2 Milandu 24 - Amazwi Yakwe Leza 2013

Yoasyi umwene waku Yuda

¹ Yoasyi wali ni myaka yakuvyalwa cinimbali apa nsita ino watandike ukuteeka, nga wateesile mu Yelusalemu imyaka amakumi yani. Nyina wali a Zibiya waku Belisyeba.

² Lyene Yoasyi wacitanga ivyawololoke pa manso yakwe Yawe amanda yonsi ya umi wakwe simapepo Yeoyada.

³ Simapepo Yeoyada uwalondile umwene Yoasyi aci yaili, nga yamuvyalile ana aonsi na anaci.

⁴ Pacisila ca kuteeka panono Yoasyi atandika ukuzifya Ng'anda ikulu yakwe Yawe.

⁵ Akonganika yasimapepo yonsi kumwi na ina Levi, nga ayanena ati, “Yangini ku misumba yaku Yuda, mukasonkesye impiya ku ina Izlaeli yonsi izya kuomvya ku kuzifizya Ng'anda ikulu yakwe Yawe cila mwaka. Musininkizye ukuti umulimo uu waombwa muli zuwazuwa.” Lelo aina Levi yazingota ukucita cico.

⁶ Cico icalenzile kuti umwene aame Yeoyada simapepo mukalamba nga amuuzya ati, “Uzye pacani cino utanena aina Levi kuti yasonkesye impiya ku Yuda nu ku Yelusalemu, zino Mose umuomvi wakwe Yawe wapile ilamulo kwi uvi lyonsi lya ina Izlaeli kuti yasonke, izya kuomvya ku milimo ya Ng'anda ikulu yakwe Yawe?”

⁷ Antu yakwe Ataliya, umwanaci mwipe wilya, yatama Ng'anda ikulu yakwe Leza nga yaomvya ni viya vyamuzilo ivyali mwenemo apa kupepa tuleza Tubaali.

⁸ Lyene umwene apeela ilamulo kuti yapange imbokosi yakwika apanzi, pa mulyango wa Ng'anda ikulu yakwe Yawe.

⁹ Alino auma imbila ku antu yonsi aku Yuda nu ku Yelusalemu kuti yize yaletele Yawe umusonko uno Mose umuomvi wakwe Yawe wayapile ilamulo mu lwanga kuti yapeele.

¹⁰ Lyene ivilolo na antu yonsi yatemilwe sana nu kuleta impiya zyao. Yatandika ukusumbilamo impiya umu mbokosi ilya mpaka izula na papela.

¹¹ Ilili lyonsi lino aina Levi yaleta imbokosi ku yaomvi ya mwene, yazananga ukuti yatizulamo impiya. Kalemba wa mwene pamwi ni cilolo cakwe Simapepo Mukulu ayanga yitulula nu kuswilizya imbokosi ilya pa ncende yakweyo. Vii avino yacitanga cila wanda icakuti antu yasonsile impiya izivule wakwe cimwi.

¹² Lyene umwene pamwi na Yeoyada yankanya impiya zizi ku antu angalilanga umulimo. Alino nayo iyalemba akuomba incito, yakaconga ya mawe na yakapala ya mbao akuti yaombele pa kuzifya ningo ningo Ng'anda ikulu yakwe Yawe. Iyalemba na yafundi aomvyanga ivyela nu mukuwa kuti nayo kwene yayemvye Ng'anda ikulu yakwe Yawe.

¹³ Yonsi alemvilwe incito yali aomvi umu cumi nu mulimo watandike ukupita cila wanda ala yakuomvya amakasa yao kwene. Lyene antu yayo yaomvile cakuti yakuululwile Ng'anda ikulu yakwe Yawe ndi muno yayelile apa mpiti ukukoma.

¹⁴ Lino yamala umulimo, yawezya impiya ku mwene na kuli Yeoyada, nga nayo iyaziomvya pa kupangisya iviya vya Ng'anda ikulu yakwe Yawe, ni vyakocela amawila yakoca, nga ni ngeso nga ni viombelo vyuze vyakwe zaabu na siluva. Antu yatwalilila ukupeela amawila yakoca ukwaula ukuta pa manda yonsi yano Yeoyada wali a simapepo mukalamba.

Antu yafutatila inzila zyakwe Yeoyada

¹⁵ Lyene Yeoyada wali umukote cuze, umukombe uwa myaka ivule, nga afwa ala ali ni myaka umwanda onga na makumi yatatu.

¹⁶ Yamuzisile mu musumba wakwe Davidi pamwi na yamwene pamulandu wa visuma vino wacisile mu mpanga ya Izlaeli nupya apa kutumikila Leza kumwi ni Ng'anda yakwe kwene ikulu.

Inkota zyakwe Yoasyi

¹⁷ Lino Yeoyada wafwa, ivilolo vyaku Yuda iviza ku kupakata umwene Yosiya ukwi sano lyakwe, kuti avyuvwila sile. Nga umwene nawe avipokelela nu kuvyuvwila.

¹⁸ Antu lyene iyata ukuya ku Ng'anda ikulu yakwe Yawe, Leza wa vikolwe vyao, yatandika kutumikila unkolanya wakwe Asyela nu tuluwi. Alino ukali wakwe Yawe iuponela aikazi amu Yuda nu mu Yelusalemu kwene.

¹⁹ Nanti cali vii, lelo Yawe atuma yakasema pakasi kao kuti yawezezye antu kunoli. Yakasema yaya lino yatandike ukusoka antu yalya, yene yakanyile ukuvwa.

²⁰ Alino Umupasi wakwe Leza wikila pali Zakaliya, umwana wakwe simapepo Yeoyada. Wene aimilila pakasi ka antu nga ayuzya ati, “Yawe wavwanga wati, ‘Uzye pacani cino musikuyela amalamulo yane? Mutalaya nu longo awe. Pamulandu wakuti mwemo mwamfutatila ne Yawe, mutalaya nu longo awe, nga nani kwene namamufutatila!’ ”

²¹ Antu yalya yapanga kumukoma, nu mwene ayapeela ilamulo, nga nayo yamutama na mawe mu musolo wa Ng'anda ikulu yakwe Yawe mpaka afwa.

²² Umu kucita vivyo, umwene Yoasyi ailila ivisuma vyonsi vino Yeoyada, isi wakwe Zakaliya wamucitilanga, lelo wene akoma umwanakwe. Na lino umwana wilya akufwa, avwanga amazwi yaa ati, “Si Yawe alole icintu cii cino wacita, akuvunuke!”

Impela ya wene wakwe Yoasyi

²³ Pa kusila kwa mwaka, impuka ya vita vyaku Asilya iiza ku kulwa inkondo na Yoasyi. Ivita vivi iviiza ku Yuda nu ku Yelusalemu, nga ivikoma yacilolo pakasi ka antu yalya. Na vyonsi vino vyapokolwile ivituma ku mwene wao ku Damasiko.

²⁴ Nanti angala impuka ya vita vyaku Asilya yizile ni vita vinono, Yawe wavipile ucimvyo kuti vicimvye impuka ilya ya vita vivule ukuviluta, pamulandu wakuti antu yalya yafutatile Yawe, Leza wa vikolwe vyao. Avili vino antu aku Asilya yavunwike umwene Yoasyi.

²⁵ Lino aina Asilya yaya yamusya Yoasyi impondo, aomvi yakwe kwene yumana akapi, yamumalilila pa musanzi wakwe kwene, pamulandu wakuti wakomile umwana umonsi wakwe simapepo Yeoyada. Ali vino Yoasyi wafwile. Acino yamuzika mu musumba wakwe Davidi, lelo ukunzi ya nzisi yakwe yamwene.

²⁶ Antu aumine akapi pa kukoma Yoasyi a Zabadi umwana umonsi wakwe Syimeati, mangu umwina Amoni, na Yeozabadi, umwana umonsi wakwe Syimeliti, mangu umwina Moabu.

²⁷ Ivyapa ana yakwe aonsi, nu usemo uwingi uwa pali aliwe, nga ni vyalembwa vyapa kukuululula Ng'anda ikulu yakwe Leza, vyalembwa mu mpapulo zya ulondolozi wa vicitwa vyakwe yamwene. Alino Amaziya umwana wakwe umonsi amupyana pa cilimba ca wene.