2 Milandu 23 - Amazwi Yakwe Leza 2013

Antu yakatukila namwene Ataliya

¹ Lelo umu mwaka wakwe cinimbali, simapepo Yeoyada asipa umwenzo, nga aama antu yaa ali yamusika akulu ya vita umwanda: Azaliya, umwana umonsi wakwe Yeloamu, Isumeli umwana umonsi wakwe Yeoanani, Azaliya umwana umonsi wakwe Obedi, Maaseya umwana umonsi wakwe Adaya, na Elisyafati umwana umonsi wakwe Zikili.

² Yonsi kwene iyatandalila impanga yakwe Yuda nu kukonganika yasimapepo aku misumba yonsi yaku Yuda kumwi ni ntunguluzi zya nko zya ina Izlaeli. Lyene yonsi yakongana uku Yelusalemu,

³ Ukongano uu wacitike ndi muno yazumilizinye nu mwene kuti yakongane umu Ng'anda ikulu yakwe Leza. Nga Yeoyada atandika ukunena antu akongine ati, “Yoasyi auwi, umwana wa mwene. Wene amaya umwene ndi muno Yawe wavwanzile kulozya ku ana yakwe Davidi.

⁴ Vino mulinzile mucite aevi: Pali mwensi yasimapepo na ina Levi mwe muno mulatumikila pa Sabata, mwankanikane patatu. Iumba limwi lyalinda pa milyango.

⁵ Iumba lyakwe ciili lyalinda kwi sano lya mwene nga ni iumba lyakwe citatu lyalinda apa mpongolo ikaamwa ukuti Mpongolo ya Mufula. Alino antu yonsi asyala yalinzile ukwikala mu misolo ya Ng'anda ikulu yakwe Yawe.

⁶ Mutazumilizya kuti umuntu wensi aingila mu Ng'anda ikulu yakwe Yawe, suka sile yasimapepo na ina Levi yano yaciliomba. Yayo yene yangingila mwenemo pano yene aziliziwe. Antu yonsi yalinzile ukuyela ilamulo lyakwe Yawe.

⁷ Aina Levi yalinzile ukwikala mu musango umwi ala yatiyalizizya umwene, na cila muntu ala akweti canzo umu minwe. Umuntu ali wensi wiyo angalonda ukwingila mu Ng'anda ikulu yakwe Yawe alinzile ukukomwa. Mwikale pipi nu mwene konsi kuno angatemwa ukutandala.”

⁸ Aina Levi na antu yonsi aku Yuda yacisile wakwe muno simapepo Yeoyada wayapelile ilamulo. Cila muntu wizile nu muomvi wakwe uwali nu kuomba pa Sabata kumwi na antu ali nu kukombola yao ali pa luti pano simapepo Yeoyada atayazumilizyanga ukufumapo.

⁹ Lyene alino Yeoyada apeela amasumo ni visyangu ivikulu ni vinono kuli yamusika akulu a vita umwanda onga, vivi kwene vino umwene Davidi waomvyanga, vino vyasungwanga mu Ng'anda ikulu yakwe Leza.

¹⁰ Nga atantamika antu yonsi kuti yacingilila umwene, ala cila muntu alemile insonzo mu minwe, ukutandikila sile ku katutu ka Ng'anda ikulu yakwe Leza mpaka ku kaeya kuno wayelile apipi na kavuwa mpaka na pa mulyango wa Ng'anda ikulu yakwe Leza ala yatiyazinguluka umwene.

¹¹ Cuze cino wacisile, wayafumizizye umwana wa mwene nu kumuzwika ingala nga amupeela nu lupapulo lwa masunde. Pakumalila amulasika apa wene. Alino Yeoyada kumwi na ana yakwe iyamupaka inkula. Nga apali pano antu yonsi yapunda yati, “Si kawala we mwene!”

¹² Lino Ataliya uvwa icongo ca antu ala yakusimwilila kweneko nu kumila umwene utupundu, ayalondelela ku Ng'anda ikulu yakwe Yawe.

¹³ Kuku alola umwene aimi apipi nu lucesi lwakwe lwapa wingililo. Yamusika pamwi na yakalizya ya ntandala ala yali pipi pipi nu mwene. Na antu yonsi amu mpanga ilya ala yakuzanga nu kulizya intandala. Yakiimba ya nyimbo nayo ala yali ni vyakulizizyako inyimbo nu kutungulula mu lutambi lonsi lwa mizevezye. Lilyo kwene walanga Ataliya walola vivi, alepola malaya yakwe nga apunda ati, “Wansangukila! Wansangukila!”

¹⁴ Alino simapepo Yeoyada aleta yamusika ya vita umwanda onga, nga ayanena ati, “Mufumizini panzi pa milongo yonsi ino mwatimutantama, nupya wensi amamulondela mumukome uku lupanga.” Pano walanga simapepo wilya watavwanga ati, “Mutezya kumukomela mu Ng'anda ikulu yakwe Yawe, awe.”

¹⁵ Acino antu yaya yalema Ataliya, nu kumutwala kwi sano lya mwene. Lyene lino yafika pa wingililo uno yatangi Mpongolo yakwe Yakavwalo, mukasi ka musolo wakwi sano, iyamukomela papa kwene.

Simapepo Yeoyada wapangana na antu

¹⁶ Lyene Yeoyada acita upangano uwakuti aliwe na antu pamwi nu mwene kwene yamayanga antu yakwe Yawe kololo.

¹⁷ Lilyo kwene antu yonsi yaa iyakatuka nu kulungama ku ng'anda ikulu yakwe Baali, nga iyaiwongolola. Alino iyavungola utuvuwa twakwe kuli kumwi na maunkolanya yakwe yonsi, nga yalema Matani, simapepo wakwe Baali, nu kumukomela pa nkolelo ya tuvuwa kwene tutu.

¹⁸ Alino Yeoyada asonta yasimapepo ukufuma mu luko lwakwe Levi kuti ayano yalinda ku Ng'anda ikulu yakwe Yawe. Wakwe vino nu mu manda yakwe Davidi wene wayaisile kuti yalinda ku Ng'anda ikulu yakwe Yawe nu kuyapeela umulimo wakupeela amawila yakoca kuli Yawe ndi vino calembwa mu mpapulo zyakwe Mose. Yene yapeela ni nsansa ala yakwimbila, wakwe vino Davidi wayapile ilamulo.

¹⁹ Wene wisile yakalinda pa mpongolo zya Ng'anda ikulu yakwe Yawe pakuti umuntu wensi uwamifitalila atingila mwenemo.

²⁰ Pacisila alino atantamika yamusika ya vita imyanda, ivilolo, ni ntunguluzi zya antu pamwi na antu yonsi aikazi ya mpanga ilya. Lyene yonsi iyasukilila umwene ukufuma ku Ng'anda ikulu yakwe Yawe mpaka iyaya yamwingizya umwi sano lyakwe kwene, yingilila pa mpongolo yakupeela. Alino yateeka umwene pa cilimba ca wene.

²¹ Lyene antu yonsi amu mpanga ilya yazanga. Alino mu musumba ulya muya cele, pamulandu wakuti Ataliya wakomilwe ku lupanga.