2 Milandu 32 - Amazwi Yakwe Leza 2013

Senakelibu wakatusya inkondo pakasi ka Ayuda

¹ Pacisila ca vicitwa visuma vyakwe Hezekiya, Senakelibu umwene waku Asilya aiza azanza impanga yakwe Yuda. Azinguluka imisumba ya malinga nu kupeela ilamulo ku vita vyakwe ukutamola ilinga.

² Hezekiya ali pakwiluka ukuti Senakelibu cino aizile uku kupokolola umusumba wa Yelusalemu.

³ Fwandi ali pakwama akalamba nu kucita icilye nayo. Iyalanda apamulandu wakucinga intulo zya manzi, izyayelile ukunzi ya musumba. Nu kuzumilizyanya yazumilizyanya.

⁴ Nga alino antu yakongana apakuti yakacinge intulo zya manzi yano yakapita umu vyalo, yavwanga yati, “Uzye pacani cino yamwene aku Asilya yangizila kuno yazane amanzi nyanya?”

⁵ Umwene Hezekiya akomelezya ni uvi lyakwe ukuti yapinde ningo nu kulungisya ilinga lya ciumba nu kupanga ulupungu apapela ni ciumba na cuze ica kunzi. Ukulunda penepo alungisya ni cimpinda kuno caongolwike mpiti ku musumba wakwe Davidi. Alino apangila penepo ivyanzo navyuze ivili wa masumo ni visyangu.

⁶ Nupya asonta penepo na akalamba ya vita akutungulula iumba. Ayakonganika uku musolo waku mpongolo ya musumba.

⁷ Nu kuyakonkomezya ati, “Posyini nupya muzyansye. Mutuvwa intete nanti kutovoka apamulandu wa mwene waku Asilya pamwi ni umba lyonsi lino akweti. Wiyo wino waya naswe amanda yonsi umukome sana ukuluta wino ali nayo.

⁸ Wene akweti sile impuka ya vita iya antu. Lelo swemo twakwata Umwene Leza witu uwakutwazwa nu kutulwisizya inkondo zitu zyonsi.” Mukwai antu apa kuuvwa amazwi yakwe Hezekiya umwene waku Yuda, iyakomeleka nu kukomeleka.

Senakelibu watuka Yawe Leza

⁹ Walanga Senakelibu umwene waku Asilya acili umu Lakisyi ni vita vyakwe vimwi, atuma intumi ku Yelusalemu kuli Hezekiya umwene waku Yuda na mazwi akuti,

¹⁰ “Senakelibu umwene waku Asilya wavwanga wati, ‘Uzye mucili mutaile cani, cakuti na ndakai musile mutenzi umu Yelusalemu, umusumba uno twatituzinguluka mpiti?

¹¹ Uzye ale Hezekiya watamutumpika ukuti Yawe Leza winu atalamupeela mu makasa ya mwene waku Asilya? Mulafwa sile ni nzala nu lusala.

¹² Uzye asi aliwe kwene uwatamozile incende zya kupepela mwenemo kumwi nu tuvuwa, nu kunena antu yamwi amu Yuda nu mu Yelusalemu ukuti yapepela Yawe nu kumocela ubani apa kavuwa konga sile?

¹³ Uzye mutamanya vino ivikolwe vyane nani kwene twacita uku mpanga zyuze?

¹⁴ Uzye mwatala muvwa kuno tuleza twa mpanga zyuze twatuula antu yao kuli sweswe? Uzye fwandi icani icingaleka mwaelenganya ukuti Leza winu alamutuula?

¹⁵ Ali cino fwandi mwe yayame mutaleka Hezekiya amutumpike. Mutamuuvwa! Pano kwene, kutatala kwaya Leza wa mpanga ili yonsi uwatuula antu yakwe uku mwene waku Asilya nanti uku vikolwe vyakwe. Fwandi intange intwisike ukuti Leza winu atalamutuula mu makasa yane awe.’ ”

¹⁶ Intumi zyakwe Senakelibu zyalanzile na mazwi nayauze amufulo, akutumfya Yawe na Hezekiya umuomvi wakwe.

¹⁷ Senakelibu walemvile yakalata nayauze umwali amazwi akusausya Yawe, Leza wa ina Izlaeli, ala akuti, “Tuleza twa nsi zyonsi tutatala twatuula antu yatuko nanti yamwi mu makasa yane, vivyo kwene nanti a Leza wakwe Hezekiya kwene atalatuula antu yakwe mu makasa yane.”

¹⁸ Lyene ivita vyakwe Senakelibu ali pakupunda umu lulimi lwa Ciyebulai uku antu amu Yelusalemu yano yali api linga papela, apakuti yayoofye nu kuyatovola nu kuti ciyangupalile uku zanza umusumba ulya.

¹⁹ Yavwanga ivya civwangevwange pali Yawe Leza uwamu Yelusalemu, umu mwata uli umwi kwene uno yakavwangila mwenemo kuli tuleza twao utuluwi, tuno twapangwa ni minwe ya antu.

²⁰ Lyene umwene Hezekiya na kasema Ezaya umwana wakwe Amozi, iyapepa kuli Yawe nu kupunda kunoli kuti ayazwilizye.

²¹ Yawe nawe ali pakutuma umungeli, uwakomozile asilika mu nkambi ya ina Asilya. Fwandi ali vino umwene waswilile uku Asilya ala ni nkopyo zyatizilambalala uku nsonyi. Uwanda umwi ala ali umu ng'anda ikulu yakwe leza wakwe, ana yakwe yamwi yano waivyalile umwisikulu, ali yano yamutotozile na masumo, afwa nu kufwa.

²² Umu musango uo tungati Yawe watuuzile Hezekiya na antu amu Yelusalemu uku maka yakwe Senakelibu umwene waku Asilya. Alino tungati wayatuuzile nu ku anisi yao yauze. Waleka antu kuti lyene yaikala umu longo na antu yauze yano yapalamana nayo.

²³ Antu nyanya yatandike ukwiza uku Yelusalemu, ale yakuleta amawila kuli Yawe nu wila kuli Hezekiya umwene waku Yuda. Icakuti ukufuma papo kwene, impanga zyonsi zyapelanga Hezekiya mucinzi ukalamba sana.

Ulwale wakwe Hezekiya ni cilumba cakwe

²⁴ Umu manda yalya Hezekiya walwile apipi ni mfwa. Ali pakupepa kuli Yawe, nawe amuvwa nga amupeela ni cimanyililo cakuti watamuvwa.

²⁵ Lelo Hezekiya atataizye apa usuma uno yamucitile. Cilumba cakulisye umu mwenzo wakwe. Ali cino ukali wakwe Yawe iupona pali aliwe na pa antu amu Yuda nu mu Yelusalemu kwene.

²⁶ Lyene Hezekiya aicefya nu kuzenzuka ku cilumba cakwe, ndi vino na antu aikalanga mu Yelusalemu yacisile. Icaleka ukali wakwe Yawe utayaponile mu manda ya umi wakwe Hezekiya.

Ukama wakwe Hezekiya nu lulumbi lwakwe

²⁷ Umwene Hezekiya wizile akwata ivyuma sana icakuti umuntu wensi wamupelisye umucinzi. Wakweti inkoma zyakwe umwakusezezya zaabu, siluva, amawe yamutengo, ivyakununkizya ivyakulya, visolelo ni vintu vyuze ivyamutengo cuze.

²⁸ Wakweti inkoma zya vilimwa, waimi na mafuta yakwelekela. Wakweti amakola ya ng'ombe ni vitata vya mfwele ni mbuzi.

²⁹ Pali vyonsi vii, Yawe wamupile ing'ombe ni mfwele izya mwazwilizyanga umu mulimo wa kukuula imisumba yuze.

³⁰ Umwene Hezekiya, aliwe kwene wacinzile intulo yakupela iya luzi lwa Giooni nu kutentemusizya amanzi ulusansa lwa kwisika mu Musumba wakwe Davidi. Hezekiya wali nu longo sana muli vyonsi vino wacitanga.

³¹ Nanti sile lino na alasi yaku Babiloni yatumile uku kumuuzya ivyapa cinjelengwe cimwi icacitike umu mpanga ilya, Yawe wamutazyezile apakumwezya nu kulola ivili umu mwenzo wakwe.

Hezekiya wafwa

³² Ivintu vyuze vyonsi vino Hezekiya wacisile, apa ufuke wakwe ni vicitwa vyakwe, vyalembwa umu viloto vyakwe kasema Ezaya umwana wakwe Amozi mu lupapulo lwakwe yamwene aku Yuda nu ku Izlaeli.

³³ Lyene Hezekiya afwa, nga yamuzika mu nzisi ya amu mupanda wakwe Davidi. Na lino wafwile Ayuda yonsi na ikazi amu Yelusalemu, yamulosizye wakwe cimwi nu kumucindika. Alino Manase umwana wakwe umonsi amupyana pa cilimba ca wene.