2 Milandu 2 - Amazwi Yakwe Leza 2013

Uteyanyo wakukuula Ng'anda ikulu yakwe Yawe

¹ Solomoni welenginye ku kuulila Yawe Ng'anda ikulu iya kumupepela mwenemo nga nu kukuula isano lyakwe umwisikulu.

² Walembiile penepo yakasenda ya viya ukulingana ni mpendwa ya antu amazimbi amakumi cinimbali (70,000). Alino yakalepula ya mawe nayo amazimbi amakumi cinani (80,000). Alino yakapitao yakwangalila incito nayo amazimbi yatatu ni myanda mutanda (3,600).

³ Solomoni alino atumila Hilamu umwene waku Tuli amazwi ati, “Nani kwene nkulonda uncitile vivi kwene vino wacitile tata Davidi. Wamutumile imilando ya mikelide kuti akuulile isano lyakwe.

⁴ Nemo natinakuulila Yawe, Leza wane, Ng'anda ikulu yakumucindikila mwenemo, muno antu yakwe pamwi nani kwene tulamucindikila mwenemo. Ali muno tulamufutumwila ubani wa mununko usuma. Alino nupya apa manso yakwe umweneco ali pano manda yonsi tulapeela umukate wamuzilo na mawila yakoca akatondo na manguzi. Umu Masabata nu mu manda makulu, alulumbi, ndi vino apa Ndoleko ya Mwezi, amuno tulatuula vivyo, wakwe muno watuneniile swe ina Izlaeli ukulacita pe na pe.

⁵ Nkulonda uku kuulila Yawe, Ng'anda ikulu, pamulandu wakuti Yawe, Leza witu umukulu ukuluta tuleza tonsi utwasyala.

⁶ Kusi nanti wenga angakuulila Yawe Leza Ng'anda ikulu, pasi pano nanti iyulu kwene litange limukumane. Ale uzye cumi anene ningamukuulila Ng'anda iyakuti aikala mwenemo? Awe foo! Nemo nsi cimwi, cakuti ningamukuulila Ng'anda ikulu, suka sile incende yakuti ince namufutumwila mwenemo ubani.

⁷ Lyene nkukulenga kuti uce untumile kweneko umuntu uwamanya ukulemba ivilembo wakwe vivi vino antu yakalemba apa nsimbi zya vyela. Utume umuntu uwamanya ukuomvya zaabu na siluva, umukuwa ni vyela vyuze. Wiyo uwamanya ukupikula insalu zya usavu nu kuzisenula mwi langi lya cifungo, ni ziyenzulukile, ni ziyenzu. Aliza aombele pamwi na yafundi yamuno umu mpanga ya Ayuda nu mu Yelusalemu, yano tata Davidi wasile wasonta.

⁸ Nu kumanya namanya sana vino aomvi yako yacenjela ukutema imiti. Acino fwandi untumile imilando ya mikelide na sondwa na mpaza ukufuma ku Lebanoni. Antu yane na antu yako

⁹ yalaombela pamwi mu kutema imiti ivule, pamulandu wakuti Ng'anda ikulu ino namakuula ilinzile kuya ikulu nupya iya lulumbi.

¹⁰ Aomvi yako yano yaliza ku kutema imiti ndayatumila ingano zya misante ukulingana ni cipimo ca matani 2,000, ni mbezu zyakwe baale nazyo vivyo kwene. Alino amafuta ya miolivi 440,000, waini nawe amalita 440,000.”

¹¹ Hilamu umwene waku Tuli nawe atumila Solomoni kalata ati, “Pamulandu wakuti Yawe watemwa antu yakwe, watakulasika uwene apa antu yakwe.”

¹² Nga Hilamu alundapo ukuvwanga ati, “Alumbanyiwe Yawe, Leza wa ina Izlaeli, kaumba uwiyulu ni nsi! Wapeela umwene Davidi umwanakwe uwa mano wiyo uwakwata amalango yakwiluka. Nupya fundi akweti amapange a kukuulila Yawe Ng'anda ikulu ni sano lyakwe umweneco.

¹³ Nkukutumila fundi, nyela nupya fundi uwa mano uwizina lyakwe Hulamu Abi.

¹⁴ Nyina uwamu mutundu wakwe Dani, na isi umwina Tuli. Wamanya wakwe cimwi ukupanga ivintu vyakwe zaabu na vyakwe siluva, vya mukuwa, ivya vyela, ivyakuwaza amawe ni mbao. Akapikula insalu nu kuzisenula mu malangi ya cifungo, ni liyenzulukile nga ni liyenzu cee. Angalemba ivilembo ivya musango uuli onsi ndi vino yakalemba apa nsimbi zya vyela yakacita. Angaombela umuntu icintu icili consi umusango uno umweneco angalondela. Wemo uce umuleke sile kuti aombe na yafundi yako a milimo pamwi na aomvi yane, yafundi yano yaombelanga so Davidi.

¹⁵ Wemo tutumile sile ingano pamwi ni mbezu zyakwe baale nga na waini akapangwa uku matingi na mafuta ya miolivi ndi muno we musambazi walavile.

¹⁶ Swemo kuno tumatema imiti yonsi iya mbao zisuma ino ukulonda ukufumya umu myamba yaku Lebanoni. Tumainyepanga umu myanzi wa vilako, nu kwisumbila apa manzi pali yemba. Alino ilafuma ikwelela ukuya uku Yopa. Namwe ali kuno mulaipokelela nu kuizuulula nga muitwale uku Yelusalemu.”

Yatandika uku kuula Ng'anda ikulu yakwe Yawe

¹⁷ Umwene Solomoni wapenzile ainamasi yonsi yao ali umu Izlaeli, umu musango uli umwi kwene uno Davidi isi wacisile. Wazanyile ukuti ainamasi yali impendwa ukufika 153,600.

¹⁸ Waputwile kweneko 70,000 akuti yasenda iviombelo. Na yauze nayo amazimbi 80,000, yakalepula ya mawe umu myamba alino asonta nayauze 3,600 akuti yaye ali yakapitao a kwangalila umulimo wikuule.