2 Milandu 29 - Amazwi Yakwe Leza 2013

Hezekiya umwene waku Yuda

¹ Hezekiya wali ni myaka yakuvyalwa amakumi yaili lino watandike ukuteeka, nga wateesile mu Yelusalemu imyaka amakumi yaili na fundimbali. Nyina wali a Abiya umwana umwanaci wakwe Zakaliya.

² Wene wacitanga ivintu ivisuma pa manso yakwe Yawe, ndi vino Davidi icikolwe cakwe cacitanga.

Ukusangululwa kwa Ng'anda ikulu yakwe Leza

³ Mu mwezi wakwe conga uwa mwaka wakwe conga uwakuteeka kwakwe, wene ayula ivisasa vya Ng'anda ikulu yakwe Yawe nga avizifya.

⁴ Lyene aingilamo pamwi na yasimapepo na ina Levi, nga ayakonganika mu musolo waku ufumondaka wa Ng'anda ikulu yakwe Yawe.

⁵ Lyene avwanga ati, “Tezini mwe ina Levi. Muipaatulule mweisikulu nu kuswefya Ng'anda ikulu yakwe Yawe, Leza wa vikolwe vinu. Sisini ivikowezya vyonsi mu Ncende Yamuzilo.

⁶ Ivikolwe vitu vitali vyacumi. Vyene vyacisile iviipe pa manso yakwe Yawe Leza witu nu kumutazyela. Vyene vyasile Yawe, nu kumufutatila.

⁷ Vyene vyayazile ni visasa vya Ng'anda ikulu yakwe Yawe nu kuzimya inyali. Nupya vitoosile ubani nanti ukupeela amawila yakoca ali yonsi mu Ng'anda ikulu yakwe Leza wa ina Izlaeli.

⁸ Caleka ukali wakwe Yawe iuponela pa antu amu Yuda nu mu Yelusalemu kwene. Nga antu yonsi yapeziwa amano nu kuvwa intete pali vino wene wacita kunoyali.

⁹ Ivikolwe vitu vyakomwa ku lupanga, na ana itu aonsi na anaci kwene yasendwa ku uzya pamulandu wa vintu kwene vivyo.

¹⁰ “Lyene ndakai nemo nkwelenganya ukucita upangano na Yawe, Leza wa ina Izlaeli, apakuti ukali wakwe ukulu ufume pano tuli.

¹¹ Mwe ana yane, mutazingota pali ndakai awe, pasi pano Yawe wamusolola kuti mwimilile apa manso yakwe nu kumutumikila, na kuti mwatungulula apa kumupepa nu koca ubani.”

¹² Aina Levi alipo apa nsita ilya aya: amu luko lwakwe Koati a Maati umwana umonsi wakwe Amasai na Yowelo umwana umonsi wakwe Azaliya; amu luko lwakwe Melali a Kisyi umwana umonsi wakwe Abidi na Azaliya umwana umonsi wakwe Yealeleli; amu luko lwakwe Gelisyoni a Yowa umwana umonsi wakwe Zimaa na Edeni umwana umonsi wakwe Yowa;

¹³ amu mupanda wakwe Elizafani a Syimili na Yewele; amu mupanda wakwe Asafu a Zakaliya na Mataniya;

¹⁴ amu mupanda wakwe Hemani a Yeuyeli na Syimei; amu mupanda wakwe Yedutuni a Syemaya na Uzieli.

¹⁵ Yene yakonganike aina yao nu kuiswefya aisikulu, nga lyene yingila mu Ng'anda ikulu yakwe Yawe kuti yaiswefye ndi muno umwene wayapelile ilamulo apakulondela amazwi yakwe Yawe.

¹⁶ Yasimapepo aliyo yingile mu Ng'anda ikulu yakwe Leza kuti yaswefye Ng'anda iyo. Alino yafumizya ukunzi ya musolo wa Ng'anda ikulu yakwe Yawe icintu consi icikowele cino yazanyile mwenemo. Aina Levi nayo pali pakucisenda nga yacitwala ku Cifoloma ca Kiduloni.

¹⁷ Lyene yatandika ulutambi lwa kuswefya apa wanda wakwe conga uwa mwezi wakwe conga. Alino apa wanda wakwe cinani uwa mwezi kwene uwo, yafika pa wingililo wa Ng'anda ikulu yakwe Yawe. Apa manda nayauze yaswefya Ng'anda ikulu yakwe Yawe, nga yamala umulimo uo apa wanda walenga ikumi na mutanda uwa mwezi wakwe conga.

Ng'anda ikulu yakwe Leza yaswefiwa cipya cipya

¹⁸ Lyene lino yamala, iyaya ku mwene Hezekiya nga yamunena yati, “Twatituswefya Ng'anda ikulu yakwe Leza yonsi pyu, na kavuwa ka mawila yakoca kumwi ni viya vyakako vyonsi pyu, ni tebulo ilyakwikapo umukate wamuzilo, kumwi ni viombelo vyaliko vyonsi.

¹⁹ Twatituteyanya nu kuswefya iviya vyonsi vino umwene Aazi wafumizye apa kuntaya uwacumi lino wene wali umwene. Ndakai vyonsi kwene vili inkolelo ya kavuwa ka Mwene.”

²⁰ Katondotondo pa wanda walondelela umwene Hezekiya akonganika intunguluzi zyamu musumba, nga apita nazyo ku Ng'anda ikulu yakwe Yawe.

²¹ Yasenda na yacipambasi cinimbali, na tusuuku cinimbali na yasawe cinimbali kuti yapeele uwila wakwelela amaifyo, uwa akazi ka mwene, nu wa Ng'anda ikulu yakwe Yawe nu wa antu amu Yuda. Umwene apeela ilamulo kuli yasimapepo, amu mupanda wakwe Aloni, kuti yapeele vii vyonsi apa kavuwa kakwe Yawe.

²² Acino nayo yafyula yacipambasi yaya, nga yasimapepo yatoola uwazi nga yaukanya apa kavuwa. Alino yafyula tusuuku tutu nga yakanya uwazi watuko apa kavuwa kaka.

²³ Imbuzi zyakupeela uwila wakwelela kwa maifyo yazileta ku mwene nu ku antu akongine, nga yazikila amakasa.

²⁴ Lyene yasimapepo yafyula imbuzi zizi nu kupeela uwazi waziko apa kavuwa wa wila wakulipila pa maifyo ya ina Izlaeli yonsi, pamulandu wakuti walanga umwene watapeela ilamulo lyakupeela uwila wakoca nu wila wakwelela amaifyo.

²⁵ Lyene umwene alondela ilamulo lino Yawe wapile ukupitila muli Davidi na Gadi, yakasema yakwe, nga na muli kasema Natani. Aika akazi ka ina Levi mu Ng'anda ikulu yakwe Yawe kuti yalizya iviwaya, yababatoni na yabanjo.

²⁶ Acino aina Levi yimilila ala yatiyalema ivyakulizizya inyimbo wakwe vivyo ivyaomvizye umwene Davidi, nga na yasimapepo nayo ala yakweti intandala.

²⁷ Lyene Hezekiya apeela ilamulo ilya kupeela uwila wakoca apa kavuwa. Lino yatandika ukupeela amawila, iyatandika ukwimbila Yawe, ala yakulizya intandala ni vyakulizizya inyimbo ivyaomvyanga umwene Davidi.

²⁸ Alino antu yonsi akongine yakontama pansi yapepa, ala yakiimba yakwimba ni ntandala nazyo zila zikulila. Vii vyonsi ivitwalilila mpaka impolelwa ilya isila yonsi pyu.

²⁹ Lino yamalila ukupeela amawila yaya, umwene pali pamwi nu muntu wensi uwali pamwi na aliwe, afukama pansi nu kupepa.

³⁰ Alino Umwene Hezekiya pamwi ni ntunguluzi zyakwe yapeela ilamulo ku ina Levi ilya kulumbanya Yawe umu mazwi yano Davidi na kasema Asafu yalemvile. Acino umuntu wensi aimbila ni nsansa izikulu ala yonsi yafukime yakupepa Leza.

³¹ Lyene Hezekiya avwanga ati, “Ndakai mwatimuiswefya mweisikulu kuti muombe umulimo wakwe Yawe. Acino palamilini kuno, mulete impolelwa na mawila inu akutaizya uku Ng'anda ikulu yakwe Yawe.” Nga antu yonsi yano imyenzo yao ikasi yaleta amawila yakoca.

³² Impendwa ya mawila yakoca yano antu akongine yalesile yali ndi vii: yacipambasi yali 70, yasuuku yali 100 nga na tusuuku twali 200. Vyonsi vii yavipiile kuli Yawe wa mawila yakoca.

³³ Inyama zino yapile wa mpolelwa zyonsi pamwi zyali ndi vii: yacipambasi 600 ni mfwele pamwi ni mbuzi 300.

³⁴ Lelo nanti cali vivyo yasimapepo yali ncepelwa apakufundula inyama zii zyonsi izya mawila yakoca. Acino akazi kao aina Levi yayazwilizya mpaka yamalila umulimo mpaka na yasimapepo yauze yasuka yaswefiwa. Pasi pano aina Levi yasakamile sana ukuisangulula aisikulu ukuluta yasimapepo.

³⁵ Ukongezya pa mpendwa ya mawila yakoca, pali na mafuta ya mawila ya utandano, na mawila ya vyakumwa yano yali pamwi na mawila yakoca. Avino ulutambi lonsi lwa mipepele yaku Ng'anda ikulu yakwe Yawe lwatandike nupya.

³⁶ Lyene Hezekiya pamwi na antu yonsi iyazanga pamulandu wa vintu vino Leza wayacitila, pasi pano Leza wayazwilizye ukucita ivintu vivyo zuwazuwa.