2 Milandu 26 - Amazwi Yakwe Leza 2013

Uziya umwene waku Yuda

¹ Lyene antu yonsi aku Yuda iyatola Uziya, uwali ni myaka ikumi na mutanda iyakuvyalwa, nga yamulasika pa cilimba ca wene mu malo yakwe isi Amaziya.

² Aliwe kwene uwakuululwile umusumba wa Eloti nu kuuwezezya ku Yuda apacisila ca mfwa yakwe Amaziya.

³ Uziya wali ni myaka yakuvyalwa ikumi na mutanda apa nsita ino watandike ukuteeka, nga wateesile mu Yelusalemu imyaka amakumi yasano na iili. Nyina wali a Yekoliya, uwaku Yelusalemu.

⁴ Wene wacitanga ivintu ivisuma pa manso yakwe Yawe, ndi vino isi Amaziya wacitanga.

⁵ Wene waipile kuli Leza pa manda yonsi yano Zakaliya wamusambilizyanga pa kukwatila Leza icoopo. Na lyonsi lino waipile kuli Yawe, Leza wamupeelanga ulongo.

⁶ Apa nsita imwi Uziya waile ku kulwa inkondo na ina Filisti, nga awisya ilinga lyakwe Gati, na lyakwe Yabine, alino na lyakwe Asyidodi. Alino akuululula imisumba iyali mu pipi nu musumba wa Asyidodi nga nu mu ncende zyuze izya mpanga ya ina Filisti.

⁷ Leza wamwazwilizye apa kulwa inkondo na ina Filisti na Alungwana aikalanga uku Guli Baali, nga na pa kulwa na ina Meuni.

⁸ Aina Amoni yasonkanga imisonko kuli Uziya, nga nu lulumbi lwakwe ilusalangana konsi mpaka nu ku mupaka waku Eguputo, pamulandu wakuti wene wali uwamaka wakwe cimwi.

⁹ Ukongezya pali vii, Uziya wakuuzile impungu mu Yelusalemu apa mpongolo ya pitungi, na pa Mpongolo ya Cifoloma nga na pa mung'ong'o wa lung'umba nga azikuulilila amalinga.

¹⁰ Pacisila cakwe vyonsi vii, Uziya akuula impungu nu mulwanga kwene nga aimba ni vifula ivivule, pamulandu wakuti wene wakweti iviteekwa nyanya mu misana ya twamba nu mu manyika.

¹¹ Uziya wakweti impuka ya vita ivyamanyile ningo ukulwa inkondo. Yonsi yaa yali umu mpuka ndi muno kalemba Yeiyeli na Maaseya, musika wa vita yateinye. Hananiya, wenga uwamu vilolo vya mwene, uwayangalilanga.

¹² Impendwa yonsi ya ntunguluzi zya vita yali 2, 600.

¹³ Intunguluzi kwene zii zyangalilanga ivita 307, 500, aonsi yano yasambilila ukulwa inkondo icikalale, apa kwazwilizya umwene ukulwisya anisi yakwe.

¹⁴ Uziya wapile ivisyangu, na masumo, ni vimpompo, ni vizwalo vyakuicingilila, na malapwa nga na malegeni ku vita vyonsi.

¹⁵ Mu Yelusalemu namo wapanzile yamasyini, yano yafundi yetetwile, akuomvya apa kufiika inceto nu kuvwinta amawe akulu ukufuma apa mpungu nga na pa matungi akusolelapo. Nu lulumbi lwakwe ilusalanganila konsi konsi, pasi pano Leza wamwazwilizyanga sana mpaka akoma wakwe cimwi.

Uziya wavunukwa apakuya ni cilumba

¹⁶ Lelo lino Uziya waya na maka wakwe cimwi, atandika kuvwa icilumba nga cico icamupulumwisye. Wene atali uwacumi kuli Yawe Leza wakwe. Acino waile umu Ng'anda ikulu yakwe Yawe ku koca ubani pa kavuwa kakocelapo ubani.

¹⁷ Lelo simapepo Azaliya pamwi na yasimapepo yauze asipe yamulondela mwenemo.

¹⁸ Lyene yasimapepo yayo apa kulesya umwene Uziya yamunena yati, “Cisi cisuma kuti we mwene Uziya waocela Yawe ubani. Lelo angacita cico a yasimapepo sile, amu mupanda wakwe Aloni, yano yapaatulwa kuti yaoca ubani. Fuma muno umwi taalu lyamuzilo, pasi pano watiwifya kuli Yawe, nga wene watafumya upolelelo wakwe pano uli.”

¹⁹ Walanga Uziya aimi mu Ng'anda ikulu yakwe Leza apipi na kavuwa ka kocelapo ubani, nu mu minwe yakwe ala alemile icifutikilo, nga asokela sana yasimapepo. Papo kwene aiukila sile waponelwa ni ndwala yakwe tembwe apa usyu.

²⁰ Lino Azaliya Simapepo Mukulu pamwi na yasimapepo yauze yalolekesya umwene ku manso, iyalola ukuti tembwe watamuulukila apa usyu. Caleka zuwazuwa yamufumizya apanzi. Endi, Uziya umwisikulu wacincile ukufumila apanzi, pamulandu wakuti wamanyile ukuti Yawe watamuvunuka.

²¹ Umwene Uziya wakweti tembwe ukufika na pa wanda wa kufwa kwakwe. Pamulandu wakukwata tembwe, wene waile aikala wenga mpo mu ng'anda yuze. Nupya yamusukula ku Ng'anda ikulu yakwe Yawe. Yotamu umwanakwe umonsi uwatozile amalo akwangalila vyakwi sano nu kuteeka antu amu mpanga ilya.

²² Ivintu vyuze vyonsi vino Uziya wacisile, ukufuma sile pakutandika mpaka ukufika na pa mpela, vyalembwa na kasema Ezaya umwana umonsi wakwe Amozi.

²³ Lyene Uziya afwa nga yamuzika pipi ni nzisi ya vikolwe vyakwe uku nzisi yakwe yamwene, pasi pano antu alanga yakuti, “Wene uwakwe tembwe.” Alino Yotamu umwana wakwe umonsi amupyana pa cilimba ca wene.