asyunola na maunkolanya yakwe Asyela, kumwi nu tuluwi tuze tonsi utwasyala. Ali pakutoola ulukungu lwaviko, nga yalunyungulula nu kuya lunyunya pa ntumba zya antu yano yapeelanga impolelwa kunotuli.

⁵ Aocela na mafupa yakwe yasimapepo apa tuvuwa twao, nga vivyo ali vino umwene Yosiya wazifizye nupya impanga ya Ayuda nu musumba uwamu Yelusalemu.

⁶ Umu musango uli umwi kwene avino acita umu misumba yuze yonsi nu mu mpanga ino yalimanga mwenemo, umu mipaka yakwe Manase, Efulemu na mwakwe Simeoni, ukufika sile nu ku katutu lwa kwimani uku mpanga yakwe Nafutali.

⁷ Aonona utuvuwa na maunkolanya yakwe Asyela, asyunola ni viluwi nu kukomola utuvuwa tonsi utwakocela penepo ubani. Alino aswilila mwenemo ku Yelusalemu.

⁸ Umu mwaka uwalenga ikumi na cinani uwa kuteeka kwakwe Yosiya, nupya lilyo ala wamala umulimo wa kuzifya impanga ni Ng'anda ikulu yakwe Yawe, ali lino Yosiya watumile Syafani umwana umonsi wakwe Azaliya, na Maaseya, umulasi uwamu Yelusalemu, na Yowa umwana umonsi wakwe Yoazi, kalemba mukalamba, ukuti yangaya ku kuzifya Ng'anda ikulu yakwe Yawe, Leza wakwe.

⁹ Fwandi nayo ali vino yaile kuli Hilikiya Simapepo Mukulu iyamupeela nu lupiya luno aina Levi aombanga umu Ng'anda ikulu yakwe Leza yakolonganike ku ina Efulemu, aina Manase nu ku ina Izlaeli yano yapuswike. Alino ukwika penepo na zino yakolonganike uku Ayuda yonsi, nu ku ina Benjamini nu ku ikazi yamu Yelusalemu.

¹⁰ Hilikiya nawe atoola impiya zizyo nu kupeela yayo angalilanga umulimo wakuzifya Ng'anda ikulu yakwe Yawe. Nayo kwene ali zino yatoola nu kulipila

¹¹ yakawaza ya mbao na yakakuula kuti yakale mwenemo imbao na mawe akuzifizya vikulwa vino yamwene a Ciyuda yatazyezile, pipi nu kononeka.

¹² Antu yano yaomvile umulimo uo yali akalawane wakwe cimwi. Yakapitao yao a Yaati na Obadiya, yano yali amu luko lwakwe Melali. Alino na Zakaliya na Mesyulamu, uwamu luko lwakwe Koati. Aina Levi yonsi yali acenjele sana umu kulizya ivyakulizizya inyimbo.

¹³ Aina Levi yauze, nayo yangalilanga asendanga iviombelo. Yauze nayo yangalilanga antu umu milimo ipusanepusane. Yamwi yasunganga impapulo umwalemvilwe imilandu. Yamwi nayo yali a yakalinda.

Yazana ulupapulo lwa masunde yakwe Leza

¹⁴ Lino yafumyanga impiya umu muputule uno yazisezezyanga, simapepo Hilikiya azana ulupapulo lwa Masunde yakwe Yawe yano Yawe wapile Mose.

¹⁵ Nawe Hilikiya ali pakutandika ukunena Syafani ati, “Nemo natola ulupapulo lwa Masunde mukwene mu ng'anda ikulu yakwe Yawe.” Ali pakupeela Syafani ulupapulo lulo.

¹⁶ Syafani nawe ali pakutwalila umwene Yosiya. Amunena ati, “Twatituomba ivintu vyonsi vino watukonkomizye.

¹⁷ Twatitutola ulupiya lonsi ulwali mu Ng'anda ikulu yakwe Yawe, nu kupeela yakapitao na yafundi aombanga umulimo.”

¹⁸ Alino kalemba Syafani atwalilila ukunena umwene ati, “Ulupapulo luno Hilikiya wali wampela, aulu!” Syafani nawe ali pakutandika ukuwelengela umwene ivyalembwa mwenemo.

¹⁹ Lino umwene Yosiya uvwa vino yamuwelengela umu lupapulo, awe mukwai ali pakulepola ivyakuzwala vyakwe apa kulanga amizu.

²⁰ Alino apeela ilamulo kuli Hilikiya, Aiikamu umwana umonsi wakwe Syafani, Abadoni umwana umonsi wakwe Mika, na Syafani uwali a kalemba, alino na Asaiya cilolo mukalamba ati,

²¹ “Pitini mukanguzizye kweneko kuli Yawe, muzizyeko na antu yano yasyala penepo mu Izlaeli nu mu mpanga ino kwene iya Yuda. Mulondelezye apamulandu na masunde yano yalembwa mu lupapulo luu.”

²² Hilikiya na antu yano umwene Yosiya watumile ali pakukatuka nu kuya uzya kasema umwanaci, wino izina lyakwe a Hulida, uwikalanga mu Yelusalemu, umu citente icipya. Iya wali a Syalumu umwana umonsi wakwe Tokati, nupya umwizikulu wakwe Hasila. Syalumu ali wino wasunganga vyakuzwala vyakwe yasimapepo ivyamu Ng'anda ikulu yakwe Yawe. Fwandi ali vino yamutuzile umulandu uo.

²³ Hulida nawe ayanena ati, “Yawe, Leza wa ina Izlaeli wavwanga ukuti yangini mukanene umuntu uwatamutuma kunondi muti,

²⁴ ‘Yawe wavwanga wati, ndapezya Yelusalemu kumwi na antu akaikala mwenemo. Ndafikilizya amazwi yano yalembwa mu lupapulo kwene lulo ulwati luwelengwa pa manso ya mwene waku Yuda.

²⁵ Nemo yansangukila, yatandika nu kocela tuleza tuze ubani. Yene yansosya umwenzo pali vyonsi vino yacita. Nani ne Yawe nasokela aina Yelusalemu nupya ntalezya nu kuwezya umwenzo.

²⁶ Lelo unene umwene waku Yuda, uwatakutuma ku kwiza uzya ne Yawe, ukuti vii avino Leza wa ina Izlaeli wavwanga apamulandu na mazwi yano watiuvwa,

²⁷ pasi pano waicefizye, wazenzuka pa manso yane. Walepozile ni vyakuzwala vyako apakulanga ulanda. Wemo uvwile vino napingwile Yelusalemu na ikazi yamwenemo. Nemo fwandi natinuvwa ipepo lyako.

²⁸ Ali cino wemo utalakuma ku ucuzi uno ndaponyezya Yelusalemu. Ndaleka ukafwe imfwa iyalongo.’ ” Antu nayo fwandi ali vino yawelulwike uku mwene Yosiya yaya yamulandila na mazwi kwene yaa.

Umwene Yosiya waswilizya ukupangana na Yawe Leza

²⁹ Umwene Yosiya akonganika intunguluzi zyonsi pyu izyamu mpanga ya Yuda, nu mu Yelusalemu.

³⁰ Ali pakuya ku Ng'anda ikulu yakwe Yawe pamwi na antu yonsi amu Yuda, na amu Yelusalemu, na yasimapepo na ina Levi, kuli kuti antu yonsi ukutandikila sile pa apina na akama kwene. Alino wene ayawelengela umu Lupapulo lwa Upangano, luno yafumizye mu Ng'anda ikulu yakwe Yawe.

³¹ Lilyo ala umwene Yosiya, aimi mu pipi nu lucesi ulwimililanga yamwene yonsi. Aswilizya nu kulaya upangano wakuti amayelanga sile Yawe. Amasunganga mu cisinka amasunde yakwe ni vipope vyonsi nu kulawaka amasunde ukulingana na muno yalembelwa umu lupapulo kwene lulo.

³² Ali pakulenga amu mutundu wakwe Benjamini na antu yonsi yano yali mu Yelusalemu ukuti yalape ukuti yamasunganga upangano uu. Awe mukwai aina Yelusalemu nayo ali pakulapa, nu kusunga upangano wakwe Leza, Leza wa vikolwe vyao.

³³ Umwene Yosiya ali pa konona utuluwi tonsi utwa ina Izlaeli utwali umu mpanga ilya. Amanda yonsi yano Yosiya watenzi pano nsi, wene walondesyanga wakwe cimwi ukuti aina Izlaeli yatumikila sile Yawe Leza wa vikolwe vyao. Ali vino antu yayo yatwalilile uku tumikila Yawe mu manda yonsi aumi wakwe Yosiya.