2 Milandu 28 - Amazwi Yakwe Leza 2013

Aazi umwene waku Yuda

¹ Aazi wali ni myaka yakuvyalwa amakumi yaili apa nsita ino watandike ukuteeka, nga wateesile mu Yelusalemu imyaka ikumi na mutanda. Wene atacitanga ivisuma pa manso yakwe Yawe ndi vino Davidi, icikolwe cakwe, wacitanga.

² Wene wacitanga ivintu iviipe kwati sile ivyacitanga yamwene aku Izlaeli nu kupanga utuluwi twakwengulula utwakuomvya pa kupepa tuleza Tubaali.

³ Aoca nu ubani mu Cifoloma ca Beni Hinomu nu kupeela ana yakwe aonsi wa mpolelwa, apakulondela imisango iipe ya nko zino Yawe wazinzile apa manso ya ina Izlaeli.

⁴ Apela impolelwa nu koca ubani apa ncende zino yakapepela mwenemo, apapela ya twamba, nu mwisika ya cimuti consi icisakate.

Aina Izlaeli yalwa na ina Alamu

⁵ Caleka Yawe Leza wakwe amupeela mu makasa ya mwene waku Alamu. Lyene aina Alamu iyamucimvya nga yasenda na antu yakwe avule uku Damasiko wa anyepwe. Wene wapilwe nu mu makasa kwene ya mwene waku Izlaeli, wiyo uwamucimvizye wakwe cimwi apakukoma antu nyanya akwakwe.

⁶ Mu wanda sile onga Peka umwana umonsi wakwe Lemaliya akoma antu 120,000 aku Yuda, pamulandu wakuti yene yalanga yafutatila Yawe, Leza wa vikolwe vyao.

⁷ Zikili, icita caku Efulemu, cakomile Maaseya umwana umonsi uwa mwene, cikoma na Azilikamu uwali umukalamba wakwisano, na Elikana, uwali wakwe ciili uku mwene.

⁸ Aina Izlaeli yasenda akazi kao aku Yuda wa anyepwe, ni mpendwa yao yali 200,000, anaci pamwi na ana aonsi na anaci kwene. Yasenzile ni visampwe nyanya, vino yatwazile ku Samaliya.

Kasema Odedi

⁹ Lelo kuku kwene kwali kasema wakwe Yawe wino izina lyakwe a Odedi. Wene waile kuku pakuti akomenkane ni mpuka ya vita ino yizile ku kulwa inkondo apa nsita ino vikuswilila ku Samaliya. Anena antu yalya ati, “Yawe, Leza wa vikolwe vinu wamupile ucimvyo pa antu aku Yuda, pamulandu wakuti wene wayasokile. Lelo wene kuku ukwiyulu watalola vino mwatimuyakomola mu ukali winu.

¹⁰ Lyene mwemo mukasi kuti mucite uzya anaci aku Yuda nu ku Izlaeli pamwi na ana yao kwene. Uzye namwe kwene musi ni milandu ino mwacita kuli Yawe?

¹¹ Ale lyene tezini vino namamunena! Tini akazi kinu yano mwasenda wa anyepwe kuti yaswilile kumwao, pasi pano ndi mutacisile vivyo ukali wakwe Yawe umamuponela.”

¹² Lyene intunguluzi zimwi izyamu Efulemu, wakwe Azaliya umwana umonsi wakwe Yeoanani, Belekiya umwana umonsi wakwe Mesyilemoti, Yeizikiya umwana umonsi wakwe Syalumu, na Amasa umwana umonsi wakwe Hadilai, yakatuka kuti yalwe na yayo afisile ukufuma ku kulwa inkondo.

¹³ Yavwanga yati, “Mutalinzile ukuleta anyepwe yayo kuno. Ndi mwacita vivyo lyene Yawe amatupeela imilandu. Uzye mukasi kuti tongezye ukwifya Yawe nu kuya amulandu wakwe cimwi? Pasi pano twatala mpiti umulandu ukulu, nga nu ukali ukulu wakwe Yawe uli pa ina Izlaeli.”

¹⁴ Acino asilika yalya iyata anyepwe yao, kumwi ni visampwe vivya, pa manso ya ntunguluzi na yayo akongine.

¹⁵ Nga antu yaya amilwe ku mazina, iyakatuka nu kusenda anyepwe yalya. Alino pa visampwe vivi iyatola penepo ivyakuzwala nga yazwika anyepwe yonsi ali tupu. Yayapeela vyakuzwala ni ndyatu, ni vyakulya ni vyakumwa, nga yayapaka nu mulembo pa vilonda. Anyepwe yonsi atembokele yayakwezya pali yapunda. Avili vino yayasenda nu kuyaswilizya kumwao ku akazi kao uku Yeliko, umusumba wa tuncindu, nga pacisila nayo yaswilila ku Samaliya.

¹⁶ Apa nsita ilya kwene umwene Aazi atuma amazwi ku mwene waku Asilya kuti aize amwazwilizye.

¹⁷ Nupya aina Edomu yalanga yatiyiza nu kuzanza aikazi amu Yuda nu kusenda antu wa anyepwe.

¹⁸ Pa nsita ili imwi kwene aina Filisti nayo yazanza imisumba yamu misana ya twamba nga nu mu Negebu waku Yuda. Alino yapoka nu kwikala mu misumba ii: Beti Syemesyi, Aiyaloni na Gedeloti, nga na Soko, Timinaa na Gimizo, ukwikapo ni mizi iyazingulwike.

¹⁹ Yawe waponyizye intazi ikulu pa mpanga ya Yuda pamulandu wakwe Aazi umwene wa ina Izlaeli, pasi pano wene wakomelizye ukucita ukakasi mu mpanga ya Yuda, nupya wene atali uwacumi sana kuli Yawe.

²⁰ Caleka Tigilati Pilesa umwene waku Asilya mucifulo cakwazwa Aazi, wene amukanya nu kumuletela intazi.

²¹ Aazi atoola ivintu vimwi ivyamu Ng'anda ikulu yakwe Yawe ni vya mwisano ni vya ana yamwene nga avipela ku mwene waku Asilya, lelo naco kwene citamwazwilizye.

Amaifyo yakwe Aazi

²² Umu nsita ya ntazi zyakwe, umwene Aazi alunduluka sile ukuntaya uwacumi kuli Yawe.

²³ Apela impolelwa kuli tuleza twaku Damasiko, utwamucimvizye. Pasi pano wene welenginye ati, “Pamulandu wakuti tuleza twa ene aku Alamu twatituyazwa, nani namapeela impolelwa kunotuli apakuti tungazwe.” Lelo tuleza tuto utwamuletelile wononesi, ituletelela na ina Izlaeli yonsi.

²⁴ Lyene Aazi akolonganika iviya vyamu Ng'anda ikulu yakwe Leza nga avitamola. Alino ayala ivisasa vya Ng'anda ikulu yakwe Leza nga apanga utuvuwa apitungi lyonsi ilyamu Yelusalemu.

²⁵ Mu musumba uli onsi uwamu Yuda akuula incende zya kupepela mwenemo kuti aocela penepo tuleza tuze ubani nu kulenga Yawe, Leza wakwe isi ukusoka.

²⁶ Ivintu vyuze vyonsi vino wene wacisile nga ni milimo yakwe yonsi, ukufuma ku kutandika mpaka ukufika ku mpela, vyalembwa mu lupapulo lwa milandu yakwe yamwene aku Yuda na aku Izlaeli.

²⁷ Lyene Aazi afwa nga yamuzika umu musumba wa Yelusalemu, lelo yatamuzisile mu nzisi yakwe yamwene aku Izlaeli. Alino Hezekiya umwana wakwe umonsi amupyana pa cilimba ca wene.