2 Milandu 30 - Amazwi Yakwe Leza 2013

Yateyanya ukulya Cimulo ca Ucilo

¹ Umwene Hezekiya watumiile aina lzlaeli na Ayuda yonsi intumi. Walemvile na yakalata uku antu amu mutundu wakwe Efulemu na wakwe Manase, ayanena kuti yize uku Ng'anda ikulu yakwe Yawe uku Yelusalemu uku kwizazevya Cimulo ca Ucilo ca kucindikilamo Yawe, Leza wa ina lzlaeli.

² Ali cino fwandi umwene pamwi namalombwe yakwe ni uvi lyonsi lyamu Yelusalemu, yuvwana ukuti yangazevya umu mwezi wakwe ciili.

³ Walanga yatiyaposiwa ukuzevya apa nsita ino cazeviwanga apamulandu wakuti yasimapepo avule yataisangulwile nga antu nayo walanga yatali yakongane mu Yelusalemu.

⁴ Fwandi umulandu uo wazanzizye umwene na antu yonsi akongine.

⁵ Nga ali pakwelenganya ukuuma imbila konsi mu Izlaeli, ukutandikila ku Belisyeba mpaka ukufika nu ku mpanga yakwe Dani, apakuti antu yangiiza uku Yelusalemu uku kuzevya Cimulo ca Ucilo cakwe Yawe, Leza wa ina Izlaeli ukulingana ni sunde. Nu kuti cazipa yiize avulisye ukuluta vino cali mu myaka ya kucisila.

⁶ Intumi nazyo ali pakuyela ilamulo lya mwene, nu kusalangana umwayelile aina Izlaeli na Ayuda mu lwamo lwao ulwakuti, “Mwe ina Izlaeli, si mungala muweluluke kuli Yawe Leza winu, Leza wakwe Abulaamu, Isaki na Yakobo, pakuti nawe kwene aweluluke kuli mwemwe mwe muno mwati mupusunsuka umu minwe ya ina Asilya.

⁷ Mutezya ukuya wakwe yaso na ina inu, yao aluvyanyizye kuli Yawe Leza wa vikolwe vyao, nu kuyalovya wayalovizye. Nu kumanya mucimanyile ningo sana cico.

⁸ Ali cino fwandi namwe mutakwata imyenzo ino yaso yakweti. Mwemo mule mucimbe sile kuli Yawe. Izini tulumbanye Yawe uku ncende yamuzilo ino yazilizya calimwi nu kuipolelela. Mutumikile Yawe Leza winu nawe alafuntusya ukali ni cipyu cakwe kuno muli.

⁹ Nga cakuti umucumi mwaweluluka kunoli, ale lyene alalenga kuti yayo alayasenda uku uzya yayele anyonko na ana inu alamulondela apa nsizi, uluse na mizu nu kuyawezezya kumwao. Yawe Leza winu uwa luse ni cikuku. Ndi mwawela kunoli, wene alamupokelela.”

¹⁰ Intumi ali vino zyasalanganile umu misumba ni mizi yonsi ukutandikila umu mpanga yakwe Efulemu na yakwe Manase, mpaka ukufika nu ku mutundu wakwe Zebuluni. Lelo antu kuku yayasoweka nu kuyatumfya.

¹¹ Nga lelo kwaliko yamwi amu mutundu wakwe Asyeli, na wakwe Manase na wakwe Zebuluni, yano yalondesyanga ukuya uku Yelusalemu.

¹² Ikasa lyakwe Yawe lyali na pa antu aku Yuda, kuti aleke ukuti yonsi yakwate amapange na kampingu wa mpomvu umu kulondela iceo cakwe na mazwi ya malombwe yakwe.

Kuzevya Cimulo ca Ucilo

¹³ Fwandi antu nyanya umwi ali pakukongana uku Yelusalemu uku kuzevya Cimulo ca Ucilo ca Mukate usi na Citutumusi. Cali umu mwezi wakwe ciili.

¹⁴ Ali pakutandika ukufumya utuvuwa tuno twali umu Yelusalemu. Yafumya kumwi nu tuvuwa twa kocelapo ubani nu kutusumbila umu Cifoloma ca Kiduloni.

¹⁵ Alino lyene apa wanda uwalenga ikumi na ini uwa mwezi wakwe ciili, iyafyula utwana twa mfwele utwa Cimulo ca Ucilo. Yasimapepo na ina Levi ataisangulwile pasi pa nsonyi mwe! Pasi pano walanga yalaya ukuituula uku mwene alino lyene nupya yatandika ukuizifya apakuti yaye alinge apakutwala amawila yao akoca umu Ng'anda ikulu yakwe Yawe.

¹⁶ Nga alino lyene yaya yimilila apa ncende zyao, ukulinga na vino cifwile ukuya wakwe muno yayanenyile mpiti umu masunde yakwe Mose, umuntu wakwe Yawe. Fwandi ali pakutoola uwazi ku ina Levi, yapeela kuli yasimapepo nayo iyaukanya uku kavuwa.

¹⁷ Apa mulandu wakuti antu avule yataizifizye, yene yaposiwe ukukoma utwana twa mfwele utwakupeela apa Cimulo ca Ucilo. Ali cino fwandi aina Levi yayaombile umulimo uo, yapeela utwana twa mfwele utwa Cimulo ca Ucilo kuli Yawe.

¹⁸ Alino ukulunda penepo yao yonsi afumile ku mitundu ya ina Efulemu, Manase, Isakali na Zebuluni, aingi muno yali yataizifizye foo. Yalile sile Cimulo ca Ucilo ukwaula kuti yalondele amasunde alembwa. Nga lelo Hezekiya wene ayapepela, ala akuti, “Si Yawe, umusuma, aelele sile uluse

¹⁹ wiyo wensi wino wika umwenzo wakwe ku kulondalonda Yawe, Leza wa vikolwe vyakwe, nanti angala wene asi umuswefiwe ukulingana na masunde.”

²⁰ Yawe nawe auvwa ipepo lyakwe Hezekiya nga aelela antu yaya.

²¹ Apa manda cinimbali, aina Izlaeli akongine uku Yelusalemu yazevizye Cimulo ca Mukate usi na Citutumusi ala yakuzanga wakwe cimwi. Alanga aina Levi na yasimapepo yakulumbanya Yawe Leza cila wanda umu nyimbo, ala yakulizya vyakulizizyako inyimbo ivya mwene.

²² Hezekiya nawe wataizye sana aina Levi pali ufundi wao uwa kutungulula umulimo wa kupepa Yawe. Pa manda cinimbali lino yalile vipande vyao nu kupeela amawila ya utandano nga nu kulumbanya Yawe, Leza wa vikolwe vyao. Pacisila ca manda cinimbali yano yapeelanga amawila kuli Yawe Leza wa vikolwe vyao,

Yatwalilila ukuzevya Cimulo ca Ucilo

²³ aina Izlaeli yonsi yazumilizyanyizye ukuti cazipa kuti nupya kwene yazevye icintu cico apa manda cinimbali. Fwandi kwali ukuzevya ni nsansa wakwe cimwi.

²⁴ Umwene Hezekiya wapiile ing'ombe yacipambasi 1,000, alino ni mfwele ni mbuzi nazyo 7,000 izyakulya antu. Alino amakombe nayo yapeela yacipambasi 1,000 ni mfwele ni mbuzi 10,000. Yasimapepo nyanya yene yaisangulwile.

²⁵ Antu yonsi akongine uku Yuda, yazanzile sana pamwi na yasimapepo na ina Levi, na antu yonsi afumile uku Izlaeli, ukwika penepo na ainamasi afumile ku Izlaeli pamwi na yayo yano alanga yikala umu Yudeya.

²⁶ Mu musumba wa Yelusalemu mwali uluzango wakwe cimwi, pasi pano ukufuma mu manda yakwe Solomoni umwana umonsi wakwe Davidi umwene waku Izlaeli kutatazile kucitike icintu nanti cimwi wakwe cii umu Yelusalemu.

²⁷ Yasimapepo na ina Levi yuzizye upolelelo wa mwene Leza Yawe apa antu. Ukwakwe, ukwiyulu, Yawe auvwa amapepo yao nga aasuka.