2 Milandu 19 - Amazwi Yakwe Leza 2013

Kasema Yeu wakalipila umwene Yeosafati

¹ Umwene Yeosafati uwaku Yuda aweluluka ulumi uku Yelusalemu.

² Kasema Yeu umwana wakwe Hanani nawe ala watafumila apanzi ku kumukomenkanya. Lino yakomenkana, nga kasema Yeu auzya umwene ati, “Uzye icisuma ukwazwilizya anisi yakwe Yawe? Apamulandu uu, umukosi wakwe Yawe uli nu kukuponela.

³ Lelo nanti cingaya vivyo, kuli ivisuma vimwi vino wacita, pasi pano wemo wonona maunkolanya yakwe Asyela umu mpanga ii yonsi nu kukwata umwenzo wakulondesya Leza cila nsita, vitalililika.”

Umwene Yeosafati walolola imipepele

⁴ Nanti umwene Yeosafati wikalanga umu Yelusalemu, lelo wali nu mukoozya wa kupempula antu yakwe lililili, ukutandikila uku Belisyeba mpaka nu kufika uku mpanga iya myamba yakwe Efulemu, ala akuyakolopezya kuli Yawe, Leza wa vikolwe vyao.

⁵ Wene aika yakapingula umu mpanga yaku Yuda umu musumba uli onsi uwakuuzilwe ni linga.

⁶ Alino wapile ilamulo kuli yakapingula ati, “Mwatala imwelenganya ningo pakucita upinguzi pano umulimo uno mukuomba usi wa muntu. Lelo uwakwe Yawe. Lyonsi lino mukapingula ala Yawe ali namwe.

⁷ Acino muye antu ya coopo kuli Yawe. Mwasakamala imilimo inu pasi pano Yawe Leza witu asizumilizya ulufyengo nanti akasoozi nanti amafukakanwa.”

⁸ Kwene uku Yelusalemu umwene Yeosafati wasonsile aina Levi yamwi, yasimapepo nga ni ntunguluzi zya ndupwa zyamu Izlaeli, kuti ayano yapingula umu cifulo cakwe Yawe alino nu kuputula imilandu ya antu yonsi amu Yelusalemu.

⁹ Wene wayapile ilamulo kuti yaomba umulimo kwene umukoopa Yawe nu mwenzo onsi umu kutailwa.

¹⁰ Ndi kwaya umulandu wakukoma, nanti ukuntayela amasunde ni milandu yuze ya akazi kinu yano mwikala nayo, mwayasambilizya kuti yatatwalilila ukwifya Yawe. Ndi mwacita cii, lyene umukosi wakwe Yawe utalamuponela, mwemwe kumwi na akazi kinu. Mwacita vivyo kwene alino mutalifya awe.

¹¹ Lyene Amaliya, Simapepo Mukulu, awino alamutungulula pali vyonsi ivikumile Yawe. Zebadiya umwana umonsi wakwe Isumeli, intunguluzi ya mutundu wakwe Yuda, aliwe akalolekesya vyonsi ivikumile umwene. Alino aina Levi nayo yalamuombela wakwe yakapaso. Mwacita vii nu mwenzo ufumaluke, nga Yawe si angala aye na wensi wino akacita ivisuma.