2 Milandu 18 - Amazwi Yakwe Leza 2013

Kasema Mikaya wacelula Aabu

¹ Walanga umwene Yeosafati walonka sana, nu kulumbuka walumbukisya, wateinye utwazi wa mwana wakwe nu mwana wakwe Aabu, umwene waku Izlaeli apakuti yangayatwalizya.

² Walanga papita imyaka imwi imwi, Yeosafati waile ukukupempula kaemba muze Aabu, uku musumba waku Samaliya. Apakulanga Yeosafati na antu yakwe umucinzi, Aabu wakomile imfwele ni ng'ombe nyanya umwi zya kuimula nga amukonkomezya kuti azanze Lamoti Gileadi.

³ Aabu ali pakuuzya Yeosafati ati, “Uzye kwene utalansukilila uku kulwisya umusumba wa Lamoti Gileadi?” Yeosafati amwaasuka ati, “Wemo ndi cakuti watuiteyanya sile, ale nani kwene natinjiteyanya pamwi ni vita vyane kwene. Ala mwine, tuli nu kupita nawe.”

⁴ Alino nupya Yeosafati ati, “Kwene apamulandu uu, cingazipa utale uzye Yawe Leza.”

⁵ Fwandi Aabu nawe ali vino wakonganike yakasema yano yali manye imyanda ini ni mpuzyo, nga ayuzya ati, “Uzye tuce tuye ku kulwisya umusumba wa Lamoti umu mpanga yaku Gileadi nanti foo?” Nayo yamwasuka yati, “Muce muye, pasi pano Yawe aliwe alamupeela amaka ya kucimvya.”

⁶ Nga lelo Yeosafati uzizye ati, “Uzye kusi kasema namuze wino tunguzya kweneko ukwelenganya kwakwe Yawe?”

⁷ Aabu ali pakumwasuka ati, “Akunoli umuntu namuze wino tunguzya kweneko ukwelenganya kwakwe Yawe, ni zina lyakwe a Mikaya umwana umonsi wakwe Imila. Ukuya kwene nemo namupata sana, pano lyonsi asinsemela ivyakunzipila. Lelo lyonsi sile nemo vikanjipila.” Yeosafati amunena ati, “Awe nawe utalanda vivyo.”

⁸ Fwandi umwene Aabu ali pakutuma wenga wamuli yakapaso yakwe amunena ati, “Yanga likwene ukatole Mikaya, umwana umonsi wakwe Imila.”

⁹ Yamwene yoili, umwene waku Izlaeli na Yeosafati umwene waku Yuda, yatenzi pa vilimba vyao vya wene pa lwano lwa kupuulila ale yazwite na malaya yao awene, ala yatenzi apa lwano apa vilimba vya wene, apanzi lwapa mulyango wa musumba wa Samaliya. Yakasema nayo ale yakusema apa nkolelo yao.

¹⁰ Wenga pali yakasema, Zedekiya umwana umonsi wakwe Kenaana wapanzile impembe zya vyela. Lyene anena Aabu ati, “Yawe wavwanga wati, ulacimvizizya aina Asilya ku vintu vii.”

¹¹ Alino yakasema yauze iyavwanga amazwi ali yamwi kwene iyati, “Katuka ukazanze Lamoti Gileadi, umaya ukacimvye. Yawe aliwe alakupeela amaka akucimvizya.”

¹² Apa kasita kako kwene, inkombe iyaile uku kusenda Mikaya iiza ivwanga iti, “Yakasema yonsi yatiyavwanga amazwi asuma uku mwene, akucimvya. Ale nawe fwandi vwanga ivisuma tuuvwe.”

¹³ Lelo Mikaya wene amwaasuka ati, “Nalapa umwi zina lyakwe Yawe uwa umi ukuti nemo namavwanga vino Yawe amanena.”

¹⁴ Ni cacumi, lino waile alolekela uku mwene Aabu, umwene nawe amuuzya ati, “Mikaya, uzye umwene Yosafati nani tungaya tukazanze Lamoti Gileadi nanti foo?” Mikaya ali pakwasuka ati, “Pitangini sile kazanzini nu kucimvya mumaya mukacimvye!”

¹⁵ Nga lelo Aabu amuzikisya ati, “We, ndi cakuti ukulandila umwi zina lyakwe Yawe, ulinzile walanda icumi. Amaila yanga fwandi yano indakunena icili cimwi kwene?”

¹⁶ Mikaya nawe amwaasuka ati, “Nga natindole, inkulola ivita vya ina Izlaeli kuno vyativisalangana umu mulundu kwati imfwele izyaula kacema. Na Yawe wavwanga wati, ‘Antu yaa yatakweti intunguluzi. Fwandi kayapite ulumi kumwao.’ ”

¹⁷ Aabu ali pakulanda ati, “We Yeosafati, nalinkunenyile ukuti wene asisema ivyampomvu kunondi. Lyonsi sile nemo vikanjipila!”

¹⁸ Mikaya atwalilila ukulanda ati, “Ale lyene uvwa vino Yawe akuvwanga! Naweni Yawe atenzi apacilimba ca wene ukwi yulu, na angeli yakwe ale imilile umu mbali.

¹⁹ Alino Yawe auzya ati, ‘Uzye aweni amaya akasombe Aabu, umwene wa ina Izlaeli apakuti ace aye uku Lamoti Gileadi yakamukome?’ Alino angeli yamwi yalanda vyuze, nayauze iviiyele.

²⁰ Mpaka umupasi wiza ku nkolelo kuli Yawe, nga iuvwanga uti, ‘Namaya nkamutunkole.’ “Lelo Yawe auzya ati, ‘Uzye umaya ukamutunkole mu musango cii?’

²¹ “Umupasi ulya nao wasuuka uti, ‘Namaya nkanene yakasema yakwe Aabu yonsi yakaseme ivyaufi.’ “Nga Yawe avwanga ati, ‘Pitanga sile wemo kamusombe nu kuomba cayaomba sile ningo.’”

²² Mikaya asondwelela nu kuti, “Vivyo ali vino caticicitika. Yawe wataleka yakasema yaa yize yasombe kunuli. Lelo umwisikulu wene watakupingula ukuti utoole imipamba.”

²³ Kasema Zedekiya, umwana umonsi wakwe Kenaana, pali pakupalamila amuma na kalupi api tama. Alino amuuzya ati, “Uzye mupasi wakwe Yawe wali wapitila pi apa kufuma kunondi, nu kwiza vwanga muli wewe?”

²⁴ Mikaya nawe amwaasuka ati, “Ulamanya cico uwanda uno ulingila uku muputule wako ukukasi uku kufisama.”

²⁵ Alino lyene Aabu anena kapaso ati, “Lemini Mikaya mumutwale kuli Amoni umulasi uwamu musumba na kuli Yoasyi umwana umonsi uwa mwene.

²⁶ Muyanene yamunyepe umu ng'anda yaminyololo. Uwamupeela sile amanzi ni cakulya suka ince mbwele umutende.”

²⁷ Mikaya pano ali avwanga ati, “Ndi waca wawela umutende, ale Yawe atavwanzile umu kanwa kakwe nene.” Alunda na mazwi akuti, “Muvwikisye mwensi amazwi yano namavwanga.”

Imfwa yakwe Aabu

²⁸ Acino lyene yamwene yaili, Aabu uwaku Izlaeli na Yeosafati uwaku Yuda, yaile uku kulwisya umusumba wa Lamoti Gileadi.

²⁹ Alino Aabu anena Yeosafati ati, “Lino tumaya umu kwingila umu nkondo, nemo namailuvyanya lelo wemo uzwale sile insalu zya wene.” Fwandi ali vino Aabu wene waile uku ulwi ale watailuvyanya umu mizwalile.

³⁰ Umwene waku Asilya wapile ilamulo kuli yamusika yakwe a maceleta, ilyakukana lwisya umuntu ali wensi, suka sile umwene waku Izlaeli.

³¹ Ali cino fwandi walanga yalola Yeosafati, iyati nu kuti, “Wikwene ali mwene wa ina lzlaeli.” Acino iyamulungama uku kumulwisya. Yeosafati nawe akuuta kuli Yawe, nga Yawe nawe amuvwa, amutuula nu kumutuula apa kuyafuntusya kunoli.

³² Pasi pano yamusika ya vita vya maceleta yaweni ukuti asi umwene wa ina lzlaeli, nga iyata uku muzinganya.

³³ Lelo iciya sile amalunga, icita cimwi ukwaula ukumanya icilasa uluceto. Nalo iluya, ilutota Aabu apakasi ka cisyangu, lwapa cifuwa cakwe. Nawe apunda nu kunena kapisya wi celeta lyakwe ati, “Senuka, futuka uleke imfume umu nkondo pano nemo nalaswa.”

³⁴ Uwanda uwa, inkondo icemukisya, lelo umwene Aabu wene asyala umusanya onsi aimilile sile umwi celeta lyakwe ulunga na ina Asilya. Lino sile ilanzi lyatemba awe mukwai afwa nu kufwa.