2 Milandu 25 - Amazwi Yakwe Leza 2013

Amazya umwene waku Yuda

¹ Amaziya wali ni myaka yakuvyalwa amakumi yaili na isano lino watandike ukuteeka, nga wateesile mu Yelusalemu imyaka amakumi yaili na fundimbali. Nyina wali a Yeoadani waku Yelusalemu.

² Wene wacitanga ivintu ivisuma pa manso yakwe Yawe, lelo asi nu mwenzo onsi awe.

³ Wene lino wapokelela amaka yonsi awene, papo kwene akoma aomvi yakwe yao akomile isi, umwene Yoasyi.

⁴ Lelo wene atakomile ana aonsi yakwe Yoasyi, apakulondela ivyalembwa mu Masunde, mu Lupapulo lwakwe Mose, muno Yawe wapeela ilamulo ati, “Akwasi yatalinzile ukukomwa pamulandu wa nkota zya ana yao, na ana nayo yatalinzile ukukomwa pamulandu wa nkota zya akwasi yao. Cila muntu alinzile wafwa apa maifyo yakwe umwisikulu.”

Inkondo na ina Edomu

⁵ Uwanda umwi Amaziya akonganika aikazi amu mpanga ya Ayuda umu mpuka zya vita, ukulingana ni nko zyao, nga alasika yamwi kuti yaye a yamusika ampuka zya vita izimbi na yamwi yaye yamusika ya vita umwanda onga, yonsi yayo amu mutundu wakwe Yuda na wakwe Benjamini. Nga lino wakonganika antu yaa, azana ukuti yayo ali ni myaka yakuvyalwa amakumi yaili nu kuluta, yonsi pamwi yali 300,000, antu aiteinye ukulwa inkondo, yayo asambiliziwe ningo ukuomvya amasumo ni visyangu.

⁶ Wene walipile ni vita 100,000 ivyaku Izlaeli kuti vize vimwazwe ukulwa, apa mutengo wa makilogalamu 3,400 yakwe siluva.

⁷ Lelo umuntu wakwe Leza aiza kunoli nga amunena ati, “Iye we mwene, ivita vii ukufuma ku Izlaeli vitalinzile ukupita nawe, pamulandu wakuti Yawe asi na ina Izlaeli, amu mutundu wakwe Efulemu.

⁸ Nanti angala ungaya ku kulwa iconsi mu nkondo, Leza alakucimvya pa manso ya anisi, pasi pano wene wakwata amaka akwazwilizya na akucimvya.”

⁹ Amaziya auzya umuntu wakwe Leza wilya ati, “Uzye cili uli apa makilogalamu yakwe siluva yano nalipa mpiti ivita vyaku Izlaeli?” Umuntu wakwe Leza aasuka ati, “Yawe angakupa ivilusile pali vivyo!”

¹⁰ Acino Amaziya anena ivita vivi kuti viswilile kumwao, vivyo ivizile kunoli ukufuma ku mpuka yakwe Efulemu. Ivita vivi iviya ni cipyu wakwe cimwi pa antu aku Yuda, alino iviswilila kumwao ala ivisoka wakwe cimwi.

¹¹ Amaziya lyene pali pakuposya nga atungulula ivita vyakwe ku Cifoloma ca Musilya, kuko kuno wakomile antu amazimbi ikumi aku Seili.

¹² Ivita vyaku Yuda navyo kwene ivilema antu apuma amazimbi ikumi, nga iviyasenda apa kansonsi ka mwamba ukunuke nga viyasumba pansi ukufuma papa kwene cakuti yonsi kwene iyaputoka mu vimpilinsya, iyafwa.

¹³ Apa nsita kwene ilya ivita vivi vino Amaziya atazumilizye kuti vipite nawe uku kulwa inkondo, nupya vivi kwene vino walanga wataviswilizya kuno vyafumile, iviya vizanza imisumba yaku Yuda ukutandikila sile ku Samaliya mpaka ukufika ku Beti Holoni. Ivita vivi ivikoma antu amazimbi yatatu nu kusenda ivisampwe nyanya.

¹⁴ Lino Amaziya wawela ku kukoma aina Edomu, wene wawezile ala asenzile tuleza twa antu aku Seili. Alino atwika kuti tuye tuleza twakwe, nga atandika ukutupepa nu kutocela ubani.

¹⁵ Ukali wakwe Yawe iukatukila Amaziya, nga amutumila kasema ku kumunena ati, “Uzye apacani cino ukuuzya kuli tuleza twa antu yaa, ututangatuula antu yatuko mu maka yako?”

¹⁶ Lelo lino acili akulanda, umwene amunena ati, “Uzye wewe twasonta kuti uye mpandamano wa mwene? Si tuzya sile! Ndi watwalilila namapeela ilamulo kuti ukomwe!” Acino kasema wilya ata ukulanda. Lelo avwanga sile amazwi yaa ati, “Manyile ukuti Leza wapanga ukukonona, pamulandu wakuti wacita icintu cii nu kukana ukutezya ku mazwi yane aku kupanzya amano.”

Amaziya walwa inkondo na ina Izlaeli

¹⁷ Pacisila ca kuuzya kuli yampandamano yakwe, Amaziya umwene waku Yuda atuma amazwi kuli Yeoasyi umwana umonsi wakwe Yeowazi, umwana umonsi wakwe Yeu, umwene wa ina Izlaeli, amazwi akumusonka ati, “Iza kuno, umacilola.”

¹⁸ Lelo Yeoasyi umwene waku Izlaeli aswilizya amazwi kuli Amaziya umwene waku Yuda ati, “Cipupa ca myunga caku Lebanoni catumile amazwi ku mukelide waku Lebanoni, iciti, ‘Poma umwanako umwanaci ku mwanane.’ Alino lyene icilyanyi ca mpanga walanga cikupita iciza cilyatola cipupa ca myunga.

¹⁹ We Amaziya, lyene ukuiwanzya ukuti watucimvya aina Edomu. Lelo nkukupanzya amano ukuti ulinzile ukwikala ukwako. Uzye pacani cino ukasi kukatusya intazi nu kuiletelela uzanzo, nga uletelele na antu yako kwene?”

²⁰ Lelo nanti cali vivyo Amaziya atatezizye, pasi pano walanga Leza watapanga ukuyapela mu makasa yakwe Yeoasyi, pamulandu wakuti yene yapefile tuleza twa ina Edomu.

²¹ Acino Yeoasyi umwene wa ina Izlaeli aya ku kulwa inkondo na Amaziya umwene waku Yuda ku Beti Syemesyi.

²² Antu aku Yuda yacimviwe na ina Izlaeli, nga nu muntu wensi apuukila ukwakwe.

²³ Lyene uku Beti Syemesyi akuno Yeoasyi umwene waku Izlaeli walemile Amaziya umwene waku Yuda, umwana umonsi wakwe Yoasyi, umwana umonsi wakwe Aaziya. Alino Yeoasyi amuleta ku Yelusalemu nga aponya ni linga lya musumba wa Yelusalemu ukutandikila sile apa mpongolo yakwe Efulemu mpaka ukufika apa mpongolo yi Tungi. Utali wa mpongolo iyo wali amamita 200.

²⁴ Nga asenda zaabu kumwi na siluva wensi wino yazanyile mu Ng'anda ikulu yakwe Leza wino Obedi Edomu wasunganga. Asenda kumwi ni cuma consi camwi sano na anyepwe kwene, nga aswilila ku Samaliya.

²⁵ Amaziya umwana umonsi wakwe Yoasyi umwene waku Yuda, watenzi imyaka ikumi na isano pacisila ca mfwa yakwe Yeoasyi, umwana umonsi wakwe Yeowazi.

²⁶ Ivintu vyuze vyonsi vino Amaziya wacisile, ukufuma ku kutandika mpaka ukufika uku mpela, vyalembwa mu lupapulo lwa milandu yakwe yamwene aku Yuda na aku Izlaeli.

²⁷ Ukufuma sile apa nsita lino Amaziya wafutatile Yawe, yene yumine akapi nu kumukatukila umu Yelusalemu, nga autukila ku Lakisyi. Lelo yene yatuma antu kuti yamulondelele ku Lakisyi, nga nayo yamukomela kuku kwene.

²⁸ Icala cakwe iyacinyemula nu kucikwezya pa mfwalasi nga yaya yamuzika ku nzisi ya vikolwe vyakwe mu Musumba wakwe Yuda.