2 Milandu 31 - Amazwi Yakwe Leza 2013

Umwene Hezekiya wazifya upefi

¹ Lino vii vyonsi vyasila, aina Izlaeli yano yali kweneko yafuma nga yapita ku misumba yaku Yuda, yatamola incesi nu kuputola ivyaunkolanya vyakwe kaleza kanaci ka Asyela. Iyonona ni ncende zyakupepela penepo tuleza twao kumwi nu tuvuwa mu mpanga yonsi yakwe Yuda, na yakwe Benjamini, na Efulemu, na Manase. Pacisila ca konona vyonsi kwene, aina Izlaeli yaswilila ku misumba yao nu ku mpanga zyao.

² Umwene Hezekiya ali pakupanga cipya cipya impuka zyakwe yasimapepo na ina Levi. Cila muntu umu mpuka yakwe ukulingana ni milimo yakwe, ciye a simapepo nanti umwina Levi. Limwi angaya a simapepo uwa kupeela amawila yakoca nanti amawila ya utandano. Limwi imilimo yakuomba ivyakwazwilizya apa kutaizya nu kwimbila inyimbo apa mpongolo zya Ng'anda ikulu yakwe Leza.

³ Umwene watozile icipande ca vyuma vyakwe umwisikulu, kuti apeele amawila yaa: amawila ya katondo, na mawila ya manguzi, na mawila yapa Masabata, napa wanda wandoleko ya mwezi napa manda yauze amuzilo ndi muno calembelwa mu masunde yakwe Yawe.

⁴ Alino umwene apeela ilamulo ku antu amu Yelusalemu kuti yalete ivyawila nu kupeela yasimapepo na ina Levi ivipande vyao apakuti yaipelesye ukuwaka ukusunga ningo amasunde yakwe Yawe.

⁵ Zuwazuwa lino ilamulo lilyo lyapeelwa, aina Izlaeli nayo zuwazuwa yakolonganika ivizao vyankolelo ivili wa ngano, waini umupya, amafuta yakwelekela, uci navyuze vino yazombwile. Alino yapeela penepo ni cikumi pali cila vyuma vino yalesile.

⁶ Aikazi yonsi pyu amu misumba yamu mpanga ya Yuda nayo kwene yalesile icikumi apa ng'ombe zyao, imfwele zyao kumwi ni vya wila nyanya nu kuvipeela kuli Yawe Leza wao, nga yavitulika mu mitumbamitumba.

⁷ Iyatandika ukukolonganika vya mawila umu mwezi wakwe citatu nu kumalila ukukolonganika umu mwezi wakwe cinimbali.

⁸ Walanga Hezekiya pamwi ni vilolo vyakwe yiza yalola imitumba, yatasya Yawe nga apolelela na antu yakwe aina Izlaeli.

⁹ Hezekiya nawe auzya yasimapepo na ina Levi apa mitumba kwene ilya.

¹⁰ Azaliya Simapepo Mukulu, uwamu luko lwakwe Zadoki, avwanga ati, “Ukutandika sile pano antu yatandikile ukuleta ivyamusangulo uku Ng'anda ikulu yakwe Yawe, tusiulizya ivyakulya nga kukasyala na vimwi penepo. Cino cayela vivyo, umulandu wakuti Yawe wapolelela antu yakwe.”

¹¹ Alino lyene Hezekiya apeela ilamulo lyakuti antu yateyanye inkoma umu Ng'anda ikulu yakwe Yawe. Nga nayo yateyanya umwakuti yasezya.

¹² Lyene yaleta vyonsi ivya musangulo vino antu yasangula. Alino iyika umwina Levi, uwi zina lyakwe Konaniya kuti awino aye kangalila uwakulolekesya pa vintu vivyo. Alino nu wakumwazwilizya a Syimei umwinakwe.

¹³ Aina Levi yauze, ikumi, yapilwe umulimo uwa kuomba umulimo uo, umukwangalilwa na Konaniya na Syimei. Fwandi antu yayo a Yeeiyeli, Azaziya, Naati, Asaeli, Yelimoti, Yozabadi, Eliyeli, Isimakiya, Maati na Benaya. Vyonsi vii vyacitike apa wangalizi wakwe Hezekiya na Azaliya Simapepo Mukulu.

¹⁴ Kole, umwana umonsi wakwe Imuna umwina Levi wino wali a kalinda mukalamba wapa mpongolo yaku ufumondaka wa Ng'anda ikulu yakwe Leza, uwapilwe umulimo wakupokelela amawila yano yapeelwa mukuitemelwa kuli Yawe, nga nakuti aliwe aankanya ningo amawila kwene yayo.

¹⁵ Umu misumba yuze muno mwali yasimapepo wakweti ukwazwiliziwa usaka sana ku ina Levi yamwi aali wakwe Edeni, Miniyamini, Yesyua, Syemaya, Amaliya na Syekaniya. Kwali ukwankanya ivyakulya ku ina Levi kulingana ni milimo yao ino yapeelwa.

¹⁶ Ukulunda penepo, yankanya antu alemvilwe ukulingana ni vyalembwa vyakuvyalwa kwao, kuli kuti aonsi a myaka amakumi yatatu nu kuluta penepo, yao ayanga umu Ng'anda ikulu yakwe Leza ala yakupokelana cila wanda umu kuomba imilimo yakwazwilizya umuntu ali wensi ukulingana ni vifulo vyao.

¹⁷ Yasimapepo yapilwe umulimo wakwazwilizya ang'anda zyao ukulingana ni vyalembwa mukuvyalwa kwao. Vivyo kwene na ina Levi akweti imyaka amakumi yaili nu kuya papela, yapilwe umulimo wakwazwilizya ukulingana ni mpuka zyao zya milimo.

¹⁸ Yasimapepo yalemvilwe pamwi na ana yao anono yonsi, na aci yao, na ana yao aonsi na anaci, umu wikalo wao onsi yano yatantikwa mu kuvyalwa kwao kuu konsi. Pasi pano yene yali acumi apakuiswefya lyonsi ku vintu vyamuzilo.

¹⁹ Yasimapepo, ana yakwe Aloni, yano yikalanga umu mpanga zya mulemvwe umu misumba yao, yakweti antu yao yano yalemvile amazina, apakuti yayazwilizya kweneko umonsi ali wensi uwamuli yasimapepo apakuti angapokelela icipande cino alinzile kukwata nga na wensi uwalemvilwe umu mupanda wa ina Levi.

²⁰ Hezekiya wacisile vyonsi vii umu mpanga yonsi ya Yuda. Wacitanga ivisuma ivilungame nupya ivyacumi apa manso yakwe Yawe Leza wakwe.

²¹ Vyonsi vino wacitanga mu milimo yakutumikila mu Ng'anda ikulu yakwe Yawe nu mukuyela amasunde, wavicitilanga apakulonda Yawe Leza nu mwenzo wakwe onsi. Ali cino wakwatanga ulongo muli vyonsi kwene.