2 Milandu 27 - Amazwi Yakwe Leza 2013

Yotamu umwene waku Yuda

¹ Yotamu wali ni myaka yakuvyalwa amakumi yaili na isano apa nsita ino watandike ukuteeka, nga wateesile mu Yelusalemu imyaka ikumi na mutanda. Nyina wali a Yelusya umwana umwanaci wakwe Zadoki.

² Wene wacitanga ivintu ivisuma pa manso yakwe Yawe, ndi vino isi Uziya wacitanga.

³ Yotamu wakuululwile impongolo yakupeela ya Ng'anda ikulu yakwe Yawe nu kuomba umulimo ukulu sana uwa kukuula ilinga lya ncende imwi yamu Yelusalemu ikaamwa ukuti Ofeli.

⁴ Wene wakuuzile imisumba mu mpanga yonsi ya Yudeya, iya myamba ni misumba ya malinga ni mpungu mu mitengo.

⁵ Yotamu akatusya inkondo iyalwa nu mwene wa ina Amoni pamwi na antu yakwe mpaka ayacimvya. Umwaka kwene ulya aina Amoni yamupeela amakilogalamu 3,400 yakwe siluva, na matani 1,000 ya misante ya ngano, na matani 1,000 ya misante ya mbezu zyakwe baale. Aina Amoni yamuletile icipimo cili cimwi kwene umu mwaka wakwe ciili na wakwe citatu kwene.

⁶ Lyene Yotamu akulila kweneko umu maka pamulandu wakuti wene wayelanga Yawe Leza wakwe nu mwenzo onsi.

⁷ Ivintu vyuze vyonsi vino Yotamu wacisile, ukwika penepo ni nkondo ni vintu vyuze vino wacisile, vyalembwa mu lupapulo lwakwe yamwene amu Izlaeli nu mu Yuda.

⁸ Wene wali ni myaka yakuvyalwa amakumi yaili na isano lino watandike ukuteeka, nga wateesile mu Yelusalemu imyaka ikumi na mutanda.

⁹ Lyene Yotamu afwa nga yamuzika mu nzisi ya vikolwe vyakwe mu musumba wakwe Davidi. Alino Aazi umwana wakwe umonsi amupyana pa cilimba ca wene.