2 Milandu 22 - Amazwi Yakwe Leza 2013

Aaziya umwene waku Yuda

¹ Antu amu Yelusalemu yapeela uwene kuli Aaziya, kasuli wakwe Yolamu mu cifulo cakwe isi, pano asalifi yano yizile uku nkambi iyo na Alungwana, alanga yatiyakoma ana aonsi yonsi akulu. Icalenzile Aaziya apyane isi apa wene.

² Aaziya wali ni myaka amakumi yani na iili apa nsita ino watandike ukuteeka, nga wateesile mu Yelusalemu umwaka onga. Nyina wali a Ataliya, umwizikulu wakwe Omuli.

³ Nawe kwene walondelile umusango wa akazi kakwe Aabu, pano nyina wamukomelezyanga ukwifya.

⁴ Wene wifyanga pa manso yakwe Yawe, ndi vino akazi kakwe Aabu yacitanga, pano lino isi wafwile, akazi kakwe kwene amupanzile amano pa milimo yakwe iipe.

⁵ Nupya walondelile umpandamano wao lino watandike ukupitila pamwi na Yolamu umwana umonsi wakwe Aabu umwene waku Izlaeli apakuti yakalwe inkondo na Hazaeli umwene waku Asilya uku Lamoti Gileadi. Aina Asilya iyacisa Yolamu.

⁶ Acino wene aswilila ku Yezileele kuti yakamupozye ivilonda vyakwe vino yamucisile umu ulwi ku Lamoti Gileadi lino yalwanga na Hazaeli umwene waku Asilya. Lyene Aaziya umwana umonsi wakwe Yolamu umwene waku Yuda nawe kwene atentemukila ku Yezileele ku kufwilizya Yolamu umwana umonsi wakwe Aabu. Wene wacisile cico pamulandu wakuti walanga Yolamu yatiyamucisa.

⁷ Lelo Leza wene walanga watateyanyizizya calimwi kuti akuno Aaziya akafwile lino akutandalila Yolamu. Lino Aaziya wafisile kweneko wakatwike pamwi na Yolamu kwene kuti yakomanye Yeu umwana umonsi wakwe Nimisyi, uwasonsilwe na Yawe kuti alovye akazi kakwe Aabu.

⁸ Lino Yeu acili akulolekesya akazi kakwe Aabu, nkumankuma ni ntunguluzi zyaku Yuda pamwi na ipwa yakwe aizile mu kuombela Aaziya, yonsi yaa ayakomela pamwi.

⁹ Iyatandika ukulonda Aaziya mpaka iyamuzana kuno wafisime uku Samaliya. Alino iyamuleta kuli Yeu nga nawe amukoma. Iyazika Aaziya mutupu pano yavwanzile yati, “Wene umwizikulu wakwe Yeosafati, uwatumikilanga Yawe nu mwenzo onsi.” Acino kutali nanti wenga wa kazi kakwe Aaziya uwalingine ukupyana pa wene.

Namwene Ataliya waku Yuda

¹⁰ Lyene lino Ataliya nyina wakwe Aaziya walola ukuti umwana wakwe wafwa, akatuka nu kukomola yonsi akazi ka wene waku Yuda.

¹¹ Lelo Yeosyeba, umwana umwanaci uwa mwene Yeolamu, atolosya Yoasyi nu kumufumya pa ana yonsi pyu a mwene Aaziya yano yali pipi nu kukomwa. Lyene aya amufisa kumwi nu mulezi wakwe ku muputule uze uwakulala kweneko, uwamu Ng'anda ikulu yakwe Yawe. Icalenzile kuti Yeosyeba acite ica musango uu, amuno wene wali umwana wa mwene Yeolamu, nupya umuci wakwe simapepo Yeoyada, na kaci wakwe Aaziya. Fwandi wene wakweti insambu zyonsi izyakufisa umwana ukufuma kwi lovyo lyakwe Ataliya.

¹² Yoasyi wasunzilwe mu Ng'anda ikulu yakwe Leza umu mwata kwene wa kufisamafisama pa myaka mutanda lino Ataliya acili akuteeka impanga ilya.