2 Milandu 20 - Amazwi Yakwe Leza 2013

Yeosafati wacimvya aina Moabu na ina Amoni

¹ Pacisila ca nsita imwi, aina Moabu na ina Amoni nga na yamwi aina Meuni yiza ku kulwa inkondo na Yeosafati.

² Antu yamwi iyanena Yeosafati yati, “Iumba likalamba sana ukufuma ku mpanga ya Edomu lwaku nkumba yuze yakwe Yemba wa Musilya, lili umu nzila ku kwiza kulwisya. Lyapoka mpiti umusumba wa Hazazoni Tamala” (kuli kuti Engedi).

³ Lilyo kwene Yeosafati auvwa intete nga aelenganya ukulenga amano kuli Yawe nu kupeela ilamulo ku antu yonsi umu mpanga yakwe Yuda kuti yatale yafunge ukulya.

⁴ Antu yonsi pyu aku misumba yaku Yuda iyakongana kuti yalenge uwazwilizyo kuli Yawe, yonsi afumile ku misumba yonsi yamu Yuda yiza ku kulenga uwazwilizyo kuli Yawe.

⁵ Alino Yeosafati aimilila apa nkolelo yi umba lya Ayuda aku Yelusalemu umu Ng'anda ikulu yakwe Yawe pa ncende ipya.

⁶ Alino avwanga ati, “We Yawe Leza wa vikolwe vitu, uzye wewe usi uli Leza wa mwiyulu? Uzye usi wewe wateekanga nu kupingula yamwene ya mitundu yonsi iya antu? Mu minwe yako mwaya amaka nu lulumbi icakuti kusi nanti wenga angacimvyanya nawe.

⁷ Uzye usi wewe wazinzile aikazi ya mpanga ii apa manso ya antu yako aina Izlaeli nu kupeela impanga ii ku amu mupanda wakwe Abulaamu cuza wako mpaka umuyayaya?

⁸ Ndi cakuti yene yikala umu mpanga iyo, yalakukuulila Ng'anda mwenemo umwaku kupepela nga yavwange yati,

⁹ ‘Uzanzo ndi watuponela umu nzila iziipe wa nkondo, impungo nanti ivipowe, tulimilila umu ng'anda kwene ii. Alino tulakuuta kunuli apa macuzi itu, lyene alino namwe muluvwa nu kutwazwa nu kututuula.’

¹⁰ “Lino aina Izlaeli yafumile uku Eguputo, utazumilizye kuti aina Amoni, na ina Moabu na antu aku mwamba wa Seili, yayalwisye. Yonsi kwene wayafuntwisye ku konona aina Izlaeli.

¹¹ Lyene cino akutuswilizya apamulandu wakuti yatuzinga umu nsi ino wene watupile ngi mpanga ya upyanyi.

¹² Wewe, we Leza witu kwati utangayapezya? Swemo tutakweti amaka akucimvyanya ni ciliumba icitaikulila wakwe cii icikutulwisya. Tutakweti ivyakucita pano amanso itu yasintilile kunuli.”

¹³ Insita kwene ilya ala antu yonsi pyu a mpuka yakwe Yuda yatiyimilila pa mulola wakwe Yawe pamwi na aci yao na ana yao akulu na anono kwene.

¹⁴ Alino umu ukongano uo kwene, Umupasi wakwe Yawe uwikila pali Yaazieli, umwana umonsi wakwe Zakaliya, umwana umonsi wakwe Benaya, wino isi wali a Yeiyeli, umwana umonsi wakwe Mataniya, umwina Levi nupya uwamu mupanda wakwe Asafu.

¹⁵ Wene wavwanzile ati, “Uvwini mwe Ayuda mwensi na mwensi mwe ikazi amu Yelusalemu alino nawe kwene mwene Yeosafati vino Yawe akumunena ati, ‘Mutuvwa intete nanti kutovoka pano ulwi uu usi winu. Lelo uwakwe Leza.

¹⁶ Akatondo mukatuke nu kuyalwa nayo ulwi. Umukwiza kwao yalafumila uku mulundu wakwe Zizi. Namwe mulayazana apipi ni cifoloma caku katutu, umu Lwanga lwa Yeluwele.

¹⁷ Citalingine kuti mukalwisye pakwene. Mwemo mukikale celu, ale mukuceleka nu kulolelela vino Yawe alamulwila ulwi uu mwensi mwe ikazi aku Yuda nu ku Yelusalemu. Mutuvwa intete nanti kutovoka. Mutondo muce mufume mukalwe nayo, nga Yawe nawe alaya namwe pee.’”

¹⁸ Lilyo ala Yeosafati kumwi na antu yonsi yatiyinama sile pansi apa manso yakwe Yawe yakumupepa.

¹⁹ Lyene aina Levi, ana yakwe Koati na ana yakwe Kola ala yatiyimilila kuti yalumbanye Yawe, Leza wa ina Izlaeli, ala yakupundisya.

²⁰ Lyene antu kwene yayo iyazyuka katondotondo nu kulungama ku mutengo wakwe Tekoa. Lino yakufuma, Yeosafati aimilila pa mulyango ati, “Tuini tuvwe swe antu aku Yuda na swensi swe ikazi amu Yelusalemu. Tailini Yawe Leza winu, nupya musipe. Tailini yakasema yakwe alino muli nu kucimvya.”

²¹ Lino yatandika ukuuzyanya pakasi kao, alino yasozile yamwi akwimbila nu kulumbanya Yawe, yene ala yatiyazwala ivitiswe, na yakatungulula ala yakuvwanga yati, “Lumbanyini Yawe, pano ulukundo lwakwe lusisila, lelo ulwa manda pe.”

²² Lino yatandika ukwimba nu kulumbanya, Yawe nawe auvwa nga avunuka aina Amoni, aina Moabu na antu aku Mwamba wa Seili yonsi yano yazanzanga impanga ya Yuda, nga yonsi iyacimviwa.

²³ Aina Amoni na ina Moabu apali pakukatukila antu aku Mwamba wa Seili iyasyunola yonsi pyu. Lino yayakomola yonsi alino lyene yatandika ukukomana atupu.

²⁴ Pacisila cakwe vyonsi vii, antu aku Yuda lino yafika uku ncende yalungatana nu lwanga nu kuceleka ukwali ivita ivingi, iyalola ivyala ala vilambalile pa musili. Kutali umuntu nanti wenga uwapuswike.

²⁵ Acino Yeosafati na antu yakwe yaya ku kusampa iviya vya afwe, nga yazana ing'ombe izivule wakwe cimwi, iviya, vyakuzwala nga navyuzeko ivyamutengo sana. Walanga muno walakutunta mpaka aposiwa. Wene wasamfile vivyo pa manda makulu yatatu, pano vyavulisye cuze.

²⁶ Pa wanda uwalenga yani, iyakongana uku Cifoloma ca Belaka, akuno iyacindika Yawe. Uli mulandu uno ukufika na ndakai icifoloma cici cicili cikaamwa ukuti Belaka.

²⁷ Lyene alino yonsi aku Izlaeli na aku Yelusalemu iyaswilila ni nsansa ala Yeosafati watayakolelela pano Leza wao watayazanzya pakuyacimvizya anisi yao.

²⁸ Iumba lili lifika umu Yelusalemu ku Ng'anda ikulu yakwe Yawe, ala yakulizya iviwaya, yabanjo ni ntandala.

²⁹ Lyene yamwene yonsi ayazingulwike yuvwa intete wakwe cimwi apa kuuvwa ukuti Yawe uwalwile inkondo pa anisi ya ina Izlaeli.

³⁰ Pamulandu uu, kwali umutende utantalile uwaku matwi cele umu uteko onsi wakwe Yeosafati nu ku inipamba

Imfwa yakwe Yeosafati

³¹ Yeosafati wali ni myaka 35 lino watandike ukuteeka mu Yelusalemu, nupya watenzi apa wene pa myaka 25. Nyina wali a Azuba, umwana wakwe Syili.

³² Yeosafati watozile icilangililo ca miyele isuma cakwe isi Asa. Atatazile asye umu nzila zyakwe isi. Wene watwalilile nu kuzanzya Yawe amanda avule.

³³ Lelo incende zyakupepela mwenemo utuluwi atononyile. Alanga antu aingi yatatala yazenzuka nu kupeela imyenzo yao kuli Yawe Leza wa vikolwe vyao.

³⁴ Ivintu vyuze vyonsi vino Yeosafati wacisile ukufuma pakutandika mpaka umalilo wa vyalembwa umu lupapulo lwa milandu yakwe Yeu umwana umonsi wakwe Hanani, luno lukalondolola pali yamwene aku Izlaeli.

³⁵ Lino vyonsi vii vyasila, Yeosafati umwene waku Yuda yalemana na Aaziya umwene waku Izlaeli, wiyo uwali a ncila visinga.

³⁶ Yalemine nawe pakupanga ivyombo ivyakuya ku Tasyisyi nu kulongela yalongelanga uku Ezioni Gebeli.

³⁷ Lyene Elieza umwana umonsi wakwe Dodavau waku Malesya asesemela Yeosafati iviipe ati, “Pamulandu wakuti umine akapi na Azaliya, Yawe alonona ivyombo vino wemo wapanga.” Na cendi ivyombo vivyo vyononike ukwaula ukufika uku Tasyisyi ku kuculuzya.