2 Milandu 21 - Amazwi Yakwe Leza 2013

¹ Lyene umwene Yeosafati afwa, nga yamuzika mu musumba wakwe Davidi ku nzisi ya vikolwe vyakwe. Alino Yolamu umwana wakwe umonsi amupyana apa wene.

Umwene Yolamu uwaku Yuda

² Akazi kakwe, ana aonsi yakwe Yeosafati, amazina yao a Azaliya, Zakaliya, Yeeiyeli, Azaliya, Mikaeli na Syefatiya. Yaa yonsi yali ana aonsi yakwe Yeosafati umwene waku Izlaeli.

³ Isi wayapile ivya wila ivivule ivyamisango misango wakwe siluva, zaabu navyuze ivizipisye cuze kumwi ni misumba iya malinga yaku Yuda. Lelo uwene wene waupile kuli Yeolamu pano wene wali umwana iyeli.

Yeolamu umwene waku Yuda

⁴ Lino Yeolamu wikala apa wene wakwe isi, akoma akazi kakwe yonsi pyu uku lupanga, atwalilila nu kukoma intunguluzi zimwizimwi zyamu Izlaeli.

⁵ Yeolamu wali ni myaka amakumi yatatu na iili apa nsita ino watandike ukuteeka, nga wateesile mu Yelusalemu imyaka cinani.

⁶ Wene wacitanga ivintu iviipe kwati sile ivyacitanga yamwene aku Izlaeli, ndi vino akazi kakwe Aabu yacitanga. Pasi pano wene watwite umwana wakwe Aabu. Wene wacitanga iviipe pa manso yakwe Yawe.

⁷ Lelo nanti cali vivyo Yawe atalondanga ukukoma akazi kakwe Davidi yonsi pamulandu wa upangano na isi Davidi, nupya wamulavile kuti ali nu kupeela Davidi na izikulu ulukozyo lwa manda pe.

⁸ Insita kwene iyo antu aku Edomu iyakatukila utunguluzi waku Yuda nu kuisolwela intunguluzi yao.

⁹ Lyene Yeolamu akolezyanya ni ntunguluzi zyuze izya nkondo ala yasenzile na maceleta yakwe yonsi.

¹⁰ Ukufika na ndakai kwene aina Edomu yakatukila utunguluzi wakwe Yuda. Lilyo kwene alino umusumba wa Libina nao wakatukile utunguluzi wakwe Yeolamu, pano Yeolamu wene wafutatile Yawe, Leza wa vikolwe vyakwe.

¹¹ Apatandikile nu tuvuwa twa kupepelamo utuluwi twaku mpanga ya myamba yaku Yuda. Nupya wene watungulwile na antu aku Yelusalemu kuti yatakwata icumi nu kuponzya aingi aku Yuda.

¹² Alino wapokelile kalata wakwe kasema Eliya uwa kumusopesya nu kumulondolwela ati, “Yawe, Leza wa cikolwe cako Davidi wavwanga wati, ‘Wemo utakulondela icilangililo ca cikolwe cako Yeosafati, nanti cakwe Asa umwene waku Yuda.

¹³ Lelo walondelela icilangililo cakwe yamwene aku Izlaeli, nupya wemo watungulula antu aku Yuda pamwi na antu amu Yelusalemu kuntakwata icumi ndi vino akazi kakwe Aabu yacitanga apa kulenga aina Izlaeli ukwifya. Wakoma akazi kako yano yali ningo ukuluta wewe.

¹⁴ Pamulandu wakwe vyonsi vii, Yawe ali nu kuponyezya impungo pa antu yako yonsi, apa ana yako yakaci alino na pa vintu vyako vyonsi pyu.

¹⁵ Alino wewe wemwisikulu uli nu kulwala indwala ya munda yipisye cuze, ino imakomelangako sile cila wanda, mpaka uwanda umwi amala ni vyamunda vyonsi visuke vikalongolokele pansi.’”

¹⁶ Lyene Yawe wakatusizye Yolamu icipyu pa ina Filisti na pa Alungwana, yao aikalanga pipi na ina Kusyi.

¹⁷ Yene yazanza antu aku Yuda, iyapokolola ivintu vyonsi vino yazanyile umwi sano, nga aci ya mwene ukwikapo na ana aonsi iyayasenda mu uzya. Uwasile wenga a kasuli wa mwene, Aaziya umwana umonsi.

¹⁸ Pacisila cakwe vii, alino Yawe waponyezizye Yolamu indwala yamu mala, ino itangapoziwa.

¹⁹ Pacisila ca nsita imwi, apa kumalila umwaka wakwe ciili, amala yakwe Yolamu iyatandika ukusolomoka mpaka asuka afwa imfwa iwaye wakwe cimwi. Na antu yakanyile nu kumupembela iciziko ca moto, wakwe vino yacitile ivikolwe vyakwe.

²⁰ Yolamu wali ni myaka amakumi yatatu na iili apa nsita ino watandike ukuteeka, nga wateesile mu Yelusalemu imyaka cinani. Lino wafwile kutali umuntu nanti wenga uwakumuvwila ulanda. Iyamuzika mu Musumba wakwe Davidi, lelo ukunzi ya nzisi yakwe yamwene.